在Flickr裡找到的靚靚屋企style

在Flickr裡找到一個群組, 入面d屋企style真係靚到令人尖叫!點解d外國人可以佈置得咁靚!?(雖然我都知呢d係示範單位)但在香港根本無可能做倒! 香港只有港式家具!! 一係就平實式的(e.g. 實惠、直銷、吉豬島), 一係就奢華式(e.g. 歐化、梳化倉...) 點解無呢d又外國又靚既style呢? 唉....

Flea Market Style - from Flickr.com
http://www.flickr.com/groups/fleamarketstyle/pool/

借據

尋晚肥肥阿媽攞左張借據出黎俾我同肥肥簽, 話借左三十萬俾我地買樓, 如果賣左樓要還番俾佢諸如此類....

駛唔駛呀!? 借錢俾個仔都要寫借據!? 咁養大個仔使唔使寫借據呀?
好呀....我知你係算住我呀, 由簽律師契果時已經知,
你可以唔借架, 無人迫你. 我亦唔一定要向你借, 我家下無錢咩? 我同屋企人一齊供樓投資仲賺得多啦!

你唔俾我賣樓, 唔俾我放租. 好好好....隨便你.
反正我無蝕底既, 就算丟空間屋供樓咪當投資law!
不過你想我同你個仔結婚生仔? sorry , NO WAY 喇!!!!
以後無野好講, 收綫!

(其實我仲有好多說話想講, 但怕肥肥唔鐘意聽, 都係吞左佢算.)

2010 走進符號的國度 - Yufuin & Hakata Day 6

早餐時間是九點半, 一泊二食的package當然不能miss左個早餐. 到了餐廳, 同樣地前菜已準備好等我地. 都是和式的早餐, 有茶漬類食物, 飯糰, 豆腐, 味噌湯....不過貼心地有DIY即煎荷包蛋同煙肉, 仲有白飯, 咖啡, 真係豐富到飽死!

check out時間係十二點, 食完早餐得番一個鐘, 拿拿臨去大眾湯浸下先! 我入去時一個人都無, 等我一個浸曬, 所以完全無話光脫脫尷尬情況, 況且對住d唔識既人都唔會尷尬呀!

浸完後就趕緊執埋d行李check out,先把行李放在酒店. 到火車站買了三點幾的回程火車票, 同樣都是由布院之森. 之後開始大解放shopping喇!由於之前怕買左要拎所以唔敢買咁多, 依家係時候解放喇! 買了些無無謂謂的東西, 又買了些手信, 去了狗主題的商店買左"豚耳"俾波波.

最後我地去左金燐湖, 果度風景好靚架, 空氣又清新, 好正!Lunch去左湖邊一間食手打喬麥面度食, 這間面店很旺場, 要稍為等一陣位先有得食! 店裡面d人個個清一色食喬麥面, 我地又叫左一份. 是凍食的, 不過我不太喜歡, 嫌佢太淡謬謬吧!出到去經過一間炒雪糕店, 忍唔住買左超美味的士多啤梨炒雪糕, 好正!

食完lunch就回酒店取回行李搭火車回博多站, 當然係入住番東橫INN啦! 今次都係住低層, 三樓, 算! check in後, 便步行到天神運河城Canel City, 酒店步行十分鐘便到, 很方便. 有一間好大的Comme Ca Store, 係一間由家品到衫都有的店, 有點似Muji, 裡面有些特價區, 有又便宜又靚的家品, 買了些碗碗碟碟for新屋用, 仲有一個餐墊, 400yen, 回到香港在francfranc見倒一模一模賣HK$85, 開心到笑!
這個mall仲有好多野行, 有超大間的無印良品, Mussy, Gap Japan, Zara等等等, 不過我都無買到.

這個Mall約9:30便關門, 我地又行番去中州, 諗住食前天經過的串燒放題, 點知去到又搵唔倒間野, 得番飲之放題, 可能我地記錯啦! 所以決定去一蘭旁邊的"備長串燒店"居酒屋食串燒.這間店的坐位設計又係好特別, 一個個卡位, 每個卡位都係L形, 擺法係令到客人看不到隔離枱坐左咩人!!又係諗唔明點解要咁做呢? 可能唔想俾人見倒你飲醉個樣吧! 哈哈!

雖然個menu有圖, 但大部份都是日文, 很多片假名....幸好這店有個女侍應說一口非常流利的普通話!(對, 是普通話, 不是國語, 因為聽得出有點京腔!)佢好細心咁逐樣食物解釋俾我地聽, 真是太好了! 這裡的串燒不貴呀!最平的雞肉串只是80yen!!!好平啊! 當然也有貴些的, 五花腩, 豚舌, 好味到不得了! 配一杯荔枝果酒, 爽呀!

這餐沒有吃得很飽, 因為一心諗住留肚去屋台食拉面. 離開串燒店又去了超市買手信, 買了士多啤梨回去(怎料最後留左o係釜山酒店唔記得帶走....). 從超市穿過紅燈區便是屋台, 前天星期五這裡人聲鼎沸, 到處都是飲酒耍樂的人, 怎麼今天那麼冷清? 原來今日每月一次的飲酒掃蕩日, 好多警察準備掃蕩, 有D酒吧索性唔開門, 嘩, 有無無聊d呀, 香港咁做一定俾人投訴到死啦!!!哈哈!!!

走到河邊的屋台(其實就在酒店旁), 第一間是最多人捧場的, 我地就選了這一間 - 一奄 (後來才知原來是最有名的屋台拉面). 見咁多人食拉面我地又叫左一碗. 一人一碗拉面, 當然九州拉面是濃濃的豬骨湯啦! 好惹味! 再架一碟串燒, 一支Asahi, 唔好以為坐街邊就平呀, 這一餐都要2500yen.....都幾貴架!

食飽飽便回酒店訓覺了!

2010 走進符號的國度 - Yufuin Day 5

為了搭10:45分的火車到由布院, 今天很早起床check out. 這邊東橫INN的早餐很一般....是日式早餐, 只有飯糰, 味噌湯, 面包及幾款小碟小碟的食物(茶漬類), 沒有我愛的煎蛋同腸仔....不吃也罷.....

約10:30到達博多駅, 正打算拿出車票入閘, OMG!!發現有一張車票唔見左!! 成4,500yen一張, 大鑊! (是咁的, 車票一set兩張, 一張是車票, 另一張是指定席料金, 要疊埋一齊入閘機先得, 而我唔見左的, 是其中一張車票) 可能是我昨天拿出來看時間時留左o係酒店度. 返去攞都未必趕得切, 肥肥這時便去找站務員(是一位漂亮制服女), 她知道後好似十分從容, 笑著把我們引領到lost & find, 跟那邊的一位職員說一聲, 她便拿出一張好似一早已準備好的後備車票給我! 嘩, 又會咁順利既! 真係好彩呀!!好感激啊!!!

靚女姐姐更親自帶我到閘口教我地點入閘, 真係好好人. 走到月台, yeah, 外形特別的由布院之森出現喇! 由布院之森係一架觀光列車, 所以無論外觀同內裡都同一般JR唔同! 好靚架~好適合去由布院呢d地方! 啱曬feel~

車程大約兩個幾鐘, 雖然車上面無娛樂設備, 但係沿途d風景好靚, 都唔算悶. 可能因為星期六, 差不多全車滿坐! 車內有一列餐卡, 有些好靚五顏六色的便當賣, 我見其他乘客都食得好滋味咁~不過唔肚餓所以無買到黎食law! 由於係觀光列車, 所以有d火車紀念品賣, 啱曬d鐵道迷. 而且去到一d"景點"時, 例如山呀, 濮布呀, 就會有靚女鐵路姐姐人肉拎個紙牌出黎走過個車廂做人肉字幕, 話俾你聽呢度叫咩名, 真係好貼心~最正既係靚女鐵路姐姐仲會拎個紀念牌同帽出黎, 逐一俾每位乘客拍紀念照片, 我緊係唔執輸啦! 好開心有一張同肥肥既合照啊!

12時半左右到達由布院駅, 這裡比較簡樸. 不過月台上居然有足湯(要俾錢的), 真係貫徹溫泉鄉的主旨. 而由布院亦被全日本OL票選最想去的溫泉第一位!! 哈哈, 我呢d OL梗係要看個究竟啦! 由布院的街道車不多, 憑著車站內取得的地圖, 再加埋之前跟網上地圖劃出來的手寫map, 慢慢找到我地間民宿-仙洞. 佢既位置位於金鄰湖附近, 都唔易搵架, 咩住兩個大背囊都幾吃力, 要行成二十分鐘先到. 三點鐘才check in, 我地放下行李便出外覓午餐去!

想吃點日式洋食, 肥肥呢個漢堡妖怪話要食日式漢堡. 走到近火車站的街道, 在一家可愛的雜貨點旁便有一間Yufuin Burger, 裡面只有六七個坐位, 我地就坐在靠窗的位置吃個漢堡, 味道同MOS Burger好似, 小店即叫即製, 都幾好味!

食飽之後便四處散步去, 這兩天天氣好得不得了, 天朗氣清, 唔會太熱, 午間氣溫約十五度左右, 走起路來舒服得很. 而且這個山谷空氣非常清新, 我同肥肥都不斷大大力咁索d fresh air! 好舒服啊! 由布院最有名的就是湯之坪, 這是一條開滿Kawaii le的商店的街道, 100%的店都是非常Kawaii le! totally迷倒所有女士們(包括我), 有手信店, 雜貨點, 果jam店, cafe....而當中亦有由布院相當有名的卷蛋店-B-speak.

這間店可說是由布院名物, 好多人都慕名而至, 這店清一色售賣兩款卷蛋(朱古力味及原味), 內裡只有鮮忌廉夾心, 售價是1,380yen(約HKD110). 一條無夾心齋卷蛋居然賣過百港幣, 但仍然吸引倒一眾OL排隊購買, 食慣蛋糕既我都決定買條試下有幾好味! 個包裝好靚架, 仲有兩包冰敷住驚你溶左tim!

為怕蛋糕會溶,我地決定先回酒店吃件蛋糕.房間已經準備好~是和式的房間呢!位於閣樓,只有我們一間房在該橦的閣樓.房間內用和式紙門分隔左兩個房間tim! 大的房間有中央放了一張日本式的暖爐枱,這個時候蝸進去真係好C服呢! 而右邊的小房放了茶杯set及衣櫃等. 我地決定沖杯咖啡, 享受一下卷蛋下午茶先! 卷蛋蛋糕有很重的蛋味, 明顯係用靚料, 夠fresh. 不過我就覺得乾左d, 唔夠濕潤. 好似燊師傅做的仲好食d啵!

在房間休息左一陣, 因為由布院d舖頭六點幾就會關門, 所以我地趕緊出去再打多個round,兼去唯一的超市買野食做宵野. 去到超市,買左一瓶米酒,包裝盒度教你可以溝牛奶一齊飲,所以我地又買左一盒阿蘇牛奶.當然亦買了好平既刺身啦!出到超市門口有一檔小檔賣串燒的, 我地又買左一盒燒雞軟骨. 好好味架, 未開飯就已經偷食左1/3喇...

返到去差唔多到食飯時間喇!我同肥肥原先諗住浸下溫泉先食,不過因為趕唔切食飯所以無浸到. 落到餐廳,有大半的住客都已經開緊飯, 我地算係尾圍喇. 被安排到窗邊的枱. 枱上已放好了前菜, 又係好靚果d setting,一碟碟細細碟唔同顏色的. 當然也有開胃小酒啦. 枱上印有一張是晚menu,有成十樣野食咁多, 逐樣逐樣慢慢上,侍應會介紹每道菜,未食到主菜,我同肥肥都已經飽左八成喇! 到左主菜 - 地雞鍋, 份量都十分大盤, 不過個鍋就好少湯, 好似好快會乾水咁.所以我地好快咁碌熟曬d雞先!d地雞都好有雞味喎!唔錯唔錯!食飽飽仲有雪糕做甜品,今餐真係大滿足呀!

在我地晚飯既時間,工作人員已經入左我地房幫我地鋪好床舖. 所以我地返到房間一個靚靚整齊既床鋪已經鋪好左在房中心.而且仲有兩件飯團放左o係房俾我地做宵夜tim!仲有張紙類似話由布院夜晚會有鬼,叫我地最好留在酒店食宵夜唔好出去喇,哈,好鬼馬喎.

到左我地浸貨切溫泉既時間,換好溫泉旅館提供的睡衣,就去左樓下的個室溫泉度, 可以俾我同肥肥一齊浸的!嘩,出面d氣溫凍到呀!我估一定低過5度!個室溫泉其實好似一間有浴缸的沖涼房,無咩特別.

浸完之後回到房間,原想抖一陣再去大眾湯,點知抖抖下訓著左,俾肥肥叫起身食宵夜我先知醒! 宵夜很美味呢,不過太眼訓了,沒能力去浸大眾湯就倒頭大睡一覺訓天光!

2010 走進符號的國度 - Hakata Day 4

早上約八點左右落船, 終於到達日本喇! (好喇, 我承認我係第一次去日本, 夠大鄉里了!)船停泊在博多國際海港, 我起身時大部份乘客都已落船喇....辦了入境手續, 又打指模又影相, 都不算太耐. 出到去有個旅遊服務處, 拿了地圖及旅遊單張等, 又向小姐問了巴士路線, 英語很好, 又十分helpful及nice, 讚!

之後我地搭了巴士到博多駅(220yen). 巴士好乾淨, 這裡的巴士每停車都會熄匙, 我想是減碳的做法吧! 日本人都幾有公德. 這裡搭巴士完全沒問題, 每就有真人廣播(由車長用咪live講), 不過日語聽唔明, 但有顯示牌, 有日文漢字, 好易睇, 一定不會落錯車. 又有電子顯示牌顯示分段車資, 落車先俾錢. 總之, 同釜山搭巴士係完全兩回事.

到達博多駅, 我地既目的係買定聽日去由布院的車票. 正直上班之時, 車站內都是人來人往的上班族, 就只有我同肥肥兩個咩住背囊的騎呢怪. 肥肥此時無啦啦講: "我一定要除左件羽絨, 依家我成個慈雲山阿伯咁, 好柒啊!" (哈哈, 笑爆嘴, 平時又唔見你咁講?) "你都係呀, 荔枝角剩女!" (!!!!!!!!!!頂你呀!!!!!!!)

找到售票處, 之前我在HK已print定我要買的車票名, 把紙遞給售票員便OK了, 價錢是9,000yen(2人單程), 好貴啊!!!! 買好車票, 便去唱點錢, 站務員叫我地去郵局, 點知郵局又叫我地去福岡銀行(原來郵局只兌美金). 福岡銀行換完錢之後, 真係眼都突埋, 兌換率低達10算!!!!!!! shit !!!!!!!!早知唔兌咁多啦!!!!仆街!!!!!搞到我全個trip都唔捨得駛錢......10算喎......媽呀.....好想喊.....

之後搭巴士到位於西中州的東橫INN, 釜山駅有很多巴士去西中州, 超密, 價錢100yen, 看來100yen是搭巴士的最低消費吧(很肉赤...). 10分鐘車程左右到達東橫INN, 還未到check in時間便先放下行李, 步行到附近的天神西鐵站, 因為今天的行程是到太宰府! 不過好肚餓, 諗住食下早餐先....不過這裡食個早餐都500-600yen, 很貴, 所以我地只在LAWSON(便利店)買了些面包乾糧當早餐了. 我買的是咖喱豬包, 包裝很可愛, 但食落則普普通通....

之後想在售票機買車票到太宰府, 但搞不懂售票機點用, 還是到售票員買票好了. 我把之前在tourist information處取了的單張交給他, 說要買這票到這裡, 他就賣了一set 1,000yen的太宰府散策套票給我, 內有一張來回火車票及一張下午茶券 (中文的). 我覺得有點貴, 不過一場去旅遊都唔計得咁多.

這程車我搭的是普通的區間車, 車程感覺上距離似尖東到大埔咁(所以1000yen來回其實很貴), 搭了約八個字才到. 到達太宰府, 一張簡單的手繪地圖, 出站後轉個彎就是一條前往太宰府天滿宫的表參道(即通往參拜的道路)了! (簡單講下, 太宰府是一個地方名, 這裡最出名是一個廟,叫天滿宫, 好似黃大仙咁)大道兩旁都是日本古色古香的小店和紀念品店, 真係好有feel! 我同肥肥都勁興奮, 好鐘意果d日本古老和式建築啊!

表參道的盡頭便是天滿宫 有很多很多很多中學生, 好似帶團旅行咁, 好嘈好多人. 但這裡有些日本風情畫先見倒既紅色橋同園林水池, 好靚. 又有一個水池在門外, 不太懂是什麼意義, 只見每一個入廟的人都走到水池用木勺洗手, 我就入鄉隨俗學埋一份喇! 裡面有些祈願牌同祈願紙, 當然要俾錢買啦, 不過我無咩興趣買. 終於明白呢度點解有咁多中學生, 原來天滿宫宮內供奉的是學問之神菅原道真, d學生來這裡祈求考試合格(!!!頂, 計我話留番d時間返屋企溫書好過啦!!), 真係有一班又一班的學生在廟堂裡跪著念經祈福!! 當然也有些就咁添香油拍兩下手祈願的錢箱啦! 我入左1yen許左個願, 嘻嘻, 物輕情意重麻~~

祈過願後, 突然下了一場大雨, 我同肥肥就躲在屋簷下等停雨. 下雨的天滿宫, 又另一番景象. 雨稍為減弱, 我地兜左去廟後面的一個小湖, 有幾間餐廳圍湖而建, 又有落地玻璃, 景色都幾靚, 不過我地還是打算到表參道一間餐廳午膳.

回到表參道. 來到一間我一眼就鐘意的餐廳. 從外面看到餐廳的內部, 和式的榻榻米和落地大窗, 窗外有潺潺流水的日式亭園造景, 好靚啊! 餐廳外有立體膠做的食物sample, 看中了一份好靚的花見套餐(1850yen), 心想既然來到這裡就豪一豪吧!可能過了午飯時間, 店內食客不多, 我地選了窗前榻榻米的位置坐下, 肥肥就點了滑蛋豬扒飯(800yen). 我的套餐先來一杯酒, 加一小杯前菜, 之後就是超靚的套裝, 每樣餸細細碟咁, 唔同顏色, 用唔同的小碟放埋一個大盤內, 好靚好靚, 靚到唔捨得食~~keke~~~~~而滑蛋豬扒飯亦做得不錯.

食完成個餐之後同肥肥再share一杯北海道牛奶軟雪糕, 牛奶味好濃, 好好味!這一餐花費約共3,000yen, 其實不貴.

食完午餐, 我地行番去火車站果度租單車, 套票內有coupon, 寫住300yen租金, 用coupon可減100yen. 點知去到原來加左價到500yen!!用完coupon都要400yen!! 妖, 咁唔update架! 不過橫店都無咩做, 我地都決定租單車踩下....

跟住一個唔on scale的手繪地圖, 踩錯左方向, 兜兜轉轉先去倒果d景點. 踩單車的路線兩旁都係local民房, 一間間屋仔, 街道又乾淨又寧靜, 好舒服, 真係羨慕住o係呢度既人, 佢地既居住質素好好. 這裡所謂的景點是一些沒有人到的寺廟, 一個遊人都無, 好寧靜, 有些種了油菜花的田, 又有些兩旁種了大樹的路, 吸收下自然的空氣, 好C服啊~

因為套票包括一餐下午茶, 而果間餐廳收5:30, 我地踩左兩粒鐘便還車去食下午茶. 到達套票指定的位於表參道的餐廳, 同樣是古典日本風. 下午茶的內容是一件太宰府名物 - 梅枝餅同一杯綠茶. 梅枝餅熱食味道唔錯, 而杯綠茶十分濃郁香甜, 好好飲, 套餐食物絶不馬虎, 讚!

吃過下午茶離開店子, 約6點左右差不多整條參道的店舖都關門了! 我地都打算回去. 到達火車站時, 剛好有一架女學園的校車接載學生到站, 嘩, 成車十幾二十個靚女逐一落車, 個個打扮得同non-no妹, JJ妹一樣, 青春可愛, 真令人眼前一亮! 肥肥直頭目及到眼都唔眨啦!

這次我地搭特急列車回天神, 約20分鐘便到(特急同區間車雖然行駛路線一樣, 但因為唔係站站停, 所以快d) .回到天神西鐵站, 我同肥肥在火車站附近的百貨公司閒逛, 這裡有三越, 大丸, 我地行的是PRASO, 百貨公司真係超多野行, 令我流連忘返!! 不過因為之前唱錢的兌換率太差, 不想買衫, 但行到果d好Kawaii的雜貨, 真係忍唔倒手, d雜貨真係好靚架!!!!! (P.S. 這裡亦找到肥肥最愛的理髮店 - QB House)

行左幾粒鐘, 終於要找吃的唯有離開. 我地決定到24小時營業的一蘭拉面, 步行到位於中洲的分店. 他的門面不算醒目, 要稍為問人才找到. 這間店的九州豬骨拉面是非常出名的, 來到拉面之鄉, 梗係要試下啦!

這間拉面店的模式非常特別, 可以說「在整個銷售及食用過程中, 顧客無需與任何一個人見面或對話!」. 一進店子, 只見一部自動販賣機購買食券(這種模式在日本相當common), 購買食券後, 有一部電子顯示屏會顯示店內那一「格」有空位. (這裡的座位安排好特別, 好似自修室咁, 分左三排, 每排有約10格, 每人一格, 用木板隔開). 入到去空位果格, 枱面已經有一張form (有中文的), 給客人填寫想要的豬骨湯濃度, 面的硬度等等要求, 填好後就在每一間前面的獨立門廉內遞給店員(不會看到店員的樣, 只看到他的手). 等一陣, 店員就會在門廉內遞返碗面俾你!!食完面就自己離開,  過程真係很過隱的!! 我在想這種模式的意義何在? 最可能的是方便d一個人食飯既孤獨人, 或者俾果d毒男or社交困難症的人!!哈哈!!

我點了一碗拉面(670yen, 這裡只提供一款拉面), 追加叉燒同半熟玉子. 叉燒拉面的豬骨湯是我吃過最最最濃郁的, 令人一試難忘!! 但份量略少, 看到很多人把這拉面當宵夜食!! 九洲最盛名的是豬骨拉面, 而這份在九洲拉面內很出名的一蘭拉面, 真是名乎其實. 如果你有機會去九州, 一定要試下啊!

吃飽飽過後, 我地又到處逛逛. 中州一帶是博多最旺的夜生活區. 尤其今天是星期五, 由一蘭拉面步行回酒店的途中, 到處都是酒吧、夜總會, 滿街都是飲到醉醺醺的人, 夜總會的light box 到處都是, 更有不少男PR!! 感覺好糜爛, 好邪惡.....我同肥肥入左一間彈珠店, 其餘同角子機一樣, 不過我地無咩興趣玩, 反而入左間營業到4點的超市逛. 日本所有野都比香港貴, 唯獨一樣野平 - 刺身. 一盒香港賣六十幾蚊的雜錦刺身, 這裡只賣399yen(即HK$35), 很平, 我同肥肥都買了回去當宵夜!

回到酒店, 約一點鐘但四周都好旺, 東橫INN只安排了二樓的房間給我, 雖然不算嘈, 但就沒有view喇, 房間內裡同釜山的相似, 不過好似舊過釜山少少, 但都係訓一晚姐, 而且位置咁方便, 無咩所謂啦~

2010 走進符號的國度 - Busan Day 3

今天早上已收拾好行李check out, 把行李暫存在前台處, 看她一位瘦姐姐一個膊頭同時抬起兩個大背囊真有點不好意思. 在大堂的電腦預約了最後一天的住宿, 搞了好一陣子才知道網上預約不用填會員號碼都可以用會員優惠(奇怪....)

之後出發到東萊, 搭地鐵到東萊站就好了! 原打算出地鐵便步行前往, 可惜找不到任何地圖(包括手上的旅遊書), 最後經熱心的阿珠媽雞同鴨講一輪之下還是搭的士去.

特登來這裡是要食東萊名物婆婆蔥餅. 這裡只有這一間店可以冠以"婆婆"的稱號. 這間店的裝潢都算幾摩登, 走modern Korean路線(是我作的). 待應們都穿著傳統韓服. 唔錯.

這裡消費不便宜, 單一份蔥餅已約HK$100. 所以我地只點了一份小份的, 再加待應推介的韓式米酒. 韓式米酒用了一個砵裝著, 用木勺盛到小杯內飲用, 酒味香醇都算幾好飲. 蔥餅味道不錯, 內有蠔仔夾心, d蛋漿在熟與半熟之間幾好味架!

食飽之後, 我地搭的士到農心酒店旁的露天免費足湯浸腳仔. 這裡的規模類似個公園仔咁, 浸緊腳的人清一色阿珠媽及退休人士. 不過大家都好注重衛生, 會在另一個池沖左腳先浸. 呢度仲有免費坐墊提供, 唔怕整污漕屁屁.

在一班韓國阿珠媽當中, 我同肥肥呢對年輕外國人當然相當另類. 有些阿珠媽想撩我地傾計, 可惜雞同鴨講實在無法溝通, 唯有笑笑口咁啦! 但有件搞笑野發生, 就係浸浸下無啦啦有個阿婆攝o係我同肥肥中間坐, 明明仲有大把位點解係要攝o係我地中間呢? 其他浸緊既阿珠媽都覺得好搞笑, 後面佢都發覺倒了, 哈.

之後去了農心酒店的廁所放低了一堆, 便步行到溫泉場站, 打算搭地鐵到西面站逛逛. 到達西面站, 這裡真係有d似旺角, d舖頭同d人都比較年輕, 呢度有好多整容舖頭, 個外表裝修到好casual, 好似做spa咁. 呢度都有d屋台咁既車仔檔. 我地揀左間外表好young既餐廳, 點了一份好似大鑊飯既野食(10,000won, HK$80), 唔好味的, d面太乾, 這是我地在釜山吃了唯一一餐覺得唔好味既野. 為左唔浪費quota, 我地決定浪費食物出去食過其他野.

最後我地決定回中央洞附近一間食類似部隊鍋的店食面, 一個火鍋形的湯加埋辛拉面落去都唔錯, 仲配埋白飯, 打開盒白飯入面仲有一片午餐肉, 幾過隱呢! 食完在近門口位仲有免費咖啡自助飲, 好貼心啊~

食完呢餐, 便要回酒店取回行李到國際碼頭準備登船. 沒有時間買吃的上船, 只在碼頭買了點零食上船(其實船上都有食物賣). 順便買埋回程的船票. 碼頭這時候擠滿今晚和我們同船的乘客等候出境, 全部都是韓國人or日本人, 眼見只有我地同一個老外. 他們有些是旅行團的, 看來釜山人都幾多以咁既形式過日本玩. 等到7點才會放你入去個出境手續. 過左關之後有些免稅店, 這裡定價是以美金計算的, 視乎你俾咩錢. 之後就上船喇!

我同肥肥都未搭過遊輪, 我地好似大鄉里出城咁上到船樣樣野都覺得好新奇. 船是由日本人經營的, 架船未至於有遊輪咁大, 但都有幾層, 有餐廳, 卡啦OK, 遊戲機, 展望風呂等等. 我同肥肥買的是二人房, 訓上下架床的, 有獨立房間可鎖, 房內有電視, 洗水盤, 枱椅等等, 都幾OK架! 架船上曬客都係8點左右, 但其實架船係要十一點先會開, 咁早要你上船其實因為要配合出入境人員的辦公時間!!(這一點真要向HK人學習下). 不過在船上的時間很易過, 我去左展望風呂洗澡, 又在食物機禁了食物做宵夜(這裡消費是用日元, 所以記得唱定日元) , 回房同肥肥玩大富翁, 還可以看電影(是夜電影係Mummy 3, 不過日語配音, 韓語字幕...-_-"), 真係不亦樂乎!

架船約十一點幾終於開了, 不過居然十分之"浪", 搖到玩不了大富翁!! 所以這時候最好還是滾上床睡覺好了....