貼身膏藥

今個星期日做了肥肥的貼身膏藥, 全日都痴實佢. 他屎忽生瘡了(很大粒, 有一網球咁大size), 做過小手術, 我很細心地幫他清洗傷口換膠布, 只是輕輕掂一下肥肥都會聲嘶力竭地叫痛. 而他說他期待已久的FIFA 2012有些舖頭已偷步推出了, 我便和他一起出旺角找game. 肥肥說他屎忽的瘡很痛, 行步路都跛下跛下咁. 但他仍然要走遍信和找game, 可是很多舖頭都告訴他未出. 之後我地又再去好景, 頭一間舖頭都無賣, 肥肥顯得十分失望, 他立即不斷到討論區找資料, 而我則一個人在好景的game舖逛逛, 俾我搵倒有一間肯偷步出售, 我立即告訴肥肥, 他頓然精神一振, 完 全 忘 記 自 己 屎 忽 生 瘡 的 傷 勢 , 立即以九秒九飛撲去購買 (哈? 不痛了嗎?), 咁當然俾佢買倒啦, 仲有限量版波衫tim, 佢開心到post埋上面書度, 活像小朋友一樣.

之後我帶他到扒王之王食lunch, 位於旺角二樓的扒王, 是鬧市內少有的清靜餐廳, 姑勿論食物的質素, 坐在窗前的卡位看到出面的綠意公園, 好似暫時離開旺角咁. 食過午飯, 便同肥肥到荷理活取他訂造的西裝 (for phuket pre-wedding), 不過間死人野又未搞掂, 又送漏野, 真係白行一趟. 之後我們便搭67X 回屯門了.

回到屯門, 先到日本城買過個新垃圾筒, 之後我說想買電湯煲, 但搵左幾間都要四百幾蚊一個, 唔啱筆直. 之後我便去新墟買餸, 肥肥就去攞眼鏡, 各自回家. 都6點幾, 到街市執平野. 一個人買餸, 回到家肥肥已鎖埋門自己閉關打機, 仲開左三罐啤酒飲tim! 我就一個人又洗又煮, 煮了芫茜魚片湯, 肉碎茄子, 蒸倉魚, 臘鴨脾撈白飯. 煮好曬飯執好曬枱肥肥先斯斯然出來食飯. 食飯時他說他的朋友有可能會上來打機. 所以食飯後我便開始執屋, 肥肥就成隻死豬咁攤在梳化/床上玩iphone, 還說”你 咁 樣 走 來 走 去 左 住 我 打 機 ”, 我真係好嬲呀!!!!!!! 我咁累仲要一個人執屋打掃, 都係想佢d friend上到來唔會失禮人, 佢仲俾說話我聽.

好嬲佢!!!!!!!!!!! 訓覺都唔使佢UM呀!!!!!!!!! >.<

肥爆兩天

同波波去完長州, 帶佢去美容院沖涼, 索性同佢剪埋毛, 清爽迎接烈日! 波波第一次剪毛, 短毛的波波超可愛, 好似BB狗咁, 佢自己可能無咁熱, 成隻狗生猛活力左, 可愛度爆曬燈呀!!


素顏的我....-_-"

夜晚又同肥肥返大陸, 再複卓中發源, 今次再試左d上次食唔倒又好想食既新野 :

(左上) 涼拌棵皮 : 棵皮! 好難形容佢既口感, 口感好似糕狀, 但形狀又切成好似面條咁, d汁好似涼皮咁, 加了很多醋! 我點時以為係小點咁, 點知其實好大碟! 而且第一碟上菜, 唔覺食多了頂住個胃.
(右上) 上湯浸豆苗 : 肉吃多了點個菜, 呢個餸無咩特別, 只係估唔到新疆菜餐廳做粵菜都幾好味喎!
(左下) 牛肉拌面 : 必點之一! 真係想日日都食佢呀!
(右下) 青海一家親 : 聽說是得獎菜色, 超大碟!! 用鐵板熱辣辣上, 有煎得好香的土豆, 粟米放底, 上個很多羊肉(是肋肉呢, 啖啖肉很嫰), 再有薄餅放面, 好好味好香口啊! 但份量真是太多了真的吃不下, 打包回家明天吃, 可是明天吃是番叮便很羶了.....所以最好就一次過食曬啦!

食飽飽就去返碧水附近買DVD, 之後再去碧水馬沙池! 今晚碧水超多人啊, 有點似之前的太平洋!! 雖然我覺得碧水的C/P值一向很高(仲有宵夜免費任食, 宵夜唔少野架, 又有粉絲蒸扇貝又有雞全翼), $218的120分鐘全身香薰推油加火山石加全身磨沙, 再送大堂項目, 超抵, 不過人多自然服務得無咁周到, 例如更衣室D衫執唔切, 美容部無房要上五樓中式房做, 所以D火山石上到黎都凍曬....做完大堂又無位坐, 搞到要在吸煙區等肥肥......所以呢, 下次都係揼完先食好D!

星期日, 外面天氣很好, 陽光非常猛烈, 楊她們選擇同陽光玩遊戲, 而我同肥肥就選擇留在家裡開冷氣睇DVD, 仲食埋好好味既Rocky Road雪糕, 想唔肥爆都幾難!

hssc babies gathering

今天又到了孖精家聚會, 有這個地方多好, 她的家又乾淨整齊, 可以慢慢傾計. (我的家又遠又有狗又污漕, 我都不敢邀請她們, 尤其是要保持高度衛生的kaka&CBB啦). 先在十勝豚丼吃過飯, 再上孖精家. CBB今天都係一樣咁好精神啊, 周圍抓然後塞落口, 又不停噴口水, 我俾佢係咁抓塊面.....-_-"

勁似kaka老公 - 一副寸樣

同佢地傾計真係開心, 說東說西又一個下午. 一班女仔對美容話題就停唔倒口係咁雞啄唔斷了!晚上回家前先到一田逛一逛, 又忍唔住買了些靚野回家做晚餐......keke......次次去一田都忍唔住的...是日晚餐 :

(左) 18個月pama ham 配水牛芝士 : 剛好見倒一田的肉櫃有風乾火腿賣, 18個月$60/100g, 不是太貴買了50g嚐嚐, 不錯啊, 下次會試24個月的, 會再咸些. 賣肉的說這火腿配較啖味的水牛芝士就夾, 確實不錯呢!

(右) US Prime sirloin. 這小小一片要八十多元呢! 買了一片同肥肥一人一半好了. 西冷的脂肪分佈平均, 肉味較濃, 是我最喜歡牛的部分. 靚扒不用醃呢, 把鑊燒熱(係要勁熱), 每邊大火煎分半鐘(7成熟, 下次煎1分鐘便剛好是medium了), 不用落油, 上碟時加少許海鹽上面就夠味了, 好正啊~

肥肥再弄了三文治, 另外做了生菜沙律, 簡易西餐很快完成了~Bon Appetit!

開心周五六

星期五晚約左孖精陪佢試婚紗, 孖精細妹都一齊, 原來大家都係plan緊結婚.同孖精分享左好多結婚野, 畢竟同其他bride-to-be傾大家會知得多D, 孖精好犀利搵倒好多有關結婚既平靚正野{百利純美新娘}, 佢果間婚紗店好平又靚, 只係$2380/4件衫, 而且D款仲要唔差喎! 不過佢D款都係閃令令的衫為主, 而我只係lunch wedding, 無stage無射燈, 好似唔適合著D閃令令既衫喎, 好做show feel. 而且自私地覺得呢間d靚衫都俾孖精揀左, 無理由同佢撞衫架, 所以未必會揀佢. 不過佢有媽咪衫同潮掛, 都可以諗下.

星期六同肥肥返大陸玩, 屯門返大陸真係又快又平, 近過出九龍. 坐小巴去落馬州, 再搭5蚊的士去落馬州火車站, 步行過橋就過倒大陸, 再行10分鐘就到水圍村的碧水雲天. 今次去到碧水, 一定要試美容部的火山石(上次覺得貴無試, 心郁左好耐), $218/120mins的全身香薰推油+火山石推背+全身磨沙, 做完之後勁舒服, d皮膚又滑溜溜, 不過係美容房無得沖涼要落番1樓沖麻煩D. 仲送1個大堂項目, 做左個腳底, 好撚C服啊~

做完曬差唔多9點半, 立即飛的去肥肥介紹的新疆菜度食. 點知上左架唔識路既的士浪費曬D時間, 去到間餐廳已經得番我地一枱客喇....間野都幾大坐得幾舒服, 隨便揀左幾樣餸食....



手抓羊肉 $38/一人份



手抓羊肉38蚊得兩舊, 有點貴. 不過D羊好滑唔羶, 一啖羊肉配一口熱湯, 非常好味.



新疆拌面



我同肥肥都好鐘意呢個拌面, D面好煙un好Q, 個拌面好多汁, 我忍唔住一吃再吃, 都係非常推介.

之後再點了羊肉串, 新彊大拌菜(好似意式沙律咁), 仲有土豆燒牛肉(這個因為用了牛展, 麻麻地).




羊肉串

新彊大拌菜

 

土豆燒牛肉

這裡還有好多菜式看起來不錯, 下次一定會返黎再食其他野!

中發源清真餐廳

新州店-深圳市福田區濱河大道新州酒店一二層

電話: 0755-83305102

忟憎的瑣事

適逢糧尾(才23號ja....還有8天...), 減少外出活動, 又要減肥兼儲錢, 自我纖滅一切有關洗錢同飲食有關的念頭. 又唔想係咁諗住結婚的事, 搞到我百無了賴, 一個星期天的下午就躺在床上任由時間流逝.

星期六應承左肥肥阿媽煮自家泰國菜俾佢食. 星期六的下午就同肥肥出新墟街市買食材. 原來新墟街市內有一間泰國人開的雜貨店. 同佢講要整冬陰公, 佢即刻幫你執曬d香料(內有香芧、 南薑、檸檬葉、辣椒、冬陰公醬), 仲有一枝調好左的生蝦刺身汁, 除左可以用來做刺身的汁外, 仲可以整泰式鳳爪, 唔使自己慢慢調, 快靚正! 街市對開的凍肉舖已經有一包刺身蝦($35/20隻), 返屋企用凍滾水沖下再點d汁就食得, 勁易整又抵食, 真係「沒有失敗的理由」! 哈哈!

回家又係我一個人煮, 肥肥躺在床上等食. 我其實幾鐘意煮野食. 因為我成日好多野諗, 集中力好低, 個人又好急躁, 煮野食可以俾我集中精神, 個腦淨係諗眼前的食物, 整邊樣先, 洗邊樣先, 一步一步, 在廚房搞呢搞路好快兩三粒鐘. 不過煮野食最大的挑戰係臨門一腳, 好似我個冬陰公湯咁, 貪心地落左三湯碗的水(我估其實係落三飯碗的水就OK), 成煲野就稀曬lu......

泰國之夜另外仲整左一碟香芧焗烏頭. 原意想做明爐炭燒的感覺, 點知出來完全不是這回事, 但係錯有錯著, d肉極之滑又鮮甜.不過d香茅唔夠入味, 下次要改進下先....

肥肥阿媽過黎食飯佢好開心呀, 如果我阿媽唔係咁貪錢佢其實都好好. 食完飯佢又講退休之後去做洗碗. 唉肥肥一家都唔知係咪有「先天性自我矮化症」, 其實佢自己都明知講出黎自己都唔會去做, 但又要講, 為咩呀? 咪就係要聽既人緊張佢, 關心佢咁law (即係好似BB仔扭計扮喊但係無眼淚咁law)....

星期日一起身就落雨, 勁頹廢. 俾我在垃圾桶發現肥肥昨晚又飲酒的證據. 兩日前佢先應承我唔飲酒, 仲用我條命迫佢發毒誓, 兩日後又再飲過. 無得救. 等日佢老婆仔女死燃曬佢都唔識改過.上天唔應該對佢呢d人咁好. 唔應該俾呢d人有工做有屋住有老婆有車渣有好野食有人錫, 呢d人連咁簡單既自我紀律都做唔倒, 社會上有更多更克苦更堅毅的人都未能得到溫飽. 呢個社會就係咁唔公平.

下午無野做等時間過. 波波一而再咁在門口及廚房痾屎痾尿. 我真係好鬼忟. 一間屋有兩個人令我咁忟憎. 佢地兩個咁樣激我真係有諗過唔要波波同肥肥!!!!!! 唉我個人咁無耐性, 將來點生仔呢?
P.S. 夜晚屋企突然出現好多飛蟻, 屯門公路爆水管搞到全天都無廁所水用, 好忟憎呀!!!!!!!!

生活

星期五要回大埔交家用, 同肥肥一齊回去了, 媽打不斷狂鬧我用D錢去日本旅行都唔結婚, 我決定用"逃避" 同 "充耳不聞" 既態度去面對佢, 同面對呢件有關結婚既事. 說真的, 我都唔知點樣去面對呢件事. 一面覺得不值得花咁多錢去做一場show,有錢自己使左佢唔好? 但就咁簽個字又唔甘心, 好想著靚靚婚紗影靚靚相有一場浪漫的婚禮親友的祝福啊....講真如果我有幾百萬我唔介意(好樂意)去做一場大龍鳳, 但肥肥根本無錢, 係一個仙都無果隻, 由零開始, 我寧願唔開始.

想不通. 唯有繼續"逃避" 同 "充耳不聞", 直到想通為止吧...下星期肥肥阿媽回來了, 四大長老夾攻, 唔好迫我呀, 我唔想聽倒任何問我幾時結婚或者係責怪我用曬D錢唔結婚既說話, 我唔想行最後一步(即係賣樓分錢搬回家), 唔好迫我......我唔明個女同人同居對於佢黎講有幾大幾嚴重, 覺得好醜嗎? 覺得好難堪嗎? 如果係騙個故事說個女同朋友一齊住都可以呀.

星期六日, 沒有約任何人, 沒有計劃, 連facial都唔使做. 很好. 很喜歡這樣. 在家裡呆著. 上上網, 看看download回來的電影, 呆呆的望窗. 唔使化妝, 唔使social. 好好.

同肥肥去ESSO入油時發現自己的積分夠免費換一包8公斤金象米, 所以貪平換了一包. 想真點八公斤真係唔知幾時先食得曬 (過年前才啱啱買左包5公斤米), 加上我家的米缸只夠容納6公斤米....所以要多D煮飯開始銷米大行動先得!! 今日就做了好好味的臘鴨脾菜飯, 加埋肥肥好鐘意既西芹雞柳, 蒸了一條倉魚, 簡簡單單又一餐.唔錯.

年初一至四

好! 記錄一下年初一至年初四的事, 忙到好似無休息過咁......

年初一, 第一次派利是俾樓下的看更, 感覺自己好似大人咁. 一早回到大埔拜年, 老豆俾左封大利是我, 真係開心. 之後同肥肥返上水爺爺度食盆菜, D盆菜年年都係一樣無咩新意, 不過旋風式掃一輪利是都幾開心.

年初二, 又係一早出發去肥肥的舅父開的餐廳度食下團年飯先. 相比起我地姓崔一家, 肥肥屋企斯文得多. 飯局中肥肥兩個最有錢的舅父互相吹噓......我猜肥肥一家移民美國, 或者都係同親戚比較的其中一項吧! 肥肥舅父開的餐廳看起來都不錯啊, 心裡想可不可借用作為我同肥肥結婚的cocktail party呢? 要等肥肥媽媽返香港再問吧.....

年初三, 超累透的一天. 崔仲賀同老豆媽打, 仲有婆婆公公一齊過黎我度食我整的午飯. 媽打驚我整唔掂早少少過黎目及住我整......我超犀利, 整左7碟餸, 蠔豉炆冬菇, 又自己蒸雞切雞, 蒸魚, 蒸水蛋, 煎開邊蝦, 仲有腰果, 不過俾我焗到焦曬, 最後都係買即食腰果搞掂, 早知一早就買即食食, sign左我30蚊......
食完洗好曬碗都4點幾, 肥肥d friend失驚無神又話要黎, 搞到我得登又要撲出去市廣場買餸, 返黎又要洗切, 好彩黑仔一家帶埋賓賓黎幫手, 有賓賓實在太好, 食完飯un un腳唔洗洗碗就得. 今次黑仔帶埋心心同老婆黎, 佢老婆都無咩點, 普通女人一個, 不過今次多野講左, 我個人同D表面人講表面野都ok既, 傾倒兩嘴. 佢個女"心心"都幾得意, 係咁攞個公仔俾我, 自己攞番, 不停轉來轉去, 好似波波咁, 佢都算OK肯同我玩, 不過佢一接近肥肥就扁曬嘴想喊咁, 我估都係因為肥肥個樣似怪獸怕左佢law, 佢都係無咩細路仔緣.

年初四, 今日去法國醫院探剛生產的超人kaka, 無錯呀, 佢個8磅巨B年初二出世了. 我地4個梗係立即去探佢啦(咁啱4個都得閒, 平時要約見面都要排期一個月). kaka形容生BB的痛的程度係"地獄"咁痛!!(平時kaka都好tough架麻!!)真係俾佢嚇親搞到我都唔想生啊!!聽完個過程之後我覺得天下間所有媽媽都係超人啊! 不過學佢話齋, 其實生仔果下都已經騎虎難下.....(計我話由懷孕起已經騎虎難下了)....kaka老公幫個仔起左個足球員名字(佢老公姓"施", 不妨估下) -_-" 私家醫院D服務都算係咁, 我也可以隔住玻璃睇BB, 佢都幾可愛架, 不過真係好大隻!!佢身長有5Xcm長, 真係唔明咁大隻點室落個肚度架....

2日大的CBB

之後出尖咀去the One睇我愛香港開心萬歲(個名好爛), 同楊黃去別府食野, 楊諗住同ryan到屯門買樓, 期待佢地都係為Tuenmunian(屯門人), 哈哈. 套戲真係夠曬無喱頭, 無無聊聊笑一餐都幾好既. 我第一次行the one, 好多日本牌子的店, 其實shopping都唔使去日本啦, 香港咩都有lu.

諗起生仔, 生番個下一代都幾好(當然唔係依家啦!!), 但係見倒肥肥果副德性真係有D灰心, 無論我對佢講幾多次都無用, 叫左佢唔好飲酒, 之前又話肝酵數過高入院, 戒左兩三個月之後依家又回復以往飲好多酒食好多煙.....打佢駡佢都叫唔聽, 諗起自己下半世要對住呢個人, 真係有D灰心.....lala話呢D係我自己揀既無辦法....唉......

沒休息的休息天

返新工後第一次攞假(5個月了!), 卻仍是繁忙的一天....
一早8點半家務助理便來了大掃除, 花了4小時把家裡我從來都懶得清潔的地方清得乾乾淨淨, $85/小時都花得很值得!!
準時1時到達位於尖沙咀的MUSEE PLATIUM做脫毛咨詢，起初很怕因為我皮膚黑唔俾我做，原來只要腋下唔曬陽就ｏｋ，＄５５５join了腋下完了療程，無限次彩光脫腋毛，佢一Ｄ都無Hard Sell我其他野，很好，只可惜ｂｏｏｋｉｎｇ要到４月先開始第一次treatment, 等到頸都長了.....
之後去左海港城的阿曼尼配番我支粉底(頂, 個幾月就用曬!), 又被sell買了枝唇膏, 佢新的春天眼影(藍色smoky eyes)好靚, 但一定要忍手, 如果唔係次次去親都洗成千蚊真係唔得掂......要立即離開呢個死亡之地.....

被sell了敗入的唇膏, 有logo很虛榮的

再衝去搵Alex飛番個髮, 飛完大約4點半, 去starbrucks飲杯咖啡舒緩下先, 再過美甲店做埋個gel nail, 搞掂曬差不多8點先返去, 楊同Iris又話要來睇非死不可.....搞下搞下又一點喇......

坐在Starbucks時, 難得地靜一靜, 停一停. 想起小時候花一點錢都好像很珍貴的, 心想對方最好慢一點, 好讓我的錢花得值得一點(很怪的思想吧!), 現在個心真係停唔倒, 咩都好想快d, 有效率D, 樣樣野都想衝衝衝, 就好似今日幫我洗頭的人咁, 慢慢按,慢慢洗, 我個心簡直好似挑倒條根咁, 係咁衝衝衝, 我根本完全都不在放假狀態, 我想自己應該是拉得太緊吧!......是時候放慢腳步.......由先接受其他人慢動作開始吧!

A Night with Wind

尋晚肥肥同廚神上左大陸揼骨, 我以為佢會三點左右返黎, 點知佢到今朝都無返.
我一個人訓, 訓到凌晨6點時突然醒左.
房出面好似有d聲.
我起左身, 出左房睇下係咪肥肥返左黎, 點知一個人都無.
可能係大風…即刻返返房訓覺…肥肥, 你快d返啦…

write something

一段時間沒有寫日記. 好放縱自己. 今日要迫自己寫點什麼.

上星期五去左睇草猛演唱會, 山頂的位置, 好多首歌都未聽過. 不過好開心. 開心不只是很high的演唱會, 而是很久沒和肥肥出尖咀, 很開心拍拖的感覺.

星期六整天忙著在屋企搞衛生, 肥肥一直在床睡覺, 我非常看不過眼. 很討厭他咁懶的性格. 晚上同肥肥同阿業阿欣一齊落元朗打邊爐, 好多人在街邊打邊爐, 很有feel, 而且個麻辣鍋都好好味. 同阿業阿欣傾落計覺得佢地都幾啱傾, 唔似黑仔同佢老婆, 我估我下次都唔會抗拒同佢地出黎gathering.

星期日下午先出尖咀試Joanna的姊妹裙, 依家咁肥都要做姊妹我真係覺得自己好不要臉. 試衫揀衫我一點勁都沒有, 只想快d解決件事. 好在我地第一批入去試衫, 間舖好快就迫滿人. 結婚要係好煩, 又要使好多錢.

之後我地去左加連威老道間蟹店買大閘蟹, 然後回家準備crab gathering. 好開心今日好齊人(除左肥肥), 我為這個gathering出錢出力, 但其實我好開心. 我好開心可以提供倒一個地方, 環境去集合新姑婆, 我好喜歡我地既聚會, 所以我一d都無所謂. 依家大個左啦, 大家帶自己既另一半來都可以相處得好好, 但係肥肥到依家都仲係好小家, 唔願意同我d friend一齊.

我都無能力改變呢個人, 同佢講野都係side氣.

老了嗎?

星期五, 廚神夫婦+肥威來了我們家. 一齊鐵板燒. 鱔, 花竹蝦, 牛柳粒十分美味. 不過飽餐過後, 清洗工作很累.

星期六, 跑出又一城學化妝班. 預繳了一百大元, 化了一個妝, 可以換番產品. 不過一百元在這名店內不能買任何產品, 結果, 買了六百元, 包括一枝$350的化妝掃, 真係鬼遮眼。趕回家準備girls gathering, 姑團加Iris+Ryan似乎是新的組合. 特意一早把帶子刺身解凍，又用埋剩餘的醉雞汁做醉雞翼。小公主把Haru帶來, 我解釋俾佢知我新居被禁事件要佢屈就Haru實不好意思. 晚上還有Mr.hk做餘興節目真開心.

星期日同廚神夫婦入貝澳摸蜆, 同場加映娜姐及羅仲謙, 羅仲謙童顏巨乳真係名不虛傳, 目及到姐姐好開心. 趕到入貝澳, 落水一小時, 得一只蜆. 不過都係基哥犀利, 有佢喺度, 我同肥肥又有成桶蜆攞走lu.基哥一家真係好好人, 肯為飲醉的肥肥渣車到屯門.

一連三天的活動, 很累, 是老了嗎? 以往初初同肥肥拍拖時，常常責怪他怎麼老是要留在屋企休息，現在的我就經常想留在家裡休息，我想不是我老了，可能是因為我有一個舒服的家。
同場加映，星期一晚餐。(p.s.切辣椒時不慎途手切, 搞到隻手沾有辣氣, 除con及帶con時極拿眼, so hurt!!)

油鹽水煮蜆

XL帶子刺身

口不擇言

星期六入左鴨脷洲, 無錯, 係鴨脷洲, 香港島的最南端.

遠到離曬譜的鴨脷洲。
我同肥肥由屯門4B區搭960出發, 再由時代廣場轉60蚊的士才到。
地理上, 可能同返橫崗差唔多.

Tuenmunian (屯門人)難得大鄉里出城. 特登去了灣仔的Flying Pan食English Breakfast. 第一次黎灣仔店, 這裡比中環店大d, 不過好似缺少左小店特色. 而一樣的是, 都係咁多鬼佬.
今次我專程想吃Egg Benedict. 因為之前在研究蛋食譜時想做, 但未食過真正的Egg Benedict 都唔知自己做得啱唔啱.

其實是poached egg (水煮蛋)放在muffin上, 再加兩片煙肉同菠菜, final在上面淋些荷蘭醬上面. 食落都幾好味, 不過就好"呢咁hea", 因為吉穿隻蛋後d蛋汁漏曬出黎, 都唔知用手食(好似漢堡包咁)定係用刀叉食先啱. 真係大鄉里出城。無辦法啦，可能我這輩子都去唔倒歐洲。

食完之後去時代廣場會合廚神佢地一齊搭的士去鴨脷洲的一間工業大廈內, 我地今日既目的係試酒. 因為呢度有一間全港唯一的釀酒廠, 佢地由外國入口d急凍葡萄, 黎到香港進行發酵過程. 個接待處好有酒莊feel, 一桶桶紅酒圍住一張長枱, 好似古堡地牢咁, 幾正. 一人六十蚊, 飲左四五杯紅酒. d酒麻麻地, 但可以試四隻酒都算係咁啦~

席間Debbie問我地今晚食咩, 其實我一早唔想同佢地食, 因為唔想好表面咁social(其實我同佢之間根本傾唔埋, 只係肥肥同廚神fd我先搭單一齊去). 不過佢話食生蠔好唔好. 我梗係想啦. 我想食生蠔好耐. 於是點頭答應. 但後來真係有d後悔, 早知一早推佢啦!

但佢介紹的餐廳在openrice裡有寫, d生蠔賣相好靚, 佢地又讚d蟹好得, 但價錢如果要食得飽就每人要400落樓. 大佬呀, 400蚊喎, 我一日只可以使100渣, 超標4倍梗係唔掂啦. 佢睇倒我係咁話貴, 又推介食扒, 但果間扒房落樓又要300幾. Debbie見我一再推辭，就話「係咪真係咁窮呀?」，聽起來真係十分「梗」耳。可能言者無心，但聽者有意。真係口不擇言，我窮都有志氣呀，無咁大個頭唔會帶咁大頂帽既，我都話唔去啦，你又何必咄咄逼人呢?

最後我地同佢班fd一行十六人去銅鑼灣食橋底辣蟹，一人$178落樓，雖然同佢班fd無個識，但食橋底辣蟹一定要咁多人食先划算。橋底辣蟹好好味。這一餐social飯吃後特別累，吃後甜品都唔去食，立即回家同肥肥躲在蝸居內更好。

最近我的意志磨滅得體無完膚。在前往橋底辣蟹前，我地又逛逛鴨脷洲的outlet，一橦工廠大廈裡有Joyce, Lane Crawford的outlet, 亦有些家品店，可是價錢一點也不「outlet」，我懷疑呢度係專為赤柱呀等南區富豪而設，之後我地再搭shuttle到海怡轉的士，海景單位索價600幾萬，那一刻我想，有些東西可能是我一世都沒有的。

以前在剛畢業的時候，雄心壯志，覺得自己兩三年或數年後，會是「senior」，或者月入幾萬的中產(or小資)人，覺得自己什麼都總會有能力做得到，現在呢，覺得自己是急流裡的小石，水流不斷衝，而我還成舊石咁呆下呆下。

磨蹭

"與其在這裡磨蹭, 不如實際點.
既然反轉豬肚都吃過了, 還怕什麼?"

很想把這句發表在面書裡, 天啊!但我就連一點點勇氣都沒有.
發愁的日子, 厭倦和討厭的面孔, 每天有最少面對10小時.
以往的我, 在年少氣盛的日子, 老早走了.

現在負上百萬的債,要走談何容易?
叫自己每天都花點時間去看看人力市場,
奈何總是沒有回覆.現在的我沒可能再找fresh grad的工作(雖然可能人工還比我現在要高),
所以無得魚翁撒網, 回覆率暫時是-零.
唉.沒辦法.再努力點吧!

最近覺得好沮喪. 因為太多野想要.但我的工資連cover基本生活都成問題.
為這樣的日子,我哭過好幾回. 人工扣除應付債務後,只夠三千元for每天生活.
沒錢儲蓄也沒錢花.什麼都做不了. 個人好似動彈不得咁.
這3000蚊好似鹽水咁. 每天一百, 夠你搭車返工, 夠你食個茶餐廳做午餐, 或許也可叫個炒粉面外賣做晚餐.

餓你唔死, 卻休想快活.

已花了很多錢在屋子裡, 但有三分一還未完成:
1. 廚櫃沒有,碗碟快沒地方放
2. 書桌沒有.經常在扒在床上用電腦搞到頸梗膀痛.
3. 化妝桌沒有,化妝品散落窗台.
4. 鏡子沒有, 很久沒見過自己個樣.
5. 鞋櫃沒有, 鞋散落一地.

最近看了關於做夢的電影.我有時都被夢擾亂了.
試過發夢夢見我和那臭四冰釋前嫌, 但現實當然無啦.
有次發夢我去了巴黎, 是真的, 有一刻我真係以為自己去過.
我的腦海裡怎麼都是巴黎街道的記憶? 怎麼我好像已住過巴黎的apartment?
怎麼我好像知道apartment樓下的market是怎樣的? 去metro的路都似曾相識?
(其實都怪google map的street view吧)

我真十分不甘心去放棄我的歐洲之旅.
我真的很想很想很想去.
前陣子不欲打開自己bookmark了的巴黎旅遊網誌,
現在又無意中看到其他網誌介紹巴黎,
同肥肥分享時, 個心真係好酸.

我一定 一定要再去.

酷熱的周未

星期五臨落班接到黃的電話, 要到我屋企睇波, 我梗係歡迎啦. 立即約埋楊, 楊又叫埋Ryan, 我一放工就即刻去旺角買左個氣泵, 再衝返屋企, 同楊差不多時間到達屯門. 之後一齊食泰國菜, 便回家睇波. 黃亦差唔多時候來到.這晚我地四個, 見證著巴西出局, 黃同我一齊訓床, 楊同Ryan就訓吹氣床墊.

第二天黃一早便走了去教琴, 我call埋肥肥, 車我地去黃金海岸食lunch兼游水水, 個太陽熱到癲, 一把太陽傘真係好C服~不過d水好污漕, 好多垃圾, 搞到我地都無咩mood游水, 大部份時間都係坐坐攤攤. 這樣又hea過一個下午.

晚上打算同肥肥試下個BBQ爐, 準備邊食邊睇波. 楊同Ryan繼續留守, 仲call埋Iris, 阿Pat又話要黎捧阿根廷, 加埋肥肥個fd阿忠, 總共有7人在我400呎的家內睇波, 真係好熱鬧呢! 因為怕個BBQ爐燒到d地毯吸味, 索性在廚房燒, 我就負責不斷為大家燒野食喇. 12點幾連黃都黎埋, 好多人過夜啊~

第二朝等埋老豆過黎, 一齊落左虹橋飲茶. 飲完茶佢地就返大埔, 而我同肥肥同老豆就返屋企鑽野. 不過其實先睇左阿凡達既藍光碟先, 老豆在大陸買的, 真係犀利. 鑽完幾個洞後, 又8點了, 老豆返屋企, 我同肥肥在惠康買d野, 靜靜地煲個湯, 過了安靜的晚上.

又是很忙的周未

星期六終於到ikea買傢俬. 由三月起一直行, 由新season到減價都未有出手, 今次終於要出動. 我同肥肥渣車到沙田Ikea, 唉, 沙田呢d中產地方, 好彩我地架車都不失霸氣....keke...(虛榮again...)

三點幾去到, 一路行呀行, 買呀買, 買到成架車仔滿曬! 除左d雜項東東, 大型傢俱仲有CD櫃同電視櫃, 仲有一張900大元的地毯.....買既時候真係好掙扎, 因為呢樣野可有可無...但係諗倒真係好襯我屋企, 都係買左! 行到夜晚9點, 終於埋單, 除左個電視櫃要第二天到上水取貨, 其他都一車過車返新居, 省回200蚊送貨費~

返到屋企, 拿拿臨砌埋個CD櫃, 好易砌姐, 唔使一粒鐘搞掂! 之後搞我部電腦上網, 搞左勁耐, 搞到凌晨5點半天光先搞得掂!!!!! 嘩, 超累.....

第二天唔好以為可以休息, 原來一早應承左廚神入貝澳BBQ, 佢地真係"風雨不改", 即使黃雨都照燒!! 咁唯有去左上水攞電視櫃, 又再車埋窗簾, 再搭巴士入貝澳啦.....今次地點在廚神親戚的屋企天台, 有瓦遮頭唔怕雨, 又有羊脾, 配埋清酒,唔錯唔錯. 不過今晚大家都要返屋企睇波, 所以九點就閃人.

搭番E車入屯門, 英格蘭對德國已開始了, 在市廣場睇左半場先返屋企再睇. 等肥肥睇曬全場返黎再一齊砌埋個電視櫃, 諗住又係一個鐘內搞掂....點知整左超耐....整到阿根廷開波都未搞完, 肥肥一見倒阿根廷開波就痴左線, 完全focus唔倒, 阿根廷掂下個波佢都激動到喊咁濟....我好討厭佢咁大個人仲好似細路咁, 好心佢就快快手一齊搞掂個櫃先睇啦.....到最後又搞到差唔多四點先訓, 超嬲肥肥, 所以索性趕佢出廳訓....第二朝又要8點起身返屋.....就離死掉.....

今日再買埋個鑊, 等到夜晚夠鐘就燒埋d衣紙, 點知居然計錯時間早左一個鐘燒...唉....不過我估都係一樣姐.....(汗-_-")

依家個廳放左d傢俬後好靚啊, 我同肥肥成日都好開心咁欣賞自己間屋, 好多人都放十幾萬去裝修間屋, 我地只係花幾萬蚊, 一樣咁靚, 好開心~

升格

這個周末我同肥肥就渣這架車兜風~

嘻嘻.....Mercedes Benz 麻......虛榮死了~

歐洲車嘛, 馬力真係唔同d, 起步果下真係好爽....連我呢個唔識渣車既乘客, 都好想鏈番轉....

我(港女上身)要向肥肥說: 以後無Benz接我唔駛旨意同我出街, 呵呵呵~~~

累透的生活

最近都在過累透的生活.

新屋的事....其實根本沒必要每周看幾回, 但硬係要上去望下望下, 自己又沒有建樹, 間屋望來望去的裝修進度都係停濟不前, 有點自找煩惱之嫌. 間裝修公司成日唔開工, 雖然講到明6月15日交貨, 所以依家佢唔郁我又吹佢唔帳.....成日都諗買咩傢私, 諗左個幾月都未買, 每天都在想想想, 好累.

小氣鬼的事, 搞到我工作上毫無衝勁, 成日都要諗住點樣防佢, 幾時幾時又會踩親佢條尾之類. 不過最近發現諗都多餘, 因為你唔去踩人, 人地都會主動踩你.
很想很想快點辭工. 快點快點搵工. 但每天實在太累, 累得連打開電腦的力氣都沒有,

身體都不聽話. 體重又響警號. 已經升番121了. 還要偷懶到幾時?
面上的瘡瘡不像樣, facial很久沒做了, 眉也沒修....夠了夠了...要累到幾時?

北上逛宜家

終於補番張回鄉証,可以返大陸.星期六去左南山區的宜家逛逛,由深圳灣過去亦好快, 南山區d街道好闊落好乾淨,同羅湖相差很遠. 搭免費接駁去到宜家,果度感覺好似外國d warehouse咁,好大好舒服. 細心留意會發現有d產品平過香港好多(例如有一套沙發HK賣五千幾,深圳Ikea只賣三千幾,換番HKD轉運落HK都有賺).

佢個自助取貨區好似d倉庫咁, 好大.

行到差唔多八點, 過左對面迪卡濃運動用品店行, 肥肥好興奮,而我就一般. 約八點半離開, 剛剛在Earth Hour時上車, 估唔到大陸都有響應.條街d building都黑曬.可能南山區d人都特別有文化.

搭40蚊的士去到海上世界, 去番最鐘意既清學鐡板燒, 150人仔任食, 又可以坐吧台位欣賞師傅席前表演. 人又唔多唔使迫迫夾夾, 食得好舒服. 食到十一點先私私然咁走人....

搭的士返深圳灣口岸, 個的士佬呃我地深圳灣收十一點, 好彩我地唔信佢堅持要去, 原來收十二點, 哼!想呃多我地幾十蚊無咁易! 出到關搭B2直達藍地, 唔使一粒鐘返到屋企, 爽!

小Lucky

三月二十日, 有4個小Lucky.

1. 太喜愛傷心酸辣粉, 星期四才剛吃過, 星期六又忍唔住去旺角再食過. 星期四的口水雞沽清了, 這次終於食倒, 正! 在香港花幾十蚊可以食倒咁正宗既四川菜, 實在太開心! 一解我無回鄉証返唔倒大陸之苦....(仍然好掛住絕味鴨脖子)

這裡的麻辣豬耳也做得不錯, 幾爽口.

2. 去左尖沙咀的喜來登physical做每月一次的免費facial, 今次果位姐姐做得我好舒服啊, 唔似得沙田果位咁hea, 今次幫我針清得好仔細, 而且做足一個鐘, 唔知係成個physical好左(應該唔係), 定係我今次好彩呢~呵

3. 一個人行街街, 行到去新太陽的Anges b Delices, 入去運下吉搞下人地個復活蛋, 個店員竟然攞左粒"b"字朱古力俾我免費試食喎, 嘩, 成十幾蚊一粒架! 真係覺得好抵呀!!!! 講真, 我又點會花十幾蚊買一粒朱古力呢......

4. 新太陽的b+ab做三折大減價, 都是一d過季衫, 啱曬我想買衫去歐洲之旅, keke,買左四樣野都係五百幾蚊, 抵呀~

肥肥笑我係師奶仔, 我就覺得呢d小lucky都幾好呢.....

近況Update

最近真係十萬樣野忙, 突如期來買房子的事, 揀樓、 成交,、地產簽約、估價、申請按揭、律師樓簽約等等, 很多很多事要忙, 而且實在做起來不是我以前想像中那麼愉快(以前都會幻想自己將來的居所會點點點點), 尤其要同99交涉是十萬個難頂, 真想快點完事不用再對住佢 (會嗎?)

幸好肥肥幫手搞呢樣搞果樣, 真係幫輕左好多, 起碼有些事要辦公時間做的他都可以幫忙....而且按揭已批, 下一步便要搞新屋裝修的事, 可以自己決定傢私擺放、牆身顏色、地磚款式等等, 切切實實的實現以往在行IKEA的幻想, 確是很興奮的說! (至少現在還是很興奮)

新居的事確實耽誤了我做歐遊之旅的行程計劃, 而且歐遊之旅比以往的東南亞自由行更加複雜! 要同時兼顧球賽、美食、景點、攝影得各種主題, 加上銀根又緊拙, 真係plan到頭都爆呢! 關於planning的事有少少tools想share, 另一篇再詳述~

下星期日係肥肥生日了, 因為要留備資金, 所以只好節省點過. 或者我會下廚煮番幾味吧~唔知呢~~