開心周五六

星期五晚約左孖精陪佢試婚紗, 孖精細妹都一齊, 原來大家都係plan緊結婚.同孖精分享左好多結婚野, 畢竟同其他bride-to-be傾大家會知得多D, 孖精好犀利搵倒好多有關結婚既平靚正野{百利純美新娘}, 佢果間婚紗店好平又靚, 只係$2380/4件衫, 而且D款仲要唔差喎! 不過佢D款都係閃令令的衫為主, 而我只係lunch wedding, 無stage無射燈, 好似唔適合著D閃令令既衫喎, 好做show feel. 而且自私地覺得呢間d靚衫都俾孖精揀左, 無理由同佢撞衫架, 所以未必會揀佢. 不過佢有媽咪衫同潮掛, 都可以諗下.

星期六同肥肥返大陸玩, 屯門返大陸真係又快又平, 近過出九龍. 坐小巴去落馬州, 再搭5蚊的士去落馬州火車站, 步行過橋就過倒大陸, 再行10分鐘就到水圍村的碧水雲天. 今次去到碧水, 一定要試美容部的火山石(上次覺得貴無試, 心郁左好耐), $218/120mins的全身香薰推油+火山石推背+全身磨沙, 做完之後勁舒服, d皮膚又滑溜溜, 不過係美容房無得沖涼要落番1樓沖麻煩D. 仲送1個大堂項目, 做左個腳底, 好撚C服啊~

做完曬差唔多9點半, 立即飛的去肥肥介紹的新疆菜度食. 點知上左架唔識路既的士浪費曬D時間, 去到間餐廳已經得番我地一枱客喇....間野都幾大坐得幾舒服, 隨便揀左幾樣餸食....



手抓羊肉 $38/一人份



手抓羊肉38蚊得兩舊, 有點貴. 不過D羊好滑唔羶, 一啖羊肉配一口熱湯, 非常好味.



新疆拌面



我同肥肥都好鐘意呢個拌面, D面好煙un好Q, 個拌面好多汁, 我忍唔住一吃再吃, 都係非常推介.

之後再點了羊肉串, 新彊大拌菜(好似意式沙律咁), 仲有土豆燒牛肉(這個因為用了牛展, 麻麻地).




羊肉串

新彊大拌菜

 

土豆燒牛肉

這裡還有好多菜式看起來不錯, 下次一定會返黎再食其他野!

中發源清真餐廳

新州店-深圳市福田區濱河大道新州酒店一二層

電話: 0755-83305102

忟憎的瑣事

適逢糧尾(才23號ja....還有8天...), 減少外出活動, 又要減肥兼儲錢, 自我纖滅一切有關洗錢同飲食有關的念頭. 又唔想係咁諗住結婚的事, 搞到我百無了賴, 一個星期天的下午就躺在床上任由時間流逝.

星期六應承左肥肥阿媽煮自家泰國菜俾佢食. 星期六的下午就同肥肥出新墟街市買食材. 原來新墟街市內有一間泰國人開的雜貨店. 同佢講要整冬陰公, 佢即刻幫你執曬d香料(內有香芧、 南薑、檸檬葉、辣椒、冬陰公醬), 仲有一枝調好左的生蝦刺身汁, 除左可以用來做刺身的汁外, 仲可以整泰式鳳爪, 唔使自己慢慢調, 快靚正! 街市對開的凍肉舖已經有一包刺身蝦($35/20隻), 返屋企用凍滾水沖下再點d汁就食得, 勁易整又抵食, 真係「沒有失敗的理由」! 哈哈!

回家又係我一個人煮, 肥肥躺在床上等食. 我其實幾鐘意煮野食. 因為我成日好多野諗, 集中力好低, 個人又好急躁, 煮野食可以俾我集中精神, 個腦淨係諗眼前的食物, 整邊樣先, 洗邊樣先, 一步一步, 在廚房搞呢搞路好快兩三粒鐘. 不過煮野食最大的挑戰係臨門一腳, 好似我個冬陰公湯咁, 貪心地落左三湯碗的水(我估其實係落三飯碗的水就OK), 成煲野就稀曬lu......

泰國之夜另外仲整左一碟香芧焗烏頭. 原意想做明爐炭燒的感覺, 點知出來完全不是這回事, 但係錯有錯著, d肉極之滑又鮮甜.不過d香茅唔夠入味, 下次要改進下先....

肥肥阿媽過黎食飯佢好開心呀, 如果我阿媽唔係咁貪錢佢其實都好好. 食完飯佢又講退休之後去做洗碗. 唉肥肥一家都唔知係咪有「先天性自我矮化症」, 其實佢自己都明知講出黎自己都唔會去做, 但又要講, 為咩呀? 咪就係要聽既人緊張佢, 關心佢咁law (即係好似BB仔扭計扮喊但係無眼淚咁law)....

星期日一起身就落雨, 勁頹廢. 俾我在垃圾桶發現肥肥昨晚又飲酒的證據. 兩日前佢先應承我唔飲酒, 仲用我條命迫佢發毒誓, 兩日後又再飲過. 無得救. 等日佢老婆仔女死燃曬佢都唔識改過.上天唔應該對佢呢d人咁好. 唔應該俾呢d人有工做有屋住有老婆有車渣有好野食有人錫, 呢d人連咁簡單既自我紀律都做唔倒, 社會上有更多更克苦更堅毅的人都未能得到溫飽. 呢個社會就係咁唔公平.

下午無野做等時間過. 波波一而再咁在門口及廚房痾屎痾尿. 我真係好鬼忟. 一間屋有兩個人令我咁忟憎. 佢地兩個咁樣激我真係有諗過唔要波波同肥肥!!!!!! 唉我個人咁無耐性, 將來點生仔呢?
P.S. 夜晚屋企突然出現好多飛蟻, 屯門公路爆水管搞到全天都無廁所水用, 好忟憎呀!!!!!!!!

頭痕 - 我的wedding theme

Bride-to-be真係好多野諗架!! {Mrs. Cocoa Bean Blog準新娘子的腦海}, 好似呢篇blog所講, 我個腦真係好多野諗, 85%都是關於婚禮的, 10%是生活, 只有5%是工作 (哈哈, 雖然我個肉身每天有70%時間在工作, 但好多時個腦都係諗緊結婚既野)

網上好多準新娘子都有好多好多的idea. 每看完都會諗下自己個婚禮可以點apply呢? 我唔似得一d新娘子咁有耐性, 我天生笨手笨腳, 有好多DIY item我都無信心做得好, 怕出到黎會甩皮甩骨走曬樣! 不過, 在搵唔同idea之前, 我都會搵下唔同既wedding theme, 之後我的婚禮的details就依住個wedding theme去揀心水既顏色就確保唔會花lee碌啦!亦都可以俾自己stick to the original, 唔使心大心細自己攞黎煩! 哈哈!

我個腦入面已經有2個wedding theme的方案, 各有好壞, 俾d意見呀!

1. Theme color: warm gray, blush, nude, blackberry, pink
Mood: romantic and moody

photo source : snippet&ink

好處:

1.粉紅色較易找婚禮用品, 好多結婚野都係pink的. 而且百搭.

2. 我其實好鐘意lace, 粉紅色好襯lace, 如果係, 我的婚紗都會挑lace的.

缺點:

1. 我俾人感覺較cool, 粉紅同lace可能會太女仔同我唔夾. 而且好girly, 唔知襯唔襯我膚色.

2. 半島個場本身個感覺比較多白色同金色, 感覺好Royal的, 不知這theme襯唔襯.

 

Theme 2: navy blue, yellow, purple

photo source : snippet&ink , style me pretty

好處:

1. 藍色同黃色的配搭好搶眼, 一見鐘情

2. 與半島的白色金色較易match

3. 少d人揀, 唔會common

缺點：

1. 不是婚禮傳統顏色, 較難找matching的用品. 所以加入紫色做其中一色, 較易找.

你地會點揀呢? 等我問下出名bad taste的肥肥先......唉不過佢通常都無意見.....(-_-")

一次便決定我的婚禮攝影師 Gary Mak

今天約了一位婚禮攝影師Gary Mak見面. 4點上到佢的Studio, 只有他一位接待我地. 佢先show俾我睇佢d作品, 是一本本水晶相簿. 我問他有沒有半島的作品, 他說沒有做相簿, 只放了上blog. 其實我在他的blog已看過很多次了, 因大都是很有mood的照片, 沒有註冊/行禮時照片, 有少許擔心. 不過他說他去過半島好多次(起碼在他的blog內已有2次了!), 俾倒我信心. 因為我認為當日攝影師一定要去過果個地方影, 熟悉場地的影相位係最緊要! 所以基本上我心目中已經敲定了他!

整個見面過程中, Gary一點都沒hard sell. 佢俾我感覺係好和善的. 我選了他的因素有以下:
1. 有多次拍攝半島酒店的經驗, 這一點很重要! 佢會知道半島有咩地方影得靚, 邊度採光, 邊度影得唔影得等等, 佢仲提我安排2支大光燈防背光tim!
2. 相片質素方面, 數年前我曾想過找一些很出名的攝影師, CM Leung, Irene Chui等等, 但現實受到金錢的限制, 不得不放棄一部份. Gary的相片雖然無果D好藝術好華麗(e.g. CM Leung)的感覺, 但都中規中距, 可以接受. (我係一個對攝影好有要求的人, 我說可以接受, 或者其他人覺得已經很好了)
3. 收費.Gary的收費應該屬於中價. 其實我都無問太多個photographer. 只知一些知名攝影師收你$3XXXX/day, Gary是$13880已有2photograher+videographer (half day). Gary少有地有Half day charge, 雖然比起full day 唔係平好多, 但其實要佢half day都已經要左佢一天時間無得接其他客. 而且仲可以加鐘影外影(約$1600/2小時). 夠flexible.
4. 網上評語不俗. 起碼安心點.亦是我沒有多找其他攝影師比較的原因.

肥肥反正攝影這一環是必要的, 如合理的話就無須搵咁多間. 而且幸好是Gary仲有期, 遲些可能俾人book了. 不過我都"懶"係過要返去諗諗先. 佢即刻話如果即日confrim就可以送成長片段(原本額外收費$580, 我本身諗住自製的). 貪少便宜的我就即刻confirm啦!咁快搞掂一樣野真係爽, 仲送埋成長片段仲好唔使煩, 正!

相關連結:
1. Gary Mak Blog
2. Gary拍攝半島婚禮的sample

押上28年來的虛榮 - get married at Peninsula Garden Suite

終於可以下筆寫下我的婚禮籌備事情. 之前一直忍手唔寫, 因為有太多uncertainty, 唔想俾大家(自己)太大期望,又太大失望. 這個婚宴場地是多數年前第一個看中的場地, 之後又重重原因轉看其他場地. 其實我數年前已經在看不同的結婚資料, 幻想自己的婚禮等等, 不過是今年三月才開始真係去睇場. 知道肥肥不喜歡去咁多地方, 所以真正現場去睇過既只有三間. 起初不知道自己想要d咩, 想要咩形式, 在最低消費同圍數之間周旋.....最後最後, 都係回到最初所愛, 半島酒店的Garden Suite.

在去site visit之前, 已send定email問過價錢等等, 雖然價錢是很貴, 但因為場地小min charge不高, 所以金錢上落有限, 一方面給自己一個藉口, 另一方面當時搵場地搵到好沮喪的我有點不顧後果的衝動.
4月中第一次去site visit, 這世女第一次去半島酒店, 步入去時有點被佢個氣勢嚇親, 不過入到去感覺會好些.大堂好有英式感覺, 有live music演奏high tea, 不過坐上客都有唔少大陸人, 唉, 真係蝗蟲為禍, 在香港花得起錢的都是大陸人了.

和我約好的staff出來接待我們, 要到達7樓的garden suite只有一部小小的專lift才可達到, 特別有privacy,出了電梯後, 要走過一些門廊才到, garden suite正如我的期望一樣, 很classy, 高貴得來又很清雅, 100%西式婚禮feel, 係經典西式婚禮喎, 沒半點港式感覺, 好似去左第二個世界咁.

Patio的位置可以用黎証婚, 肥肥都不知道我找資料究竟有幾瘋狂, 我一早已看過有些新人在這裡行禮片段的youtube片了, 我直頭幻想埋自己就在這裡行禮呢!這裡借來其他blogger的相, 場地大約如此:

離開後, 我知道自己想要咩, 可能肥肥都feel倒我有幾盲頭烏蠅, 佢都無反對在這裡舉行我地既wedding luncheon. 之後回去經過雙方家長見面, 擇日等等, 起初我都擔心唔知點同肥肥父母解釋我地揀間咁貴既酒店, 但出奇地佢地無咩反對喎, 終於今個星期一帶埋肥肥父母再去半島簽約. 就此定下我同肥肥的大日子 - 2012.3.18!

講真, 這個場地真係要花(貼)好多錢. 黎緊個年我都要勁慳咁儲錢. 選擇這個場地無疑有多少虛榮心. 我這28年來沒買過一個名牌手袋, 什至電話/銀包都以實用為主, 這次我押上了28年的虛榮心, One Life One Time @ Peninsula Garden Suite!