見習中女第1課 - 除夕篇

見習中女第1課 :
即使大時大節無人約要留o係屋企"out"臭, 都要化痕妝返工, 輸人唔輸陣。

御臨門溫泉自由行Day 1

八點起身都係比自己預定遲左出門, 相約肥肥在上水的大快活食了最愛的滑蛋早餐, 之後就出發經落馬州過關, 開始一天舟居勞動的車程.
我地條路線比想像中轉接同蠢. 先由深圳銀湖汽車站搭大巴往河源, 車程約2.5小時, 之後再由河源搭中巴去紫金, 車程約1小時. 原以為到達紫金轉的士就可以到目的地, 點知去到先知要再搭50分鐘的小巴才可到達!呢個時候真係晴天霹靂, 在等開車之時一於醫醫肚先....俾我地發現倒呢間野....

(↓登登登登!!!! MFC 麥肯基!!!!笑爆嘴!!)

MFC 麥肯基 – 名副其實係麥當勞同肯德基既混合版, 仲搞野到搵個細路頭取代肯德基伯伯個logo, 大陸真係完全無品牌概念可言. 我地叫左個脆辣雞腿包、麥樂雞同薯條, d野都幾好食啵! 同正版都有得揮! 唔錯.....
在迫狹的小巴的路途上, 夾著學生放學的人潮, 我心想, 邊會有人俾千三蚊房租的價錢, 會坐呢d小巴入去呢? 諗多無謂, 終於終於, 在荒蕪原始的山野中間, 居然有個五星級溫泉渡假村出現左....
入口好有派頭, 用信用卡凍結了五百蚊的押金, 便可以上房. 間房真係好滿意呀!!! 不枉我加左三舊水upgrade去私人溫泉房, 一打開落地玻璃門出去就係峇里式的私人溫泉池!! 太感動了~

(↓打開門口就係私人溫泉池喇~)

(↑峇里feel king size大床, 任碌唔嬲)

跟住我地換好泳衣去左溫泉區浸下熱下身先, 個changing room光猛又乾淨企理, 唔似得南昆山咁亂七八糟, 入到溫泉區, 出奇地無咩人浸喎, 唔知係咪d旅行團客去曬食飯呢~ d池整到好有峇里風情, 仲播放住峇里音樂方便入戲, 我同肥肥狂浸任玩唔嬲, d飲品汽水可以免費任飲的, 仲有溫泉蛋食($2/個)!好好味呀!

(↓晚上的大堂入口)

(↓酒店大堂)

之後我地去食晚飯, 今日搭車咁辛苦, 決定食好d. 我地兩個人叫左一人一盅豬肉湯, d肥豬肉點特製醬汁勁好味(要連肥食先原汁原味, 可惜我怕肥只食了一塊有肥膏的), 上湯浸蒜蓉白菜, 芋頭蠟鴨煲同半隻木桶雞. 除左雞之外, 其他野都好好味, 只可惜隻雞好un, 味道普通到無倫而已.

(↑豬肉湯的特製醬汁, 鮮甜美味)

晚餐花費$177.之後我地行左出渡假村門外放煙花, 又係無人玩得我同肥肥兩個玩曬! 玩左18連發, 一枝炮同龍吐珠, 好好玩好刺激呀!! 最鐘意玩一枝炮, 下下射上天, 又靚又好玩~

玩完之後返上房享受我地個私人溫泉池, 我早就預備好早前於franc franc購入的白朱古力浸浴粉. 到左交換禮物時間, 肥肥送給我的禮物竟然是價值三百大元的朱古力!? 太奢侈了, 圍起成廿蚊一粒., 好貴呀!!

中場休息落樓下買燒夜, 有各式串燒同炒麵食, 我地梗係拎上房一路浸一路食啦! 浸緊既時候仲可以睇住無綫, C服到暈呀, 呢千三蚊真係值架!! 浸完成身軟曬, 係時候覺覺豬喇....

(↓宵夜至上)

貝澳野外食羊腩煲

這個聖誕節, 我跟了廚神朋友去左貝澳露營. 肥肥前一晚已在貝澳睡了一晚, 今天把我接過來. 原本我來是打算食三文魚的, 點知入到去已經沽清了, 唯有繼續BBQ(第二晚了....).感覺上已經燒到水尾, 但係仲有好美味的安格斯牛扒同脾, 最正係仲有溫熱了的清酒, 是"菊正宗"清酒啊! 我狂飲了五杯咁多! 在貝澳露營BBQ飲清酒真係正到暈....之後肥肥同班男人玩飲酒版大富翁, 呢個遊戲不設本金, 本金就是你的酒量!! 飲的當然不是普通啤酒, 而係VSOP溝汽水!! 燒野食飲VSOP, 係咪好激呢! 好彩我係純屬觀戰, 否則肯定冧硬....

夜晚個營入面超勁凍, 我只有一件大衣完全頂唔住. 好彩有肥肥d肥膏頂住自然暖曬啦! 第二朝起身已經見倒廚神整緊星州炒米俾大家食, 原來諗住食完就返出去, 點知廚神話今晚整羊腩煲喎!! 真係無限吸引呀!! 點捨得咁早走呀~呢個羊腩煲要炆幾個鐘, 所以下午兩三點已經要開始整定架喇! 我直擊整個過程之餘, 一定唔會好似d港女咁橋埋雙手咩都唔做淨係等食既! 原來製作過程都幾複雜架, 首先要炒下d羊腩先, 再洗洗佢去膻, 成幾十斤咁多, 真係嚇親隔離營呀!!

(↓呢個就係廚神喇~)

跟住就落鑊加d南乳腐乳等等同d羊腩撈埋佢, 再煲一煲水, 加d香葉,八角, 竹庶之類落去, 主要係要黎去膻既~ 跟住放埋d羊腩落去, 用個炭火慢慢炆佢兩至三個鐘就完成喇!

(↑我真係有認真考慮過去買一個呢款炭爐返去. 廚神話要o係雜貨舖買喎.)

呢三粒鐘我做d咩? 其他人有d去左行山, 而我, 梗係同肥肥返入營午睡片刻先啦~!!起身時羊腩煲已經炆好喇! 我地仲準備左好多美味既配料去配呢個煲, 有生菜, 金菇, 絲瓜, 生根, 粟米等等, 最正原來係午餐肉!! 原來午餐肉配羊腩煲係咁match架!!呢晚我地就o係郊外吃起羊腩煲來! 好有風味呀~d羊腩炆得好林好入味, 識倒廚神呢個朋友真係有今生無來世呀~

愛情是盲目的

當你同佢好既時候, 永遠望唔倒佢既缺點.
當你同佢嗌交既時候, 佢既缺點就出曬黎. 開心的回憶會選擇性delete, 只剩下唔好的一面.
繼而去到冷靜期, 好似好理性咁分析下對方既pros & cons, 最後發現佢既cons係佔9成.
跟住會去搵下其他男仔比較下, 愈比愈差.

之後就會俾機會其他男仔埋你身, 呢個時候, 如果你係有咁上下quali, 好易就吸引倒第個男人and then飛左原本果個.
不過好似我呢d質素, 只會歎息自己既圈子點解咁細, 點解無男人會埋我身....

在無奈地被迫選擇"寧缺莫濫"時, 又會收倒男友的花.
愛倩是盲目的. 我直情係盲頭烏蠅. 明知係屎都撲番去.
女人. 其實真係好易氹.

特登執空個partition放扎花示威.

吸血新世紀Twilight

今日同黃去左睇戲, 在yahoo影評見倒有五粒星咁堅, 所以好想睇.(對! 我就是這般無性格)
果然無揀錯, 要推介下呢套電影: 吸血新世紀 Twilight

一睇套戲名就知道係有關吸血疆屍(香港譯戲名係咁上下...), 唔好以為係恐怖片, 其實係不折不扣的愛情片. 疆屍mix愛情, 不外乎係人屍戀. 令我諗番起亞視果套"我和疆屍有個約會", 當然, 呢套浪漫一萬倍.

老土橋段往往令觀眾著迷. 好冧入面的一句對白, 男女主角比喻自己是獅子和羊;

Belle :"我是一隻很笨的羊"

Edward: "咁我係一頭有自虐狂的獅子"

......真係冧到爆. 睇番男女主角真人其實唔算好靚仔靚女, 但係套戲真係拍得佢地好天生一對. Edward對Belle的甜言蜜語, 我想任何一位女仕都會死在他手上吧! Edward望著Belle的眼神, 亦把我誤殺了.

這是一套浪漫到死的電影. 但表達方法男女皆宜, 絕對唔會打冷震同作嘔.

唔講咁多, 去個trailer俾大家止止渴先.


值得一提係戲中描述Edward一家的編幅, Edward帶Belle返屋企, 一家人玩棒球, 疆屍一家的生活其實也很健康的. 結尾時好明顯是鋪排了第二集的伏線, 衰鬼, 又要再冧人一次.

----------------------------------------

相關連結:
《吸血新世紀》魔童玉女 - 睇下其他人的影評.

收到了 - 我的第一本書 - Love Hypo

星期四已收到Hypo給我寄來的掛號郵件, 只是要等到今天才有時間到郵局親自領取,
這是一份用卡通紙包裹著的郵件, 上面印著台北市的郵戳,
急不及待打開它, 裡面再有一個聖誕卡的特別包裝; 包裝是一次性的封條, 我不能不親自看過便送肥肥, 所以唯有把它撕開, 裡面有一句寫著"hold your breath";
再有一個印有書本封面的包裝信封, 拆開是我的封面, 揭開便是一頁又一頁的感動....

第一頁和書脊有標題的tagline, 十分精美的排版.

由自已編寫的內文, 別具意義和親切感. 印刷質素還可以, 我估它是direct output, 不及傳統四色印刷的印色咁實在.

數碼年代, 我們把"書"和"相薄"轉了型; 今次利用網絡的方便, 把記錄反樸歸真, 來的得更實在, 更感動.