見習煮婦 - 三色湯

今日沒有上班, 肥肥又返左大陸, 得我一個人在家, 逛到超市, 買了現成湯包回來煲下湯. (煲湯的原因其實係....因為買左個新湯煲...哈)

步驟: 把豬肉飛水, 然後把所有材料放煲煲了2.5小時. 其實煲湯一D都唔難, 係無時間睇火姐!

小小評語: 可能貪心落得太多水, 味不夠濃, 75分.

這是一首簡單的小情歌

這是一首簡單的小情歌 一個簡單的平安夜

一直很想吃生蠔, 睇雜誌知道City Super有特價原箱法國生蠔(24隻, #3), 都係$298, 平均一隻只係$12.4!即買!


不過原箱買生蠔就不設開蠔服務, 開蠔刀一把$59, 妹仔大過主人婆.
第一次學人開生蠔, 隨箱附送一張開蠔說明書, 不過齋睇點會明呀, 但係開下開下又好似領悟倒d技巧咁, 24隻蠔好快開曬!

食生蠔梗係要配白酒啦! 好好味~~
平安夜晚餐當然不只咁少, 仲有在一田買的靚西冷(成200蚊一塊), 又有虎蝦, 紐西蘭羊扒配孜然粉, 芝士腸, 三文魚刺生, 仲有靚紅酒.....食呀飲呀食呀飲呀....
今晚屋企好靚, 好溫馨.
最後, 到左交換禮物時間啦.....
肥肥既野, 郁下條尾都知佢諗咩啦!
一隻發光的鑽石介子,
一首自己唱的歌,
就係咁樣就答應左, 很簡單的一夜, 但係意義深長.

為你鐘情　傾我至誠

請你珍藏　這分情

從未對人　傾訴秘密

一生首次盡吐心聲

望你應承　給我証明

此際心弦　有共鳴

然后對人　公開心情

用那金指環做証

* 對我講一聲終于肯接受

以后同用我的姓

對我講一聲 "I do ! I do!

愿意一世讓我高興

為你鐘情　傾我至誠

請你珍藏　這份情

然后百年　終你一生

用那真心痴愛來做証 *

A Night with Wind

尋晚肥肥同廚神上左大陸揼骨, 我以為佢會三點左右返黎, 點知佢到今朝都無返.
我一個人訓, 訓到凌晨6點時突然醒左.
房出面好似有d聲.
我起左身, 出左房睇下係咪肥肥返左黎, 點知一個人都無.
可能係大風…即刻返返房訓覺…肥肥, 你快d返啦…

lost

突然發現自己迷失了, 難怪最近生活得不開心.
有點不知自己在做什麼, 或者是, 不知道自己為何要這樣做.
究竟我人生的目標是什麼? 是工作? 是生活?
我發現我最近做的事好像是被指示的. 人人都問我幾時結婚, 我便去計劃. 但係我無諗清楚自己係咪真係想結婚. 但我有時覺得自己已經騎虎難下, 已經洗濕左個頭去買樓了, 難道還要跳車嗎?
但其實我的人生目標不是想結婚生子, top of the mind我只想到要去好多地方, 享受生活.....it's the time now.
No one can force me to make a decision.

宇宙自然減肥法 By Angel Tong

宇宙自然減肥法法則:
1. 三餐中 飯肉拆開食 3分肉7分菜 量不限 但必須3 分飯/肉配7分蔬菜
2. 先吃菜, 生吃最好 或白灼
3. 早餐要食新鮮蔬果
4. 睡前四小時不進食
5. 一星期用一至兩天只吃新蘚蔬果
目標: 這樣的食法可助容易消化及代謝 新鮮蔬果提供酵精 可排清毒素 身體休息 健康 不易疲倦

write something

一段時間沒有寫日記. 好放縱自己. 今日要迫自己寫點什麼.

上星期五去左睇草猛演唱會, 山頂的位置, 好多首歌都未聽過. 不過好開心. 開心不只是很high的演唱會, 而是很久沒和肥肥出尖咀, 很開心拍拖的感覺.

星期六整天忙著在屋企搞衛生, 肥肥一直在床睡覺, 我非常看不過眼. 很討厭他咁懶的性格. 晚上同肥肥同阿業阿欣一齊落元朗打邊爐, 好多人在街邊打邊爐, 很有feel, 而且個麻辣鍋都好好味. 同阿業阿欣傾落計覺得佢地都幾啱傾, 唔似黑仔同佢老婆, 我估我下次都唔會抗拒同佢地出黎gathering.

星期日下午先出尖咀試Joanna的姊妹裙, 依家咁肥都要做姊妹我真係覺得自己好不要臉. 試衫揀衫我一點勁都沒有, 只想快d解決件事. 好在我地第一批入去試衫, 間舖好快就迫滿人. 結婚要係好煩, 又要使好多錢.

之後我地去左加連威老道間蟹店買大閘蟹, 然後回家準備crab gathering. 好開心今日好齊人(除左肥肥), 我為這個gathering出錢出力, 但其實我好開心. 我好開心可以提供倒一個地方, 環境去集合新姑婆, 我好喜歡我地既聚會, 所以我一d都無所謂. 依家大個左啦, 大家帶自己既另一半來都可以相處得好好, 但係肥肥到依家都仲係好小家, 唔願意同我d friend一齊.

我都無能力改變呢個人, 同佢講野都係side氣.

幸好沒寫

最近把blog荒廢了, 因為不想寫, 因為我改變了, 學懂了, 不要把肚皮都掀出來, 才是保護自己的良方.

在聖NANA的三年, 我就是相信自己的性格, 以為大家都會敞開心扉,結果被傷得流著血地離去. 學懂了, 成長了, 「同事永遠都只是同事，永遠都不能成為朋友」- 這句話真實得令人心寒.

以後口袋裡裝幾個不著邊際的娛樂八掛, 或學會收口, 不知講什麼就少說話, 寧願dead air都好, 已夠你安然活過十年八載.

我承認我愈來愈愛面子. 或者說, 愈來愈怕其他人的看法. 怕其他人的閒言閒語, 不透露自已的想法, 最安全的是做一個空殼, 沒人會去"說"一個空殼. 即是假如有一群人, 由最好的到最差的順序排列, 我會把自己放在中間, 因為這是最安全的. 以往我就是把自己的事都告訴別人了, 結果發覺很多事都落空了, 不知如何下台. 所以不如不說. 以前覺得自己很多事都可以做到, 經常發白日夢, 常抱著理想. 現在知道了, 不要去想, 因為想了又做不到, 除左好樣衰之外, 自己都覺得好失落.

所以, 由依家開始, 拜託自己不要再去想結婚的事. 請體諒我, 這只是保護自己的行為 -- 保護自己, 不要被「落空」傷害.

榴槤布甸

今日食左自家首製榴槤布甸, 出奇地超級好味, 極濃榴槤味, 而且布甸質感滑滑, 雖然我係跟住食譜做, 但家中沒有量杯, 糖, 奶, 魚膠等份量都是憑感覺下的, 又俾我撞倒咁好味! 唔通我真係咁有天份?? 哈哈哈....

食譜來自http://shirleyliving.mysinablog.com/index.php?op=ViewArticle&articleId=1688588

老了嗎?

星期五, 廚神夫婦+肥威來了我們家. 一齊鐵板燒. 鱔, 花竹蝦, 牛柳粒十分美味. 不過飽餐過後, 清洗工作很累.

星期六, 跑出又一城學化妝班. 預繳了一百大元, 化了一個妝, 可以換番產品. 不過一百元在這名店內不能買任何產品, 結果, 買了六百元, 包括一枝$350的化妝掃, 真係鬼遮眼。趕回家準備girls gathering, 姑團加Iris+Ryan似乎是新的組合. 特意一早把帶子刺身解凍，又用埋剩餘的醉雞汁做醉雞翼。小公主把Haru帶來, 我解釋俾佢知我新居被禁事件要佢屈就Haru實不好意思. 晚上還有Mr.hk做餘興節目真開心.

星期日同廚神夫婦入貝澳摸蜆, 同場加映娜姐及羅仲謙, 羅仲謙童顏巨乳真係名不虛傳, 目及到姐姐好開心. 趕到入貝澳, 落水一小時, 得一只蜆. 不過都係基哥犀利, 有佢喺度, 我同肥肥又有成桶蜆攞走lu.基哥一家真係好好人, 肯為飲醉的肥肥渣車到屯門.

一連三天的活動, 很累, 是老了嗎? 以往初初同肥肥拍拖時，常常責怪他怎麼老是要留在屋企休息，現在的我就經常想留在家裡休息，我想不是我老了，可能是因為我有一個舒服的家。
同場加映，星期一晚餐。(p.s.切辣椒時不慎途手切, 搞到隻手沾有辣氣, 除con及帶con時極拿眼, so hurt!!)

油鹽水煮蜆

XL帶子刺身

一人一個

同肥肥一人一個小枕頭，不過佢果個勁臭。

口不擇言

星期六入左鴨脷洲, 無錯, 係鴨脷洲, 香港島的最南端.

遠到離曬譜的鴨脷洲。
我同肥肥由屯門4B區搭960出發, 再由時代廣場轉60蚊的士才到。
地理上, 可能同返橫崗差唔多.

Tuenmunian (屯門人)難得大鄉里出城. 特登去了灣仔的Flying Pan食English Breakfast. 第一次黎灣仔店, 這裡比中環店大d, 不過好似缺少左小店特色. 而一樣的是, 都係咁多鬼佬.
今次我專程想吃Egg Benedict. 因為之前在研究蛋食譜時想做, 但未食過真正的Egg Benedict 都唔知自己做得啱唔啱.

其實是poached egg (水煮蛋)放在muffin上, 再加兩片煙肉同菠菜, final在上面淋些荷蘭醬上面. 食落都幾好味, 不過就好"呢咁hea", 因為吉穿隻蛋後d蛋汁漏曬出黎, 都唔知用手食(好似漢堡包咁)定係用刀叉食先啱. 真係大鄉里出城。無辦法啦，可能我這輩子都去唔倒歐洲。

食完之後去時代廣場會合廚神佢地一齊搭的士去鴨脷洲的一間工業大廈內, 我地今日既目的係試酒. 因為呢度有一間全港唯一的釀酒廠, 佢地由外國入口d急凍葡萄, 黎到香港進行發酵過程. 個接待處好有酒莊feel, 一桶桶紅酒圍住一張長枱, 好似古堡地牢咁, 幾正. 一人六十蚊, 飲左四五杯紅酒. d酒麻麻地, 但可以試四隻酒都算係咁啦~

席間Debbie問我地今晚食咩, 其實我一早唔想同佢地食, 因為唔想好表面咁social(其實我同佢之間根本傾唔埋, 只係肥肥同廚神fd我先搭單一齊去). 不過佢話食生蠔好唔好. 我梗係想啦. 我想食生蠔好耐. 於是點頭答應. 但後來真係有d後悔, 早知一早推佢啦!

但佢介紹的餐廳在openrice裡有寫, d生蠔賣相好靚, 佢地又讚d蟹好得, 但價錢如果要食得飽就每人要400落樓. 大佬呀, 400蚊喎, 我一日只可以使100渣, 超標4倍梗係唔掂啦. 佢睇倒我係咁話貴, 又推介食扒, 但果間扒房落樓又要300幾. Debbie見我一再推辭，就話「係咪真係咁窮呀?」，聽起來真係十分「梗」耳。可能言者無心，但聽者有意。真係口不擇言，我窮都有志氣呀，無咁大個頭唔會帶咁大頂帽既，我都話唔去啦，你又何必咄咄逼人呢?

最後我地同佢班fd一行十六人去銅鑼灣食橋底辣蟹，一人$178落樓，雖然同佢班fd無個識，但食橋底辣蟹一定要咁多人食先划算。橋底辣蟹好好味。這一餐social飯吃後特別累，吃後甜品都唔去食，立即回家同肥肥躲在蝸居內更好。

最近我的意志磨滅得體無完膚。在前往橋底辣蟹前，我地又逛逛鴨脷洲的outlet，一橦工廠大廈裡有Joyce, Lane Crawford的outlet, 亦有些家品店，可是價錢一點也不「outlet」，我懷疑呢度係專為赤柱呀等南區富豪而設，之後我地再搭shuttle到海怡轉的士，海景單位索價600幾萬，那一刻我想，有些東西可能是我一世都沒有的。

以前在剛畢業的時候，雄心壯志，覺得自己兩三年或數年後，會是「senior」，或者月入幾萬的中產(or小資)人，覺得自己什麼都總會有能力做得到，現在呢，覺得自己是急流裡的小石，水流不斷衝，而我還成舊石咁呆下呆下。

磨蹭

"與其在這裡磨蹭, 不如實際點.
既然反轉豬肚都吃過了, 還怕什麼?"

很想把這句發表在面書裡, 天啊!但我就連一點點勇氣都沒有.
發愁的日子, 厭倦和討厭的面孔, 每天有最少面對10小時.
以往的我, 在年少氣盛的日子, 老早走了.

現在負上百萬的債,要走談何容易?
叫自己每天都花點時間去看看人力市場,
奈何總是沒有回覆.現在的我沒可能再找fresh grad的工作(雖然可能人工還比我現在要高),
所以無得魚翁撒網, 回覆率暫時是-零.
唉.沒辦法.再努力點吧!

最近覺得好沮喪. 因為太多野想要.但我的工資連cover基本生活都成問題.
為這樣的日子,我哭過好幾回. 人工扣除應付債務後,只夠三千元for每天生活.
沒錢儲蓄也沒錢花.什麼都做不了. 個人好似動彈不得咁.
這3000蚊好似鹽水咁. 每天一百, 夠你搭車返工, 夠你食個茶餐廳做午餐, 或許也可叫個炒粉面外賣做晚餐.

餓你唔死, 卻休想快活.

已花了很多錢在屋子裡, 但有三分一還未完成:
1. 廚櫃沒有,碗碟快沒地方放
2. 書桌沒有.經常在扒在床上用電腦搞到頸梗膀痛.
3. 化妝桌沒有,化妝品散落窗台.
4. 鏡子沒有, 很久沒見過自己個樣.
5. 鞋櫃沒有, 鞋散落一地.

最近看了關於做夢的電影.我有時都被夢擾亂了.
試過發夢夢見我和那臭四冰釋前嫌, 但現實當然無啦.
有次發夢我去了巴黎, 是真的, 有一刻我真係以為自己去過.
我的腦海裡怎麼都是巴黎街道的記憶? 怎麼我好像已住過巴黎的apartment?
怎麼我好像知道apartment樓下的market是怎樣的? 去metro的路都似曾相識?
(其實都怪google map的street view吧)

我真十分不甘心去放棄我的歐洲之旅.
我真的很想很想很想去.
前陣子不欲打開自己bookmark了的巴黎旅遊網誌,
現在又無意中看到其他網誌介紹巴黎,
同肥肥分享時, 個心真係好酸.

我一定 一定要再去.

我的家具採購經歷1 : Taobao designer chair & Table

這是主要分享我在採購部份家具的經歷和在淘寶網的經驗.

事源我一直找不到合適的餐桌和椅, 香港大部份家具店(e.g.實惠, 直銷中心, 吉豬島)的款式都很"Kong" (港式款). 我最愛的Ikea又找到不合尺寸的枱, 我知道很多香港人都會回大陸訂家具, 但款式都不是我所愛的......之後我最終在Yahoo的一網店內找到我心目中的餐桌.

這網店的實址位於九龍灣某工廠大廈內, 我親身到訪他們的陳列室. 佢地主要賣一些仿設計師的家品, 有些家品在連卡佛賣幾千蚊的, 這裡只賣幾百蚊. 我同肥肥鐘終於都揀倒我地想要的枱喇!

source from : Come In 品味家俱

價錢是$1599淨枱. 比我心目中的價錢高了很多(我心目中的價錢是超低的...)不過千金難買心頭好, 買吧買吧!! 這間店的女sales其實很nice, 她很有心機介紹這張枱要配襯這張designer chair, 又幫我地襯番間屋既顏色要揀邊隻色的椅....這張椅一張要$599, 在鬼um眼咁買埋.....成張單要3000蚊, 不過我地只是落了一半訂, 等間屋裝修好先取貨.

其實我之前未接觸過designer chair, 於是便上網找資料, 發現原來在Taobao有一模一樣的餐椅只售rmb299!!!足足一半價錢!!! 其實在香港網店購買or淘寶購買咪都係一樣係冒牌貨, 無謂同自己個荷包鬥氣, 決定在Taobao買好了!!呵呵呵....至於那網店已下的單麻....超厚顏的我打電話去取消單了, 只買一張餐桌....keke..

在Taobao裡我找到的網店是MD FURNITURE. 這間是各店最平的, 而且首頁更標明正接大量的香港訂單, 特安排物流公司送到香港家樓下. 省時省力, 非佢莫屬啦! 除了兩張餐椅, 我順買也買埋幾樣家品啦! 共花HKD$1319.連運費$183, 同樣花1500元, 卻買來兩張椅, 一個櫃, 一個掛架同一個鐘. 呵呵呵!!!!

在Taobao買寶貝, 香港人必須要用的是兩樣野: 支付寶和淘點. 支付寶是Taobao一項超強的功能(有點似Ebay的Paypal), 先在Taobao內登記了自己的支付寶account, 支付寶可保障買賣雙方, 一方面保障買家俾左錢, 一方面要買家收到賣方的貨, 無問題核實才放錢俾賣家.

之後就要向你的支付寶充值, 什麼大陸戶口, 信用卡通通都不用(在大陸網站用信用卡還是信唔過), 在淘點開個戶口就可以啦! 這是一個Taobao認可的香港網站, 他提供一個固定的匯率, 這淘點link番自已個支付寶account,根據匯率存入港幣到HSBC戶口,然後上載張入數紙, 佢地會在15mins內幫你充值左支付寶, 咁你就可以用黎買野喇!!

買家可以用Taobao的網上msn和這間網店的賣家進行網絡對話,咁咩都可以問清問楚啦. MD Furniture的客服很nice, 回覆又快, 發貨又快, 他們所用的物流, 5天左右便到HK, 香港的網店都不包送貨啦, 仲有咩好挑剔呢!

終於貨送到了.....可是我訂的紅色柜子裂開了!! 立即同賣家講啦! 佢要我拍好照給他看, 他看後二話不說重新發貨, 當然郵費是他付啦! 雖然要再等多五天, 不過還是可以接受喇. 整體來說我還是很滿意的.

酷熱的周未

星期五臨落班接到黃的電話, 要到我屋企睇波, 我梗係歡迎啦. 立即約埋楊, 楊又叫埋Ryan, 我一放工就即刻去旺角買左個氣泵, 再衝返屋企, 同楊差不多時間到達屯門. 之後一齊食泰國菜, 便回家睇波. 黃亦差唔多時候來到.這晚我地四個, 見證著巴西出局, 黃同我一齊訓床, 楊同Ryan就訓吹氣床墊.

第二天黃一早便走了去教琴, 我call埋肥肥, 車我地去黃金海岸食lunch兼游水水, 個太陽熱到癲, 一把太陽傘真係好C服~不過d水好污漕, 好多垃圾, 搞到我地都無咩mood游水, 大部份時間都係坐坐攤攤. 這樣又hea過一個下午.

晚上打算同肥肥試下個BBQ爐, 準備邊食邊睇波. 楊同Ryan繼續留守, 仲call埋Iris, 阿Pat又話要黎捧阿根廷, 加埋肥肥個fd阿忠, 總共有7人在我400呎的家內睇波, 真係好熱鬧呢! 因為怕個BBQ爐燒到d地毯吸味, 索性在廚房燒, 我就負責不斷為大家燒野食喇. 12點幾連黃都黎埋, 好多人過夜啊~

第二朝等埋老豆過黎, 一齊落左虹橋飲茶. 飲完茶佢地就返大埔, 而我同肥肥同老豆就返屋企鑽野. 不過其實先睇左阿凡達既藍光碟先, 老豆在大陸買的, 真係犀利. 鑽完幾個洞後, 又8點了, 老豆返屋企, 我同肥肥在惠康買d野, 靜靜地煲個湯, 過了安靜的晚上.

第1煮

今日同seven仔行左大埔中心, 大埔吉豬島正進行執笠大減價, 開左咁多年既吉豬島要執笠, 有d唔捨得, 無得"日日開心於吉豬島內", 不過聽聞之後會開一田, 都好呀, 我最鐘意一田~

因為拎d野太重了, 叫左肥肥過黎大埔車我, 順便俾seven仔呢個新牌仔學下車, 不過肥肥話佢太緊張了, 要practice多d先可以上高速公路. 肥肥同seven仔一齊在偉景樓下練左成個鐘先上黎, 不過seven仔一場黎到都無上黎就走左人, 唔知佢搞咩.

之後我就同肥肥鑽野啦, 安左雜誌架, 毛巾架同調味架, 仲欠窗簾同碗碟架,之後再在廚房煮我地新屋的第一餐.....其實廚房仲欠好多廚房用品, 而且我都只係o係樓下惠康買埋d方便餸.....我這個沒用的主婦要見笑了....



叉燒炒蛋, 蒸排骨, 清炒白菜仔, 白飯兩碗.

今天很累. 新的床終於送來了. 好C服.

代價

呢期成日同肥肥好欣賞自己屋企, 所以成日都執屋, 又成日好興奮咁讚自己, 讚間屋.

尋晚肥肥同佢阿媽通電話, 我都話佢搞得掂架啦, 講幾句佢阿媽就應承俾公司sponsor我地架車泊樓下停車場(泊車費比現時泊緊既爛地多1倍!!)...但對我地黎講就方便得多~一落樓下就係parking, 落雨都唔怕.

但凡事總有代價, 佢阿媽在電話裡頭聽倒我地間屋搞得7788, 就同佢老豆好興奮咁話好想黎我地度, 又話要煮呢樣整果樣.....唉...真係頭都大埋, 到時肯定又話我地整到鬼5馬6, 或者又俾好多idea我地叫我地裝呢樣裝果樣....到時又麻煩了.....

又是很忙的周未

星期六終於到ikea買傢俬. 由三月起一直行, 由新season到減價都未有出手, 今次終於要出動. 我同肥肥渣車到沙田Ikea, 唉, 沙田呢d中產地方, 好彩我地架車都不失霸氣....keke...(虛榮again...)

三點幾去到, 一路行呀行, 買呀買, 買到成架車仔滿曬! 除左d雜項東東, 大型傢俱仲有CD櫃同電視櫃, 仲有一張900大元的地毯.....買既時候真係好掙扎, 因為呢樣野可有可無...但係諗倒真係好襯我屋企, 都係買左! 行到夜晚9點, 終於埋單, 除左個電視櫃要第二天到上水取貨, 其他都一車過車返新居, 省回200蚊送貨費~

返到屋企, 拿拿臨砌埋個CD櫃, 好易砌姐, 唔使一粒鐘搞掂! 之後搞我部電腦上網, 搞左勁耐, 搞到凌晨5點半天光先搞得掂!!!!! 嘩, 超累.....

第二天唔好以為可以休息, 原來一早應承左廚神入貝澳BBQ, 佢地真係"風雨不改", 即使黃雨都照燒!! 咁唯有去左上水攞電視櫃, 又再車埋窗簾, 再搭巴士入貝澳啦.....今次地點在廚神親戚的屋企天台, 有瓦遮頭唔怕雨, 又有羊脾, 配埋清酒,唔錯唔錯. 不過今晚大家都要返屋企睇波, 所以九點就閃人.

搭番E車入屯門, 英格蘭對德國已開始了, 在市廣場睇左半場先返屋企再睇. 等肥肥睇曬全場返黎再一齊砌埋個電視櫃, 諗住又係一個鐘內搞掂....點知整左超耐....整到阿根廷開波都未搞完, 肥肥一見倒阿根廷開波就痴左線, 完全focus唔倒, 阿根廷掂下個波佢都激動到喊咁濟....我好討厭佢咁大個人仲好似細路咁, 好心佢就快快手一齊搞掂個櫃先睇啦.....到最後又搞到差唔多四點先訓, 超嬲肥肥, 所以索性趕佢出廳訓....第二朝又要8點起身返屋.....就離死掉.....

今日再買埋個鑊, 等到夜晚夠鐘就燒埋d衣紙, 點知居然計錯時間早左一個鐘燒...唉....不過我估都係一樣姐.....(汗-_-")

依家個廳放左d傢俬後好靚啊, 我同肥肥成日都好開心咁欣賞自己間屋, 好多人都放十幾萬去裝修間屋, 我地只係花幾萬蚊, 一樣咁靚, 好開心~

升格

這個周末我同肥肥就渣這架車兜風~

嘻嘻.....Mercedes Benz 麻......虛榮死了~

歐洲車嘛, 馬力真係唔同d, 起步果下真係好爽....連我呢個唔識渣車既乘客, 都好想鏈番轉....

我(港女上身)要向肥肥說: 以後無Benz接我唔駛旨意同我出街, 呵呵呵~~~

宅女必備

在網遊的時候發現這個東西, 可以讓大家打扮成宅女模樣......真是的....."宅女"有這樣形象化嗎? 哈....有夠無聊

source : http://item.taobao.com/item.htm?id=5526476242

搞到我....也很想買一個....哈...
淘寶的描述還說這是奈良美智夢遊娃娃的意念, 這個公仔為什麼會讓廣大國內人民認識? 答案是蝸居吧!
齊中毒去.

海萍與蘇淳

裝修工程終於完成, 過兩天找埋d尾數就搞掂. 為省回1500大元的清潔費, 我同肥肥決定兩個人自行清潔. 雖然廳房己翻新, 只剩下廚房廁所的清潔, 可是任務可艱辛喇!

所以我同肥肥買左幾枝清潔劑(推薦"威猛先生"!超強效!), 連日來不斷刷刷洗洗....但還未搞好....我想進度可能只有50% (真想不明上一手點解可以住得咁污漕). 我諗下諗下其實我同肥肥依家各自住緊既地方都係好污漕架喎, 點解我地又咁出力好似懶有潔癖咁清潔呢? 嘻嘻, 唔知呢, 我諗因為呢個係一個完完全全屬於自己的家吧!

屋裡只有數件家俱, 可以用家途四壁來形容. 反正屋子這樣小, 再輝煌都無用, 不如玩型格部屋吧. 最近很喜歡追看蝸居, 楊說我很像海萍, 起初我不覺得, 但想起來有點似. 我估最相似的地方是每當生命中突然有一件事, 便會不斷不斷去想去找資料去實淺, 旅行如是, 減肥如是, 買房子如是, 新居如是, 無錯, 黃都係咁認為......嘻嘻, 海萍都係咁.

肥肥o麻, 楊可能覺得佢似蘇淳, 有少少似啦, 在蝸居第一集開首時, 是海萍同蘇淳一齊清洗廁所同浴缸, 情況有d似我同肥肥.....其實我覺得....都幾sweet架....

雛形

新居的裝修正進入最後階段. 不過所謂的最後階段, 其實當中有三份二的時間房子就在掉空沒人做野, 到差唔多夠鐘先安排人去開工. 這間裝修公司真令我受了一肚子氣. 先是拖長施工期, 說是四十五日, 實際只需十日便可搞掂. 再來是老闆沒交帶, 安排買料運輸錯誤, 導致地磚及巴士門送錯了, 而這種錯誤卻要我呢個客人去承受!! 如果我再裝修, 一定唔會搵佢!!

唉, 算了算了, 反正裝修都是one off的, 學肥肥話齋, 把問題解決了便不要再追究.這幾天的趕工, 廳房的木紋地磚己鋪好, 油漆已油好, 還把新買的燈都裝好了, 成間屋的雛形終於具體化. 之前不斷在幻想裝修後的模樣, 依家看到自已的幻想實淺了, 真係好開心呢!! 同時間又覺得自己的taste真的不錯, 呵呵~

但我們的家, 還要很慢很慢地建造起來. 可以自己做的就自己做, 省得就省. 就算門外漢也得試試看. 加油吧!

傾慕

最近很喜歡林峰的電視劇. 我一向不是他的粉絲, 只是對伽利略的角色情有獨鐘, 無論是福山雅治演的, 或是林峰演的, 反正就是喜歡. 無線抄橋, 我倒是十扑.

我想我打從心底傾慕有才幹的人. 伽利略, Professor King, 江直樹....這等虛構出來的角色, 令我神暈癲倒. 我小時候暗戀過的對象都是成績好、smart的人吧! 很喜歡女主角那種依賴著身邊一個非常聰明的人, 無論自己點答辯都敵不過他的人...最愛看到的情節是平日一向正正經經的男主角向女主角透露愛意的場面....真叫人心跳加速!!

其實, 我還是一直傾慕著這種比我強的人吧.

但事實都知道不可能和這類人生活吧! 大抵這類人不會隨傳隨到, 俾我搓圓禁扁, 俾我發小姐脾氣, 陪我做盡天下無聊事, 受我的性格影響......生活, 還是現實d好.

2010 走進符號的國度 - Hakata & Busan Day 7

今天的行程可說是概沒有又必要, 就是shopping la! 我好歹都食一下早餐(一樣咁難食), 肥肥則睡到早餐時間都過了. 然後先check out, 再衝到Canel City的Comme Ca Store買肥肥昨天念念不忘的日本仔feel孖襟中褸, 這天可能因為時間很早, 店內好像只有我同肥肥位客人呢! 一件中褸9700yen, 售貨員的服務好到有點嚇人, 先在收銀處付了錢, 然後售貨員幫你提著購物袋送你到扶手電梯口, 你一邊搭電梯他還一邊向你90度菊弓, 搞到我地都唔好意思要向佢菊番弓....(汗)

之後還到了一間類似log-on的店(在日本很多這種店)買了一隻粉紅色手套, 夠無聊了吧!

肥肥想回到西鐵站的PRASO買背囊, 我地又一支箭衝過去, 走過昨天屋台那位置, 嘩, 真係完全唔同樣呢, 乾淨到不得了, 一點污積都無留低, 和昨晚開曬大龍鳳又燒烤又熱水爐真是天淵之別呢!

西鐵福岡站那邊真是百貨公司雲集, 先有大丸, 再有三越,我地逛了逛大丸的食品超市, 再衝去PRASO, 給肥肥買了個背囊, 可是衣服不便宜, 我還是留到釜山才買了. 找到一間happy kitchen的店, 嘩, 是一間像十蚊店又販賣很多kawaii le的廚房雜貨店呢, 又瘋狂買了些~

買東西買到時間都過了, 沒有時間食lunch便趕緊回東橫INN取回行李, 今天的我們已經不是兩個背囊咁簡單, 兩個背囊手上又各自兩包手提, 真重得要命, 又要行到去西鐵站先有巴士搭去港口, 很辛苦啊!!

終於準時到了博多國際港口, 把身上的日元差不多全都花光了, 還好最後的零錢還夠到便利店買個便當到船上吃. 來到碼頭又見番d韓國人, 要和漂亮的日本人byebye了, 很不捨得呢....

船上的環境好似搭船去澳門咁, 吃了便當, 睡了一陣覺, 三個小時後便回到釜山喇!釜山的入境處有外國人專用關口, 唔使同d韓國人一齊排隊多好~出到碼頭都六點了, 天在下小雨, 搭了一程巴士, 還要冒著雨走一段小路才回到中央洞的東橫INN. 回到釜山的東橫INN的感覺好像好左d, 起碼房間的景觀開揚d同有LCD電視.

晚上決定去番扎嘎其市場找海鮮鍋食. 決定搭的士去, 嘗試同的士佬講韓語"jakachi market", 點知佢都係聽唔明, 最後還是要俾本旅遊書佢指俾佢睇. 落車後迅速買左個環保袋車仔放野, 之後隨便挑一間海鮮店, 點了40,000won的海鮮鍋同鮑魚粥, 回到韓國硬係覺得樣樣野都好平(其實唔係真係好平, 只係日本很貴!). 不過這一餐只是一般而已, 海鮮鍋固然有多款海鮮, 但用韓式煮法味道一般, 而鮑魚粥則把原隻鮑魚煮到碎曬, 粥的確甜, 但看到成隻鮑魚碎曬真有點可惜.

食完之後趕著到南浦洞shopping, 點知d舖頭都關曬門了(9點ja wor!), 原打算瘋狂買衫一番, 真係掃興. 可能係星期一兼有少少雨, 連街邊檔都收埋, 不過我地轉個彎, 便找到一條全條街都是通宵營業的烤肉店街!(大部份食店都收10點) 嘩, 看到店內坐滿正在烤肉的年青人, 我地決定找一間進去再食過宵夜!

來到烤肉店又點了好好味的五花腩肉, 韓國燒酒. 這間烤肉店很好, 有圖片, 唔使雞同鴨講. 食飽之後打算搭的士, 怎料遇上了韓國人的劣根性, 居然搭搭下話唔載你要你落車!? 咩料呀, 大陸呀!?? 唉, 要我地冒著雨找了兩三架的士先肯載我地返中央洞, 真係最後一天都要留個壞印象.....

累透的生活

最近都在過累透的生活.

新屋的事....其實根本沒必要每周看幾回, 但硬係要上去望下望下, 自己又沒有建樹, 間屋望來望去的裝修進度都係停濟不前, 有點自找煩惱之嫌. 間裝修公司成日唔開工, 雖然講到明6月15日交貨, 所以依家佢唔郁我又吹佢唔帳.....成日都諗買咩傢私, 諗左個幾月都未買, 每天都在想想想, 好累.

小氣鬼的事, 搞到我工作上毫無衝勁, 成日都要諗住點樣防佢, 幾時幾時又會踩親佢條尾之類. 不過最近發現諗都多餘, 因為你唔去踩人, 人地都會主動踩你.
很想很想快點辭工. 快點快點搵工. 但每天實在太累, 累得連打開電腦的力氣都沒有,

身體都不聽話. 體重又響警號. 已經升番121了. 還要偷懶到幾時?
面上的瘡瘡不像樣, facial很久沒做了, 眉也沒修....夠了夠了...要累到幾時?

在Flickr裡找到的靚靚屋企style

在Flickr裡找到一個群組, 入面d屋企style真係靚到令人尖叫!點解d外國人可以佈置得咁靚!?(雖然我都知呢d係示範單位)但在香港根本無可能做倒! 香港只有港式家具!! 一係就平實式的(e.g. 實惠、直銷、吉豬島), 一係就奢華式(e.g. 歐化、梳化倉...) 點解無呢d又外國又靚既style呢? 唉....

Flea Market Style - from Flickr.com
http://www.flickr.com/groups/fleamarketstyle/pool/

借據

尋晚肥肥阿媽攞左張借據出黎俾我同肥肥簽, 話借左三十萬俾我地買樓, 如果賣左樓要還番俾佢諸如此類....

駛唔駛呀!? 借錢俾個仔都要寫借據!? 咁養大個仔使唔使寫借據呀?
好呀....我知你係算住我呀, 由簽律師契果時已經知,
你可以唔借架, 無人迫你. 我亦唔一定要向你借, 我家下無錢咩? 我同屋企人一齊供樓投資仲賺得多啦!

你唔俾我賣樓, 唔俾我放租. 好好好....隨便你.
反正我無蝕底既, 就算丟空間屋供樓咪當投資law!
不過你想我同你個仔結婚生仔? sorry , NO WAY 喇!!!!
以後無野好講, 收綫!

(其實我仲有好多說話想講, 但怕肥肥唔鐘意聽, 都係吞左佢算.)

2010 走進符號的國度 - Yufuin & Hakata Day 6

早餐時間是九點半, 一泊二食的package當然不能miss左個早餐. 到了餐廳, 同樣地前菜已準備好等我地. 都是和式的早餐, 有茶漬類食物, 飯糰, 豆腐, 味噌湯....不過貼心地有DIY即煎荷包蛋同煙肉, 仲有白飯, 咖啡, 真係豐富到飽死!

check out時間係十二點, 食完早餐得番一個鐘, 拿拿臨去大眾湯浸下先! 我入去時一個人都無, 等我一個浸曬, 所以完全無話光脫脫尷尬情況, 況且對住d唔識既人都唔會尷尬呀!

浸完後就趕緊執埋d行李check out,先把行李放在酒店. 到火車站買了三點幾的回程火車票, 同樣都是由布院之森. 之後開始大解放shopping喇!由於之前怕買左要拎所以唔敢買咁多, 依家係時候解放喇! 買了些無無謂謂的東西, 又買了些手信, 去了狗主題的商店買左"豚耳"俾波波.

最後我地去左金燐湖, 果度風景好靚架, 空氣又清新, 好正!Lunch去左湖邊一間食手打喬麥面度食, 這間面店很旺場, 要稍為等一陣位先有得食! 店裡面d人個個清一色食喬麥面, 我地又叫左一份. 是凍食的, 不過我不太喜歡, 嫌佢太淡謬謬吧!出到去經過一間炒雪糕店, 忍唔住買左超美味的士多啤梨炒雪糕, 好正!

食完lunch就回酒店取回行李搭火車回博多站, 當然係入住番東橫INN啦! 今次都係住低層, 三樓, 算! check in後, 便步行到天神運河城Canel City, 酒店步行十分鐘便到, 很方便. 有一間好大的Comme Ca Store, 係一間由家品到衫都有的店, 有點似Muji, 裡面有些特價區, 有又便宜又靚的家品, 買了些碗碗碟碟for新屋用, 仲有一個餐墊, 400yen, 回到香港在francfranc見倒一模一模賣HK$85, 開心到笑!
這個mall仲有好多野行, 有超大間的無印良品, Mussy, Gap Japan, Zara等等等, 不過我都無買到.

這個Mall約9:30便關門, 我地又行番去中州, 諗住食前天經過的串燒放題, 點知去到又搵唔倒間野, 得番飲之放題, 可能我地記錯啦! 所以決定去一蘭旁邊的"備長串燒店"居酒屋食串燒.這間店的坐位設計又係好特別, 一個個卡位, 每個卡位都係L形, 擺法係令到客人看不到隔離枱坐左咩人!!又係諗唔明點解要咁做呢? 可能唔想俾人見倒你飲醉個樣吧! 哈哈!

雖然個menu有圖, 但大部份都是日文, 很多片假名....幸好這店有個女侍應說一口非常流利的普通話!(對, 是普通話, 不是國語, 因為聽得出有點京腔!)佢好細心咁逐樣食物解釋俾我地聽, 真是太好了! 這裡的串燒不貴呀!最平的雞肉串只是80yen!!!好平啊! 當然也有貴些的, 五花腩, 豚舌, 好味到不得了! 配一杯荔枝果酒, 爽呀!

這餐沒有吃得很飽, 因為一心諗住留肚去屋台食拉面. 離開串燒店又去了超市買手信, 買了士多啤梨回去(怎料最後留左o係釜山酒店唔記得帶走....). 從超市穿過紅燈區便是屋台, 前天星期五這裡人聲鼎沸, 到處都是飲酒耍樂的人, 怎麼今天那麼冷清? 原來今日每月一次的飲酒掃蕩日, 好多警察準備掃蕩, 有D酒吧索性唔開門, 嘩, 有無無聊d呀, 香港咁做一定俾人投訴到死啦!!!哈哈!!!

走到河邊的屋台(其實就在酒店旁), 第一間是最多人捧場的, 我地就選了這一間 - 一奄 (後來才知原來是最有名的屋台拉面). 見咁多人食拉面我地又叫左一碗. 一人一碗拉面, 當然九州拉面是濃濃的豬骨湯啦! 好惹味! 再架一碟串燒, 一支Asahi, 唔好以為坐街邊就平呀, 這一餐都要2500yen.....都幾貴架!

食飽飽便回酒店訓覺了!

2010 走進符號的國度 - Yufuin Day 5

為了搭10:45分的火車到由布院, 今天很早起床check out. 這邊東橫INN的早餐很一般....是日式早餐, 只有飯糰, 味噌湯, 面包及幾款小碟小碟的食物(茶漬類), 沒有我愛的煎蛋同腸仔....不吃也罷.....

約10:30到達博多駅, 正打算拿出車票入閘, OMG!!發現有一張車票唔見左!! 成4,500yen一張, 大鑊! (是咁的, 車票一set兩張, 一張是車票, 另一張是指定席料金, 要疊埋一齊入閘機先得, 而我唔見左的, 是其中一張車票) 可能是我昨天拿出來看時間時留左o係酒店度. 返去攞都未必趕得切, 肥肥這時便去找站務員(是一位漂亮制服女), 她知道後好似十分從容, 笑著把我們引領到lost & find, 跟那邊的一位職員說一聲, 她便拿出一張好似一早已準備好的後備車票給我! 嘩, 又會咁順利既! 真係好彩呀!!好感激啊!!!

靚女姐姐更親自帶我到閘口教我地點入閘, 真係好好人. 走到月台, yeah, 外形特別的由布院之森出現喇! 由布院之森係一架觀光列車, 所以無論外觀同內裡都同一般JR唔同! 好靚架~好適合去由布院呢d地方! 啱曬feel~

車程大約兩個幾鐘, 雖然車上面無娛樂設備, 但係沿途d風景好靚, 都唔算悶. 可能因為星期六, 差不多全車滿坐! 車內有一列餐卡, 有些好靚五顏六色的便當賣, 我見其他乘客都食得好滋味咁~不過唔肚餓所以無買到黎食law! 由於係觀光列車, 所以有d火車紀念品賣, 啱曬d鐵道迷. 而且去到一d"景點"時, 例如山呀, 濮布呀, 就會有靚女鐵路姐姐人肉拎個紙牌出黎走過個車廂做人肉字幕, 話俾你聽呢度叫咩名, 真係好貼心~最正既係靚女鐵路姐姐仲會拎個紀念牌同帽出黎, 逐一俾每位乘客拍紀念照片, 我緊係唔執輸啦! 好開心有一張同肥肥既合照啊!

12時半左右到達由布院駅, 這裡比較簡樸. 不過月台上居然有足湯(要俾錢的), 真係貫徹溫泉鄉的主旨. 而由布院亦被全日本OL票選最想去的溫泉第一位!! 哈哈, 我呢d OL梗係要看個究竟啦! 由布院的街道車不多, 憑著車站內取得的地圖, 再加埋之前跟網上地圖劃出來的手寫map, 慢慢找到我地間民宿-仙洞. 佢既位置位於金鄰湖附近, 都唔易搵架, 咩住兩個大背囊都幾吃力, 要行成二十分鐘先到. 三點鐘才check in, 我地放下行李便出外覓午餐去!

想吃點日式洋食, 肥肥呢個漢堡妖怪話要食日式漢堡. 走到近火車站的街道, 在一家可愛的雜貨點旁便有一間Yufuin Burger, 裡面只有六七個坐位, 我地就坐在靠窗的位置吃個漢堡, 味道同MOS Burger好似, 小店即叫即製, 都幾好味!

食飽之後便四處散步去, 這兩天天氣好得不得了, 天朗氣清, 唔會太熱, 午間氣溫約十五度左右, 走起路來舒服得很. 而且這個山谷空氣非常清新, 我同肥肥都不斷大大力咁索d fresh air! 好舒服啊! 由布院最有名的就是湯之坪, 這是一條開滿Kawaii le的商店的街道, 100%的店都是非常Kawaii le! totally迷倒所有女士們(包括我), 有手信店, 雜貨點, 果jam店, cafe....而當中亦有由布院相當有名的卷蛋店-B-speak.

這間店可說是由布院名物, 好多人都慕名而至, 這店清一色售賣兩款卷蛋(朱古力味及原味), 內裡只有鮮忌廉夾心, 售價是1,380yen(約HKD110). 一條無夾心齋卷蛋居然賣過百港幣, 但仍然吸引倒一眾OL排隊購買, 食慣蛋糕既我都決定買條試下有幾好味! 個包裝好靚架, 仲有兩包冰敷住驚你溶左tim!

為怕蛋糕會溶,我地決定先回酒店吃件蛋糕.房間已經準備好~是和式的房間呢!位於閣樓,只有我們一間房在該橦的閣樓.房間內用和式紙門分隔左兩個房間tim! 大的房間有中央放了一張日本式的暖爐枱,這個時候蝸進去真係好C服呢! 而右邊的小房放了茶杯set及衣櫃等. 我地決定沖杯咖啡, 享受一下卷蛋下午茶先! 卷蛋蛋糕有很重的蛋味, 明顯係用靚料, 夠fresh. 不過我就覺得乾左d, 唔夠濕潤. 好似燊師傅做的仲好食d啵!

在房間休息左一陣, 因為由布院d舖頭六點幾就會關門, 所以我地趕緊出去再打多個round,兼去唯一的超市買野食做宵野. 去到超市,買左一瓶米酒,包裝盒度教你可以溝牛奶一齊飲,所以我地又買左一盒阿蘇牛奶.當然亦買了好平既刺身啦!出到超市門口有一檔小檔賣串燒的, 我地又買左一盒燒雞軟骨. 好好味架, 未開飯就已經偷食左1/3喇...

返到去差唔多到食飯時間喇!我同肥肥原先諗住浸下溫泉先食,不過因為趕唔切食飯所以無浸到. 落到餐廳,有大半的住客都已經開緊飯, 我地算係尾圍喇. 被安排到窗邊的枱. 枱上已放好了前菜, 又係好靚果d setting,一碟碟細細碟唔同顏色的. 當然也有開胃小酒啦. 枱上印有一張是晚menu,有成十樣野食咁多, 逐樣逐樣慢慢上,侍應會介紹每道菜,未食到主菜,我同肥肥都已經飽左八成喇! 到左主菜 - 地雞鍋, 份量都十分大盤, 不過個鍋就好少湯, 好似好快會乾水咁.所以我地好快咁碌熟曬d雞先!d地雞都好有雞味喎!唔錯唔錯!食飽飽仲有雪糕做甜品,今餐真係大滿足呀!

在我地晚飯既時間,工作人員已經入左我地房幫我地鋪好床舖. 所以我地返到房間一個靚靚整齊既床鋪已經鋪好左在房中心.而且仲有兩件飯團放左o係房俾我地做宵夜tim!仲有張紙類似話由布院夜晚會有鬼,叫我地最好留在酒店食宵夜唔好出去喇,哈,好鬼馬喎.

到左我地浸貨切溫泉既時間,換好溫泉旅館提供的睡衣,就去左樓下的個室溫泉度, 可以俾我同肥肥一齊浸的!嘩,出面d氣溫凍到呀!我估一定低過5度!個室溫泉其實好似一間有浴缸的沖涼房,無咩特別.

浸完之後回到房間,原想抖一陣再去大眾湯,點知抖抖下訓著左,俾肥肥叫起身食宵夜我先知醒! 宵夜很美味呢,不過太眼訓了,沒能力去浸大眾湯就倒頭大睡一覺訓天光!