凌晨一時的班機, 目的地是首爾. 前往機場的巴士遇上屯門公路車禍要繞路而行, 差點誤了時間, 不過我同肥肥手快腳快, 準時到達登機閘等待登機之餘仲夠時間上陣網添!
韓亞的飛機都唔錯, d空姐都是韓國美女, 上機後已經周圍都係"chum chum chum" or"gum gum gum"既韓語聲, 果種感覺都幾興奮~
我同肥肥被安排了四個位的中間行, 咁啱隔離兩個位無人坐, 我同肥肥可以一人訓兩個位, 幾好! 坐位前有獨立電視, 但因為要把握時間訓覺, 都無咩點睇. 而飛機餐係炒面, 不過不失啦.
去到首爾, 因為行李要清關, 要提左d行李出黎再去domestic機位再check in多次, 真係麻煩. 不過check in 的counter都易搵, 無咩阻濟, 入到去閘口仲有個幾鐘先登機, 原先想訓陣, 但有一班中學生嘈住曬, 攪到訓唔著, 好煩!! 一程內陸機40分鐘就到達釜山金海機場, 到達時間約早上8:30. 時間好見使, 唔錯!
釜山機場的Tourist information center好好人, 英語溝通無問題, 仲幫我地寫左張韓文既紙條幫我地買airport shuttle bus. 去到shuttle bus個ticket counter就遞張紙條俾佢, 佢就知道我地要去邊(好似打劫銀行咁). Shuttle bus 5000won/人(HK$40), 約50分鐘到達釜山駅.
shuttle bus內有中英顯示站名, 唔怕唔知幾時落車. 由釜山駅行路到酒店約十分鐘, 揹左背囊行都幾辛苦. 一條直路只要唔行錯方向的話都唔難找到. 中央洞東橫INN的前台光潔企理, 唔錯! check in時間係4點. 但行李可以先放低. 俾多15000won可以做member, 做左之後有8折, 雙人房折左之後5600won, 好抵住!
之後行路10分鐘可到達國際碼頭, 買定後日去福岡的船票. 一張二人房船票要12000won, 好拿利!!!可能買船票的都是日本人或韓國人, 所以售票姐姐d韓語同日語都好流利, 但英文就麻麻, 雞同鴨講之下仲出錯日期船票, 最終搞左一段時間先離開~
之後搭的士去釜山最著名既漁市場-扎嘎其市場食海鮮, 果度好多海鮮檔(見頁頂相片),有單賣海產的, 亦有餐廳售賣海鮮, 大部份都由"阿珠媽"(即約40多歲的中年女人)經營. 見倒d阿珠媽一手拎爆條八爪魚個頭, 都咪話唔心寒.
我地根據飲食男女的介紹去到新大樓二樓度搵食, 果度格局好似街市熟食檔咁. 電梯入口第一間店的男侍應立即上前推銷, 佢見我手上拿著雜誌, 原來他的店就是雜誌介紹果間! 咁我地都唔揀咁多就進了他的檔口食我地既第一餐 - 生魚片大餐. 點了40,000won的刺身餐, 先來10多碟kimchi, 一碟碟細細的放滿成枱都係, 再來一大盤刺身, 好鮮甜美味!
食曬枱面上面d餸, 最後仲要來個海鮮湯, 把生魚一味兩吃, 個海鮮湯非常鮮甜, 再加兩個白飯, 飽得我同肥肥兩個都捧住個肚離開!離開新大樓, 便過對面的舊大樓看看. 裡面就是一般我們香港街市的魚檔格局, 不過每檔都加了一張枱俾顧客即食刺身. 不過這裡的環境濕立立不夠新大樓舒服, 而且我同肥肥本身諗住食鮑魚刺身, 但要10,000won/隻(hk$80), 同佢講價對方都唔願意減咁, 所以我地逛一逛便走了.
之後我地行過札嘎其市場對面的國際市場逛逛, 果度賣好多深水步feel的家庭雜貨, 好似光管呀, 雜物呀之類. 不過中間有條間好似街市咁, 有好多泡菜檔同街邊小吃. 行下行下又試下佢地d小吃, 試左韓式關東煮, 紅豆沙同士多啤梨益力多. 佢地d小吃檔有個特點, 就係d小吃係堂食的, 即係點左俾左錢就企o係個檔口度食, 食完俾番d簽/碗佢. 不過味道則一般而已.反且一杯杯鮮打的士多啤梨汁溝益力多, 就幾好飲~吃過之後肥肥體力不支, 嚷著要回酒店小睡. 我地就搭左地鐵回中央洞站, 回到東橫INN小睡片刻再戰南浦洞.
有感地鐵搭兩個站都收你1200won(HK$10), 我決定由中央洞行路去南浦洞(約一個地鐵站距離)以節省交通費.我們鑽進光復路的小巷裡, 一心要找旅遊書介紹的人參雞老店, 可惜找不到旅遊書上的那間, 但找到另一間同樣是50年老店的人參雞店, 價錢又唔貴, 便入去食了.
餐牌有韓日文, 有幾粒中文字寫住"參雞湯", 點菜沒問題. 一套人參雞湯飯12,800won(HK$100) , 因為我地諗住再食宵夜, 所以決定兩個人share一份. 不過一份餐的份量都好多, 又有一大堆kimchi, 食曬食個餐都飽左大半了. 雞湯飯的飯內真的藏著半條人參, 果然沒騙你. 不過我不好人參味, 但雞湯的味也不錯的!
食完之後我地去左附近的龍頭山公園, 聞說可以俯瞰釜山市夜景. 公園就在光復路有電梯前往(類似SOHO電梯咁), 不過上到去超級大風, 令人不想久留. 上面有個觀光塔, 我估會幾好view, 不過好像要收錢的, 不感興趣. 單在公園內看不到夜景(被樹遮蓋了景觀), 所以很快便離開.
回到南浦洞行街街shopping, 呢道以光復路為主要街道, 兩旁主要是連鎖店(e.g. Nike, Skin food...), 有點像銅鑼灣, 街道都很乾淨, 仲播埋流行曲. 而鑽進小巷則有很多個性小店, 賣的衫都很靚款又便宜. 我看中一雙高跟鞋約三百港元 (但款式似HK賣五六百元那些), 但因為怕洗突錢唔敢買住. 只是再買了些天婦羅同煎蔥餅等街邊小吃. 條街亦有些靚cafe及小吃檔, 亦有售賣老翻運動衫的街邊檔, 不過店舖大部份都收10點鐘, 一到10點就成條街好靜, 無野睇被迫離開.
原先諗住返酒店附近的烤肉店食宵夜, 但估唔到10點半已經收左!! OMG!唯有到燒雞店買兩件燒雞回房食燒夜啦! d燒雞都唔平, 但三四十蚊兩件雞, 不過真係炸得好香! 食飽飽宵夜就睡覺了~
