北上逛宜家

終於補番張回鄉証,可以返大陸.星期六去左南山區的宜家逛逛,由深圳灣過去亦好快, 南山區d街道好闊落好乾淨,同羅湖相差很遠. 搭免費接駁去到宜家,果度感覺好似外國d warehouse咁,好大好舒服. 細心留意會發現有d產品平過香港好多(例如有一套沙發HK賣五千幾,深圳Ikea只賣三千幾,換番HKD轉運落HK都有賺).

佢個自助取貨區好似d倉庫咁, 好大.

行到差唔多八點, 過左對面迪卡濃運動用品店行, 肥肥好興奮,而我就一般. 約八點半離開, 剛剛在Earth Hour時上車, 估唔到大陸都有響應.條街d building都黑曬.可能南山區d人都特別有文化.

搭40蚊的士去到海上世界, 去番最鐘意既清學鐡板燒, 150人仔任食, 又可以坐吧台位欣賞師傅席前表演. 人又唔多唔使迫迫夾夾, 食得好舒服. 食到十一點先私私然咁走人....

搭的士返深圳灣口岸, 個的士佬呃我地深圳灣收十一點, 好彩我地唔信佢堅持要去, 原來收十二點, 哼!想呃多我地幾十蚊無咁易! 出到關搭B2直達藍地, 唔使一粒鐘返到屋企, 爽!

小Lucky

三月二十日, 有4個小Lucky.

1. 太喜愛傷心酸辣粉, 星期四才剛吃過, 星期六又忍唔住去旺角再食過. 星期四的口水雞沽清了, 這次終於食倒, 正! 在香港花幾十蚊可以食倒咁正宗既四川菜, 實在太開心! 一解我無回鄉証返唔倒大陸之苦....(仍然好掛住絕味鴨脖子)

這裡的麻辣豬耳也做得不錯, 幾爽口.

2. 去左尖沙咀的喜來登physical做每月一次的免費facial, 今次果位姐姐做得我好舒服啊, 唔似得沙田果位咁hea, 今次幫我針清得好仔細, 而且做足一個鐘, 唔知係成個physical好左(應該唔係), 定係我今次好彩呢~呵

3. 一個人行街街, 行到去新太陽的Anges b Delices, 入去運下吉搞下人地個復活蛋, 個店員竟然攞左粒"b"字朱古力俾我免費試食喎, 嘩, 成十幾蚊一粒架! 真係覺得好抵呀!!!! 講真, 我又點會花十幾蚊買一粒朱古力呢......

4. 新太陽的b+ab做三折大減價, 都是一d過季衫, 啱曬我想買衫去歐洲之旅, keke,買左四樣野都係五百幾蚊, 抵呀~

肥肥笑我係師奶仔, 我就覺得呢d小lucky都幾好呢.....

近況Update

最近真係十萬樣野忙, 突如期來買房子的事, 揀樓、 成交,、地產簽約、估價、申請按揭、律師樓簽約等等, 很多很多事要忙, 而且實在做起來不是我以前想像中那麼愉快(以前都會幻想自己將來的居所會點點點點), 尤其要同99交涉是十萬個難頂, 真想快點完事不用再對住佢 (會嗎?)

幸好肥肥幫手搞呢樣搞果樣, 真係幫輕左好多, 起碼有些事要辦公時間做的他都可以幫忙....而且按揭已批, 下一步便要搞新屋裝修的事, 可以自己決定傢私擺放、牆身顏色、地磚款式等等, 切切實實的實現以往在行IKEA的幻想, 確是很興奮的說! (至少現在還是很興奮)

新居的事確實耽誤了我做歐遊之旅的行程計劃, 而且歐遊之旅比以往的東南亞自由行更加複雜! 要同時兼顧球賽、美食、景點、攝影得各種主題, 加上銀根又緊拙, 真係plan到頭都爆呢! 關於planning的事有少少tools想share, 另一篇再詳述~

下星期日係肥肥生日了, 因為要留備資金, 所以只好節省點過. 或者我會下廚煮番幾味吧~唔知呢~~

春雨

工聯會的外拍. 在一個下著微微細雨的星期天.

小水盆泛起了漣漪.

沒有模特, 那些攝影指導只自顧自影相.唯有獨自影下花花草草.

結果只拍了一個早上, 下午便溜走和楊看電影去.

援膠女郎 Airdoll

上星期同黃及羅子去左百老匯電影中心睇<援膠女郎>.買票時看錯時間以為是九點開場, 去到門口才發現原來是9:55, 結果睇到十二點先返屋企.以為藝術電影無咩人睇, 原來都幾full喎. 可能大家都被題材吸引吧!

以下內容涉及電影情節, 不喜勿看.

先談片名, 這是一套日本片, 日文叫<空氣人形>, 港譯<援膠女郎>. 這個譯名可說是很爛.電影內容同援交少女完全拉不上關係, 頂龍同塑膠的"膠"有關(因為主題講吹氣公仔), 但"膠"字實在俾網民玩得深入民心. 如果說同網民(or some people will relate to 宅男/隱青)扯上關係的話, 還可以說得過去.不過, 我還是覺得直接叫番做<空氣人形>會恰當d.

談談日本電影. 我起初是被電影的劇情吸引, 吹氣公仔變人, 一個現實化兼難以啟齒的成人物件加科幻元素, 題材方面甚有看頭(也甚具商業味), 忽略左這其實是一套藝術電影(即非主流電影),看過電影後, 感受到導演要帶出更多的message,絕不像商業電影段沒帶腦子看戲嘻哈兩小時便算(喂~我有帶腦子的啦!).

其實我蠻喜歡這種電影. 心裡覺得十分耐看. 而我對日本非主流電影的經驗是比較缺乏的.印象中只有很久以前看過一套極好的電影<令人討厭的松子的一生>外再沒看日本電影(當然這是兩套風馬牛不相及的電影),兩套電影其實都不錯的說.(不過, 日本電影的節奏都很慢)

談談電影主幹, 劇情不多說,大概是吹氣公仔變人後, 由對世界好奇的新生兒變為厭倦社會以自殺了結自己的生命.當中帶出社會裡所謂的"人"其實都只是空心的,彼此之間都是隔膜.在香港, 我倒不覺得人際關係的疏離得如此嚴重.或者日本如是, 又或者是導演把局部的"腐壞點"放大, 令觀眾更深刻. 劇情的發展, 未段的悲觀思想令我有點意想不到, 或是因為頭段描述新生命的好奇美好太幸福, 又或是我慣性看"大團圓結局"的電影所致, 令我踏出戲院一刻心情好像蠻沉重的.

又談談電影的其他, 一開頭有描述男主人同吹氣公仔咩咩的情節, 嘩, 我真係覺得好變態. 畢竟這是我從來沒幻想過的畫面(就算睇AV都唔會有男人同吹氣咩咩的場面吧!)而且咩咩既時候仲發出塑膠磨擦的吱吱聲....

又有變態宅男的片段, 去Maid Cafe, 愛裝人裙底, 仲買個Maid figure用camera影住在電腦睇番對住打飛機, XX癖令人打冷震.

後尾男主角的結局, 套戲好似由愛情電影變左做鬼片咁....

藝術電影, 經常以黑色幽默的方式去表達. 以下幾句又幾深刻..

「因為我有一顆心，所以我說了謊」

「我曾經擁有了心，因此我痛苦過」

片中引述一首詩, 看完整套戲後睇番, 嗒落有味.

「生命は」 吉野弘

生命 可能是 無法以自身之力成功的完滿

而被創造出來的 好比花

就算將雌蕊與雄蕊聚集 也不足夠仍需昆蟲與微風的造訪

連繫起雌蕊與雄蕊的關係生命本質上 便懷有重要的匱乏

並因他者的存在而完滿

世界 或許是 所有他者的總合然而

我們彼此 對於自身這份重要的匱乏 毫無自覺

也未曾被告知原來我們是被播散的種子

總是冷淡的距離然而有時

再難忍卻也能維持住的關係就這樣

世界被巧妙的構築了

這是為什麼?

花盛開著 近身一看便發現像馬蠅這樣他者的存在

在光線的纏繞中飛舞著
曾幾何時

我也成為誰的馬蠅吧？

曾幾何時

你也是得以完滿我的那微風吧？

P.S.我寫的9up實在太爛, 在網路上找來這篇看後感. 也許你才會看得明白.

空氣人形 (援膠女郎) - From SiU NA Blog

數字遊戲

豐澤增分店派300萬花紅

【明報專訊】經濟不景下，減薪裁員消息頻傳，有1200名員工的豐澤電器卻向員工大派「定心丸」，將發放共300萬元花紅，激勵士氣；又表示暫時未有裁員計劃，並會繼續按計劃招聘人手。豐澤本月更會逆市擴充，在上環及尖沙嘴 多開兩間分店，進一步擴大版圖及吸納更多自由行旅客。
金融海嘯突然來襲，令本港零售業大受衝擊，豐澤董事總經理吳弘宇表示，2008年第四季的營業額較前年同期下跌，就連12月聖誕新年旺季亦未能挽回銷售額，主要是商業旅遊旺區受到較大影響。不過幸好上半年業績理想，2008年全年營業額仍錄得輕微升幅，業績符合預期。為鼓勵員工，本月會向52間分店約1200名員工，發放共300萬元花紅，但不肯透露花紅額有否比前年增加。
全文見 : http://hk.news.yahoo.com/article/090111/4/a5so.html

300萬花紅分俾1200名員工, 每人平均只有$2500. 四分一個月花紅都無. 仲好意思講出泥俾人聽?
利益申報 : 我並不是豐澤員工, 只係睇唔過眼而已.

笑爆嘴@08勁曲金曲

今朝同同事食早餐時聊開了, 先知道原來十大勁歌金曲有咁多笑位,坐低即刻上youtube捕捉精華片段.
呢d笑爆嘴既片段,真係睇十次都覺得咁好笑. 卡卡卡~~~

第一位梗係全城熱話關心妍攞錯獎,學荒失失奇兵2的長頸鹿話齋,直接要掘個窿等死算. (記得留意埋志偉個忍笑樣....)



崔健邦都算執生, 即刻同佢兜. 反觀志偉就忍唔住笑...
放心啦~香港人最善忘~過一排又一條好漢!! 關小姐, 你訓醒未呀!?

另一個笑位, 本身都有機會角逐笑爆嘴大獎, 但係俾關小姐搶左...之唔係黃宗澤同陳奕迅合唱K歌之王.


緊張都夾曬腳個樣+狂走音. 真係"登"佢可憐. 好似俾人擺上枱咁. 老公婆都好明顯係無記既犧牲品.
又係放心啦王生, 大把妹妹仔鐘意你, in love with bosco, yeah~
(Quote from 某八掛雜誌 : 全角度走音 )

相比起王祖藍, 雖然都係有d窒住窒住, 但係d音都到倒喎. 我都幾欣賞佢.