前一天已經買曬d材料, 醃野整野搞到凌晨三點先訓!! 今次我係跟住Jacky Yu的receipe做的:
1.奇脆檸檬葉燒雞
- 根據食譜要買檸檬葉同香茅, 但搵極都搵唔倒檸檬葉, 最終俾我在超市內的冬陰公湯包內找到檸檬葉同香茅, yeah!
- 前一晚已經要醃定隻雞, 用保鮮紙包住放雪櫃一晚, 焗時先用120度焗90分鐘, 再轉270度焗10-15分鐘, 用低火慢慢焗熟隻雞, 果然d雞熟曬而且d肉仲保持好嫩滑, 但係之後果個步驟原本係可以焗脆d皮, 不過都未達到我想果種好似燒鵝咁既效果, 今日問過廚神話原來醃完之後要吊乾d汁(about 1 hr)先焗, 咁就可以做到燒鵝咁既效果, 等我下次試下先!!
- d香茅同檸檬葉焗出黎好夾好入味, 唔錯架!
2. 香蔥泡菜海鮮餅
呢樣餸我改左少少, 由原本既魷魚改左做帶子同蝦, 超市廿幾蚊一包急凍海產, 前一晚放上格雪櫃解凍就得! 呢個菜色的材料相對易搵, 全部都可以在大型超市買到!
不過第一次處理麵粉, 好驚唔適處理份量, 不過原來跟足食譜做就得, 做左出黎好好味, 大家都讚好!
但係今次個份量好多, 下次要減半先!
3. 沙爹蛋黃蝦
呢個餸相對無咩驚喜, 可能因為我無用到"金不換", 我當日先知原來"金不換"即係九層塔, 買唔切! 而且d沙爹醬好似落得多左d,咸左少少, 不過都OK既!
4. "囍有此梨" - 桂花陳酒燴啤梨
呢個甜品前一晚已經整定, 放在雪櫃內到除夕夜就攞出黎食就OK, 材料用了桂花陳酒(佳寶有售), 橙皮, 青檸皮, 啤梨, 肉桂粉(食譜說要肉桂片? 但找不到啊, 只有肉桂條及肉桂粉, 反正都差不多, 買了肉桂粉). 加埋一齊加糖煮20分鐘就OK, 浸一晚之後好入味啊, 大家都激讚啊!!yeah!
當晚9ris仲整左清酒煮蜆, d蜆又大隻又好味, 羊就帶了新鮮生蠔, 要三十幾蚊隻, 又肥美又creamy, 真係齒夾留香啊! 加埋白酒相配, 超正!
沒有留言:
張貼留言