一人前是日晚餐

肥肥原定今天回家, 可是佢又要留在大陸不能陪我了. 今天只有我一個人食晚餐. 這款一人前晚餐是我近來很喜愛的配搭.

1. 灣仔碼頭水餃(9粒裝) - 9-10粒裝的水餃份量剛剛好, 一包約300kcal, 有蝦做餡, 不太肥而且有暖湯. 是冬天窩心之選. 旁邊是水餃的調味醬, 由桂林辣椒油+少許麻油+少許豉油自行調配, 好惹味的.

2. 青瓜蟹棒沙律 - 三條小青瓜切片, 拌上吉豬島日式芝麻沙律醬(這個是重點!! 一樽沙律醬索價$37!!但真係好好味, 令沙律生色不少!!)再加蟹棒. 五分鐘食得, 方便好味.

3. 滷水豆腐 - 這是吉豬島現成食物. 無技巧可言. 一般我會自己做蒜容凍豆腐, 不過今次用現成的.

4. 養生plan說每天都吃生果, 今天的生果是新鮮菠蘿片3片, 好甜好多汁.

今次晚餐份量多左D, 吃到一半已很飽, 下次可以skip左豆腐.

荷爾蒙

不知是不是我由我開始養生生活以來令我的荷爾蒙起了變化, 除了每天到6點會特別覺得很肚餓之外, 最近很愛肥肥 (為什麼"最近" 很愛呀? 不是應該一直都愛嗎? 這"最近"是何時開始架?.....), 我每一刻都很想念肥肥, 好似一放工就要痴住佢, 廿四小時都想攬住佢咁, 連佢要落街買煙我都唔捨得咁….

在此我都講下我的養生生活plan (開始了2星期)
1. 每天吃生果
2. 每星期煲一次湯
3. 每星期一次自家煮 (遲下肥肥阿媽回港可能不用自己煮了, 索性去佢度又食又拎)
4. 每星期食2次龜苓膏
5. 每星期做2次gym

一定要做倒! 我要做一個由內到外都健健康康的中女!"

昨天和楊食晚飯了, 很可惜她放棄了她的置業大計, 又係既, 依家d樓咁貴, 都不是買樓的時候啦, 我只是有點可惜未能和她一起做Tuenmunian喇…依家我同肥肥一齊有個瓦遮頭, 我覺得好有安全感呀, 起碼我地活到老都有個容身之所呀, 又可以諗下樓換樓喎, 細屋搬大屋再不是空談喇.

楊說她找了文洛買了一個三年的儲蓄基金, 要儲十幾萬三年後到日本留學, 我覺得好偉大的理想啊, 辭去工作一人隻身去留學, 對我來說好夢幻呀…我係咪都應該做一個大d既計劃俾自己呢?

生活

星期五要回大埔交家用, 同肥肥一齊回去了, 媽打不斷狂鬧我用D錢去日本旅行都唔結婚, 我決定用"逃避" 同 "充耳不聞" 既態度去面對佢, 同面對呢件有關結婚既事. 說真的, 我都唔知點樣去面對呢件事. 一面覺得不值得花咁多錢去做一場show,有錢自己使左佢唔好? 但就咁簽個字又唔甘心, 好想著靚靚婚紗影靚靚相有一場浪漫的婚禮親友的祝福啊....講真如果我有幾百萬我唔介意(好樂意)去做一場大龍鳳, 但肥肥根本無錢, 係一個仙都無果隻, 由零開始, 我寧願唔開始.

想不通. 唯有繼續"逃避" 同 "充耳不聞", 直到想通為止吧...下星期肥肥阿媽回來了, 四大長老夾攻, 唔好迫我呀, 我唔想聽倒任何問我幾時結婚或者係責怪我用曬D錢唔結婚既說話, 我唔想行最後一步(即係賣樓分錢搬回家), 唔好迫我......我唔明個女同人同居對於佢黎講有幾大幾嚴重, 覺得好醜嗎? 覺得好難堪嗎? 如果係騙個故事說個女同朋友一齊住都可以呀.

星期六日, 沒有約任何人, 沒有計劃, 連facial都唔使做. 很好. 很喜歡這樣. 在家裡呆著. 上上網, 看看download回來的電影, 呆呆的望窗. 唔使化妝, 唔使social. 好好.

同肥肥去ESSO入油時發現自己的積分夠免費換一包8公斤金象米, 所以貪平換了一包. 想真點八公斤真係唔知幾時先食得曬 (過年前才啱啱買左包5公斤米), 加上我家的米缸只夠容納6公斤米....所以要多D煮飯開始銷米大行動先得!! 今日就做了好好味的臘鴨脾菜飯, 加埋肥肥好鐘意既西芹雞柳, 蒸了一條倉魚, 簡簡單單又一餐.唔錯.

有時發夢

近排發左一d好奇怪既夢.....

有一晚發夢夢見羊結婚了 (Sorry沒有看到新郎是誰), 她的婚禮在陽光下的草地上進行, 我仲同文洛一齊去......

另一個夢是我出左部I phone 4......

再另一個夢係我手上的Gel甲變曬透明色.......

真係好多奇怪的夢!

硬頸

我承認我個人很硬頸, 尤其是肥肥說的, 我特別唔鐘意聽佢支笛.

我問肥肥: 「我去學車好呀, 定係出部唉風科好?」
肥肥話: 「出唉風科啦, 因為你唔適合渣車, 你零EQ, 會車死人/自己。街上任何一個人的EQ都高過你！」
我答: 「好呀, 我就是要學車！」
肥肥: 「咁你又問我?」

其實明眼人都知我係唔憤氣佢話我差. 好似差到地底泥咁. 其實佢可以包裝下佢講既野呀.
不過其實我都係講下. 邊有咁多錢. 其實錢唔係無, 係唔夠同時達到咁多個願望姐!
我就係唔鐘意肥肥個人, 未去計劃就潑人冷水. 唔係做樣樣野都要幾百萬開頭先可以做的, 可以先做個budget breakdown, 再諗下點樣周轉d錢, 同樣都可以做倒架麻.....(係, 我唔敢話我啱, 因為我都係一個大花筒, 個個月洗曬d錢, 但係青春有限啊!)

等我列一個wish list出黎先:
- 好想去京都睇櫻花, 萬事俱備, 只欠東風. 點解叫萬事俱備? 因為1. 我6月前有7日假要放 2.有平機票, 1人只需$1960 (連稅, 經上海轉機去大阪) 3.3月尾日正正係櫻花盛開的時候 
為什麼只欠東風? 1. 錢 (不過其實我4月會出花紅啊, 加上日本消費大部份都可以用信用卡的, 周轉一下應該無問題) 2. 人 (肥肥話無錢, 唔去, 楊/ iris又唔去, 無人陪我去)
--> 不如自己一個人去, 好唔好呢??

年初一至四

好! 記錄一下年初一至年初四的事, 忙到好似無休息過咁......

年初一, 第一次派利是俾樓下的看更, 感覺自己好似大人咁. 一早回到大埔拜年, 老豆俾左封大利是我, 真係開心. 之後同肥肥返上水爺爺度食盆菜, D盆菜年年都係一樣無咩新意, 不過旋風式掃一輪利是都幾開心.

年初二, 又係一早出發去肥肥的舅父開的餐廳度食下團年飯先. 相比起我地姓崔一家, 肥肥屋企斯文得多. 飯局中肥肥兩個最有錢的舅父互相吹噓......我猜肥肥一家移民美國, 或者都係同親戚比較的其中一項吧! 肥肥舅父開的餐廳看起來都不錯啊, 心裡想可不可借用作為我同肥肥結婚的cocktail party呢? 要等肥肥媽媽返香港再問吧.....

年初三, 超累透的一天. 崔仲賀同老豆媽打, 仲有婆婆公公一齊過黎我度食我整的午飯. 媽打驚我整唔掂早少少過黎目及住我整......我超犀利, 整左7碟餸, 蠔豉炆冬菇, 又自己蒸雞切雞, 蒸魚, 蒸水蛋, 煎開邊蝦, 仲有腰果, 不過俾我焗到焦曬, 最後都係買即食腰果搞掂, 早知一早就買即食食, sign左我30蚊......
食完洗好曬碗都4點幾, 肥肥d friend失驚無神又話要黎, 搞到我得登又要撲出去市廣場買餸, 返黎又要洗切, 好彩黑仔一家帶埋賓賓黎幫手, 有賓賓實在太好, 食完飯un un腳唔洗洗碗就得. 今次黑仔帶埋心心同老婆黎, 佢老婆都無咩點, 普通女人一個, 不過今次多野講左, 我個人同D表面人講表面野都ok既, 傾倒兩嘴. 佢個女"心心"都幾得意, 係咁攞個公仔俾我, 自己攞番, 不停轉來轉去, 好似波波咁, 佢都算OK肯同我玩, 不過佢一接近肥肥就扁曬嘴想喊咁, 我估都係因為肥肥個樣似怪獸怕左佢law, 佢都係無咩細路仔緣.

年初四, 今日去法國醫院探剛生產的超人kaka, 無錯呀, 佢個8磅巨B年初二出世了. 我地4個梗係立即去探佢啦(咁啱4個都得閒, 平時要約見面都要排期一個月). kaka形容生BB的痛的程度係"地獄"咁痛!!(平時kaka都好tough架麻!!)真係俾佢嚇親搞到我都唔想生啊!!聽完個過程之後我覺得天下間所有媽媽都係超人啊! 不過學佢話齋, 其實生仔果下都已經騎虎難下.....(計我話由懷孕起已經騎虎難下了)....kaka老公幫個仔起左個足球員名字(佢老公姓"施", 不妨估下) -_-" 私家醫院D服務都算係咁, 我也可以隔住玻璃睇BB, 佢都幾可愛架, 不過真係好大隻!!佢身長有5Xcm長, 真係唔明咁大隻點室落個肚度架....

2日大的CBB

之後出尖咀去the One睇我愛香港開心萬歲(個名好爛), 同楊黃去別府食野, 楊諗住同ryan到屯門買樓, 期待佢地都係為Tuenmunian(屯門人), 哈哈. 套戲真係夠曬無喱頭, 無無聊聊笑一餐都幾好既. 我第一次行the one, 好多日本牌子的店, 其實shopping都唔使去日本啦, 香港咩都有lu.

諗起生仔, 生番個下一代都幾好(當然唔係依家啦!!), 但係見倒肥肥果副德性真係有D灰心, 無論我對佢講幾多次都無用, 叫左佢唔好飲酒, 之前又話肝酵數過高入院, 戒左兩三個月之後依家又回復以往飲好多酒食好多煙.....打佢駡佢都叫唔聽, 諗起自己下半世要對住呢個人, 真係有D灰心.....lala話呢D係我自己揀既無辦法....唉......

自家煮 - 年三十晚團年飯

兩家人的做節飯已於上周未周日食了, 今年的年三十晚大除夕飯, 就在家裡我同肥肥兩個人食. 肥肥好堅持年夜飯要好有氣氛, 又買吉擺全盒(仲買埋壇香tim!), 又話要整過年餸, 我自己就覺得只有兩個人無咩必要搞咁多野, 煮年夜飯D傳統餸又麻煩我又唔識煮....唉.....佢咁有興致我咪煮下law.....

 結果只有兩個人, 卻做了6樣餸....真係癲...

六個餸....兩個人得兩個胃ja

第一道菜是魚, 象徵年年有餘, 意思真好, 希望我兔年的戶口都係一樣, 月月有餘.....-_-"

這條魚是肥肥買的, 他說我平日買的是二十元的收檔淡水魚, 過節要食好D, 買了一條70大元的紅鮋, 幾新鮮彈牙.

之後還有百佳特價超大虎蝦($95/盒,每盒5隻) ,做法是開邊煎, 吃是不用用手開殼, 可用快子打開, 很方便, 又啖啖肉.

再來是肥肥主理的過節餸, 南乳池菇, d池菇有d苦, 南乳煮齋有點太咸.......

跟住仲有我做的冬菇炆海參, D海參化曬唔見左, 不過個冬菇雖然炆得不是太淋, 但都OK呀,第一次整冬菇算係咁啦!加埋D乾瑤柱, 唔打得都睇得呀~

另外仲有一隻雞同茄汁蝦...這一餐算係咁啦, 我俾自己75分, 第一次做過節餸, 還算有模有樣吧, 只係欠一個湯, 不過太花時間了, 如果有埋就perfect!

波波同大家拜個年啦! 祝大家兔年行好運! 兔氣揚眉!!

I 瘋 4

今日同肥肥食大家樂, 食飯時肥肥說 ; 點解街上面d人只係用2種手機, 一係IPHONE4, 一係"傻瓜電話"<----me. 無人用3G/2G iphone.....
我答佢, 咪好似細個咁, 人人著波鞋要著NIKE/ADDIDAS, 無人會再著Yasaki.....人有我有, 幾時都係咁既心態.

我的結婚式, 也是差不多的狀態, 很灰很想逃避, 我自己都攪唔清究竟我係抱住人有我有的心態, 或是我心目中的婚禮是怎樣的, 好頭痛....