失控的晚裝 - part A

自從試過掛之後, 有一天忽發奇想 : 自己穿旗袍出門可以嗎? 順便可以做敬酒衫喎! 於是我又發揮seaching的偉大力量, 不斷四出尋找旗袍!

第一個尋找目標 : 當然係已confirm婚紗的Mariee啦! 我記得她們有一兩件旗袍出租的. 因為我已join她們的package, 所以是任試的. 穿上旗袍之後, 整體覺得自己穿旗袍的感覺還不錯, 很修身, 亦很高貴, 比之前穿晚裝更有味道. 覺得有點像滕原紀香. (愈講愈多大家要嘔了 :p) 但係件衫有點太窄了, 而且被我看到pat pat 位有片lace破了, 仲要係deluxe款, 要加$26XX....好貴啊.....再加上小拖尾款, 不可能做出門旗袍的.....想著想著, 不作出門旗袍, 單用來敬酒也可以啊....

試完之後, 思前想後, 沒有即時confirm. 我心有不甘, 又再四出找旗袍試穿. 因為事出心血來潮, 決定一天放工及星期六下午一個人逛逛尖沙咀婚紗街的婚紗店有咩收獲, 結果如下:

1. Vanessa L. Couture - 為了經常於雜誌曝光的一件露背旗袍而來. 預約了放工的時間一條友衝上去看. 小小店內放了很多衫. 見到這件旗袍的真身, 有點失望, 整體很多珠片很誇張, 我的style穿珠片衫很老氣. 而且亦很舊. 而整間店的衫都是閃爆你的款式, 完全不行. 很質疑網上的評價.
再者單租一件都要二千幾, 仲要收$500試三件的試衫費. 好憎d婚紗店收試衫費, 有寶咩!? 頭也不回便走了.

2. 百利商場: 地下數間. 沒選中的關係, 憑記憶講番個名.
A)Charming image - sales態度十分熱烈, 見我一條Lan都好主動咁招呼我, 仲免費試身tim! 其實一般婚紗店都好少旗袍款, 於是我改口說尋找敬酒晚裝. 試了一件小露背的旗袍款, 同一款於百利數間婚紗店都見過, 穿上去都幾修身幾正, 這店的款式都幾有款, d衫幾新, 有D設計感. 於是我又試了一件頗誇張要穿裙撐的晚裝, 好在我試下, 一試就知ball gown款唔啱我, 同時呢D港式feel design都唔啱我.
B) 二樓一間超小晚裝店發現同Mariee 一模一樣款(90% match)的紅色旗袍, 度身訂造價都係二千六.
C) 地下東方儷人-這家店的門面好舊式, 內裡的sales(店主)係一個中年女人 我被櫥窗一件旗袍吸引入內. 店主不斷讚美自已的裙, 又說自己是芝柏出身, 手工特別好. 當時我都幾buy佢. 尤其係她取了一件旗袍出來給我試穿, 天啊, 非常fit我的身形, 而且大拖尾及整件衫佈滿閃釘珠, 整件衫閃閃生輝(閃得來不俗氣(.....加上單租只是$14xx, 很合我筆直.....差點忍唔住confirm了!! 不過都係忍住先, 回家(不是, 是一離開店便立即用iphone)上網查一下這間店的來頭, 發現很多說這間是黑店的劣評!! 嘩, 真係租又死, 唔租又死喎.....

3) 金巴利道眾多婚紗店 - 同樣是放工時份一個人walk in行. 漫無目的, 邊間有空就入邊間.
A) Marry Me - 因為地下有傳單員被推銷上去望下, 旗袍款式少其他衫又唔啱feel, 望下即走. 樓下果兩間都係同一原因被out. (全部無得walk in trial, 不過都有free trial, 但要預早book, 即使佢無人都唔招呼你試身, 覺得你白撞咁款)
B)希臘女神旁的台灣婚紗店(不記得名字)- 第一次進台灣婚紗店, 連d sales都係台灣人. 俾左個ipad我睇相, 又再發現有Mariee一模一樣的旗袍(今次係100%match), 因為上次在Mariee試時事隔太耐張相又影唔倒背隻, 所以再試一次看看(walk in free trial 2pcs ok). 今次唔知係我瘦左定係咩原因, fit 身D, 但係正面望落真係有點齋.....再試另一款前短後長大拖尾公主feel晚裝，著到我隻腳趕粗！完全唔掂。。。(價錢單租約$26xx)
Ｃ）新婚情報Noel Chu - walk in入去有個個feel成個肥媽既人招呼我, 佢有幾件鎮店之寶modern Chinese旗袍晩裝，睇相簿著得Model幾靚, 不過價錢貴得嚇人, 仲要收試衫費.....OUT!

單單看我在尖沙咀區的婚紗店走訪紀錄, 就知道我把這事情搞得有幾失控了. 總括而言, 尖沙咀區的晚裝質素都比較common及港式, 同我追尋的歐美style有出入. 不過價錢較易接受.

下一篇有part B. 講述中上環區晚裝尋找過程(更失控的)

My wedding shoes

好久沒有update blog了...無計啦, 我諗野五時花六時變, 諗得來未blog已經變左心了, 所以近排好少update(尤其出左iphone後就減少左開電腦啦)

最近在找婚鞋, 在Taobao看過幾雙, 都沒有買下. 又自己逛過尖咀的DYOS, 出名做訂造婚鞋的專門店, D款都OK, 但動輒都over$700, 我怕買來影pre-wedding粗著有點不值, 所以都無買到.

上星期六同肥肥行開屯市, 見倒STACCATO減價喎, 有一雙銀白色的高跟鞋只售$399呢(我印象中Iris在Joanna wedding時好像穿過類似款式). 呢個款真係百搭喎, 又可以襯婚紗, 又可以襯晚裝~高度約3寸, 啱曬我呢~(我不能穿太高啊, 太高會高過肥肥的~)

暫時打算做孖精姊妹時及pre-wedding時穿, 如果無穿無爛就Big Day時都著佢! YEAH!

試掛記

今日一早被媽打的電話叫醒, 說舅父帶埋BB返大埔問我有無興趣返去睇下佢. 反正沒事做又好耐都無見過婆婆佢地便回去了, 順便拿回做蛋糕的用具. 烈日當空返到大埔真係成身汗, 婆婆今天好好餸, 又雞又冬菇又花膠湯, 飲左4碗呀我! 表弟都幾聽話, 算乖仔, 都幾可愛架!

之後問下媽咪有無興趣陪我去睇下裙掛, 佢OK喎. 咁我地就一齊出左旺角. 先到之前在網上搵過評語不錯的"永隆繍莊". 其實前一天放工都去問過下價. 我覺得價錢OK. 有相薄睇, 阿姐幾好禮貌. 不過睇相薄都係多餘的, 因為D掛件件都唔同, 所以直接試上身仲好, 主要試中五福同小五福.


   其實大中小五福係以多少金線的意思. 最多金線是大五福, 最少是小五福. 試的時候覺得小五福比較清, 無中五福咁俗氣. 但返屋企睇相又覺得中五福看起來貴氣些, 朋友亦覺得中五福較好. 而潮掛我試的時候覺得好OK, 感覺好young,但朋友的評語都覺得潮掛好怪, 同埋怕以後睇番會娘爆(好有point!), 好彩全部都無租到. 阿姐很好, 我地話考慮下走人佢都保持90% nice的態度(只係俾左少少說話我地叫我地如果睇啱點解唔book埋), 我都幾LIKE佢.

之後媽打話唔去佛堂陪我睇多間裙掛, 心諗冠南華果D咁貴都無可能join架喇, 不如去金都試下潮掛. 我地先去朗豪坊食D野, 我都估倒媽打會想食italian tomato, 因為我知佢係貪新鮮. 食過意粉同pizza,就再去金都了. 一入金都第一間"榮X禮服"(不開名), 有好多裙掛show出來, 我問下有無得試, 佢竟然話要俾左錢先有得試!? 無可能啦下麻, 個阿姐D態度又勁差, 真係搵鬼租佢D衫. 之後又經過轉角的"喜X登", 經過時個阿姐好熱情叫我地入去, 佢地全間舖都做奶奶衫, 阿姐好出力咁sell我阿媽試衫, 好似好咄咄逼人咁, 好hard sell. D衫超級閃爆你, 好common的奶奶衫. 我覺得好易上當, 所以都無試到, 純粹當係俾媽打感受D奶奶衫先.

打俾孖精問佢租潮掛果間係邊, 點知佢講俾我聽果間好似搬左舖, 搵唔倒. 行下行下又經過一間叫"濃情". 佢地又有潮掛又有奶奶衫. 價錢仲好划算. 而且的sales的態度好好人, 所以跟左佢去隔離愛都10樓的陳列室試衫. 佢有好多好多衫, 阿sales姐姐好出力咁幫我阿媽搵衫, 但係媽打都幾奄尖, 可能佢被樓下果間"喜X登"攪到佢都唔係好清楚自己想要咩. 找到十幾件出來都無件啱, 終於找到些較西式的晚裝款, 幾合我心水, 著得幾高貴唔會好common同娘屎.

呢幾件衫D款好高貴, 好適合我西式婚禮的主題. (放心, 全部可加披肩的). 我再試了潮掛(如上所). 佢俾我個offer係$1688/3件, 真係好吸引, 而且佢地的服務態度很好很nice,又俾我勁影相, 不過鑑於金都俾人的感覺太坑人, 實在不感謬謬然咁join佢, 所以都係冷靜下先.

返黎之後send左D掛相俾姑婆同kaka睇, 佢地都覺得我著傳統掛好睇D, 仲要係多金線的中五福tim!諗諗下都覺得係, 所以我九成都會join番永隆繍莊. 至於濃情, 網上原來好多bad comment!! 雖然D劣評都係講expo join完之後book唔倒衫, 但係真係好擔心. 其實我都好LIKE佢D奶奶衫, 不過都係搵D網上比較多好評的店再試下先. 當係俾個idea媽打著咩衫. 而且仲要兼顧埋肥肥媽, 所以一定要再細心找找看!

糟透了

看到肥肥的部落格{看這裡}, 原來看完醉爆伴郎團高漲的心情突然糟透了. 很傷心, 傷心得躲在廁所裡哭起來(他聽不到, 因為他正在房裡攤著聽著香港人網).我做這麼多事, 換來是他在朋友面前向我的指責, 心裡很難受.
我在想, 我快要嫁給這個男人了. 我已經很盡力去接受他. 對於他很多我看不過眼的事我盡量令自己看不見.我從內心一直喜歡事業心重積極性高的男人, 無奈他不是, 什至比一般為兩餐的打工仔更加不思進取, 整日就待在家裡什麼都不做. 算了, 我可以合著眼不理會, 他自己打理好自己就好了. 他亂七八糟的壞習慣, 變態的動靜, 我都盡量去忍受, 為他執手尾, 為他打掃屋企, 我真的很用心很盡力去為這段關係磨合.
對於他酗酒的習慣, 我每一天(對, 是每一天)都告訴他不要再飲了, 花盡我的力氣去說服他, 心平氣和的勸他又試過, 又打又駡什至以死相挾又試過, 他仍然一而再再且三咁繼續飲酒. 他說要找戒酒熱線, 我把電話抄下來給他了, 他始終沒去. 醫生都說他有脂肪肝了, 再加上他暴飲暴食到二百磅的身形, 我相信他離死亡不遠矣.
我愛他希望他有健康的身體不要讓愛他的人擔心. 我自私我希望我即將要付託的人有能力擔起照顧我的責任, 而不是成為我的包伏要我寑食難安. 我真的很擔心我即將要嫁給他了, 我好像沒想清楚後果. lala說我已經揀左就要接受了, 我有點怕, 我怕我最後不會在結婚當日出現.
無論我花多少心機去說服他, 換來只是他向朋友訴苦, 說自己的女友點樣唔俾面佢之類, 很傷心很沮喪.....不知點樣再過日子了....
我問自己是不是還愛他, 想起一段段我與他快樂的時光, 我知道他可能是全世界最愛我的人, 我對他的愛, 可能被這一切的事打了折扣. 但我有時就好像被片刻的快樂, 像習慣了的感情, 令我繼續留在這裡.

肥爆兩天

同波波去完長州, 帶佢去美容院沖涼, 索性同佢剪埋毛, 清爽迎接烈日! 波波第一次剪毛, 短毛的波波超可愛, 好似BB狗咁, 佢自己可能無咁熱, 成隻狗生猛活力左, 可愛度爆曬燈呀!!


素顏的我....-_-"

夜晚又同肥肥返大陸, 再複卓中發源, 今次再試左d上次食唔倒又好想食既新野 :

(左上) 涼拌棵皮 : 棵皮! 好難形容佢既口感, 口感好似糕狀, 但形狀又切成好似面條咁, d汁好似涼皮咁, 加了很多醋! 我點時以為係小點咁, 點知其實好大碟! 而且第一碟上菜, 唔覺食多了頂住個胃.
(右上) 上湯浸豆苗 : 肉吃多了點個菜, 呢個餸無咩特別, 只係估唔到新疆菜餐廳做粵菜都幾好味喎!
(左下) 牛肉拌面 : 必點之一! 真係想日日都食佢呀!
(右下) 青海一家親 : 聽說是得獎菜色, 超大碟!! 用鐵板熱辣辣上, 有煎得好香的土豆, 粟米放底, 上個很多羊肉(是肋肉呢, 啖啖肉很嫰), 再有薄餅放面, 好好味好香口啊! 但份量真是太多了真的吃不下, 打包回家明天吃, 可是明天吃是番叮便很羶了.....所以最好就一次過食曬啦!

食飽飽就去返碧水附近買DVD, 之後再去碧水馬沙池! 今晚碧水超多人啊, 有點似之前的太平洋!! 雖然我覺得碧水的C/P值一向很高(仲有宵夜免費任食, 宵夜唔少野架, 又有粉絲蒸扇貝又有雞全翼), $218的120分鐘全身香薰推油加火山石加全身磨沙, 再送大堂項目, 超抵, 不過人多自然服務得無咁周到, 例如更衣室D衫執唔切, 美容部無房要上五樓中式房做, 所以D火山石上到黎都凍曬....做完大堂又無位坐, 搞到要在吸煙區等肥肥......所以呢, 下次都係揼完先食好D!

星期日, 外面天氣很好, 陽光非常猛烈, 楊她們選擇同陽光玩遊戲, 而我同肥肥就選擇留在家裡開冷氣睇DVD, 仲食埋好好味既Rocky Road雪糕, 想唔肥爆都幾難!

熱熱長州之夏

七一假期, 同楊黃小入長州, 會一會楊的男友先!約左小十二點半在碼頭等, 唉但我十二點四先到香港站, 以九杪九時間抱住波波著住拖鞋飛奔去碼頭, 去到啱啱好差兩分鐘開船, 真係得番半條人命....仲要迫搭豪華位, 架船超多人,為左嘆陣冷氣, 夾硬插入人地一家人入面坐, 坐到一半再落樓下同小一齊坐, 10個字好快到長州~

會合左楊(and her bf - Leo), 食碗魚蛋粉先! 魚旦幾Q, 幾好食. 小俾左副超波波帶, 幾型仔!

叫我Mark 哥!

食完先去Leo屋企換衫先, 小的旺女同波波俾Leo在樓下拎住我地上去換衫, 起初怕佢一個搞唔掂三隻狗(仲有佢自己的狗-Whity), 於是我地極速換衫衝落去, 點知佢地三隻野好乖咁坐定定等我(最犀利係連波波都係喎!),真係神乎奇技大開眼界呀!!

去到沙灘, 楊唔落得水, 唯有幫我地看野啦! 夾硬同波波游左一陣水, 唉佢都係唔肯游(same as 旺女&Whity), 得我同小碧波暢泳啦!租了兩個水泡, 好疏乎咁游去浮台度, 任由陽光照射到背隻上, 好relax好舒服啊! 小公主多D同我地出黎, 好開心見倒佢心情都開朗左, 希望佢可以快D走出陰霾啦!

Summer Fun!

游完水之後返返去Leo屋企幫小狗沖涼, Leo好nice咁自己去公共浴室沖, 而我地就用他的浴室沖, 好considerate喎! 休息一陣再去BBQ, 有廿幾三十人都是Leo的舊同學, 佢有其中一個同學(男的)自己整左炒飯同意粉, 仲有奶凍同蛋糕甜品, 超crazy, 仲要無女朋友, 雖然個樣有D似光良同姚B合體, 不過真係好犀利, 如果做女朋友都真係幾大壓力呢!

原想在Leo的朋友group中再些對象俾小, 不過好似個個都not avaliable呢, 其實他的朋友都幾nice的, 如果飲飲食食應該唔錯喎. 同小搭10點半船返去, 展開漫長歸家旅途, 足足花了兩小時才回到屯門, 波波同媽媽今日都夠曬皮了, 勁累.....

總括而言, 楊的男友真是不錯呢, 身型超正, 個人又夠nice同considerate(不知是不是門面工夫, 就算係, 都叫肯做門面工夫呀!), 感覺都好靠得住, 好開心楊找到她的另一半, 希望佢地早日開花結果啦!

hssc babies gathering

今天又到了孖精家聚會, 有這個地方多好, 她的家又乾淨整齊, 可以慢慢傾計. (我的家又遠又有狗又污漕, 我都不敢邀請她們, 尤其是要保持高度衛生的kaka&CBB啦). 先在十勝豚丼吃過飯, 再上孖精家. CBB今天都係一樣咁好精神啊, 周圍抓然後塞落口, 又不停噴口水, 我俾佢係咁抓塊面.....-_-"

勁似kaka老公 - 一副寸樣

同佢地傾計真係開心, 說東說西又一個下午. 一班女仔對美容話題就停唔倒口係咁雞啄唔斷了!晚上回家前先到一田逛一逛, 又忍唔住買了些靚野回家做晚餐......keke......次次去一田都忍唔住的...是日晚餐 :

(左) 18個月pama ham 配水牛芝士 : 剛好見倒一田的肉櫃有風乾火腿賣, 18個月$60/100g, 不是太貴買了50g嚐嚐, 不錯啊, 下次會試24個月的, 會再咸些. 賣肉的說這火腿配較啖味的水牛芝士就夾, 確實不錯呢!

(右) US Prime sirloin. 這小小一片要八十多元呢! 買了一片同肥肥一人一半好了. 西冷的脂肪分佈平均, 肉味較濃, 是我最喜歡牛的部分. 靚扒不用醃呢, 把鑊燒熱(係要勁熱), 每邊大火煎分半鐘(7成熟, 下次煎1分鐘便剛好是medium了), 不用落油, 上碟時加少許海鹽上面就夠味了, 好正啊~

肥肥再弄了三文治, 另外做了生菜沙律, 簡易西餐很快完成了~Bon Appetit!