數字遊戲

豐澤增分店派300萬花紅

【明報專訊】經濟不景下，減薪裁員消息頻傳，有1200名員工的豐澤電器卻向員工大派「定心丸」，將發放共300萬元花紅，激勵士氣；又表示暫時未有裁員計劃，並會繼續按計劃招聘人手。豐澤本月更會逆市擴充，在上環及尖沙嘴 多開兩間分店，進一步擴大版圖及吸納更多自由行旅客。
金融海嘯突然來襲，令本港零售業大受衝擊，豐澤董事總經理吳弘宇表示，2008年第四季的營業額較前年同期下跌，就連12月聖誕新年旺季亦未能挽回銷售額，主要是商業旅遊旺區受到較大影響。不過幸好上半年業績理想，2008年全年營業額仍錄得輕微升幅，業績符合預期。為鼓勵員工，本月會向52間分店約1200名員工，發放共300萬元花紅，但不肯透露花紅額有否比前年增加。
全文見 : http://hk.news.yahoo.com/article/090111/4/a5so.html

300萬花紅分俾1200名員工, 每人平均只有$2500. 四分一個月花紅都無. 仲好意思講出泥俾人聽?
利益申報 : 我並不是豐澤員工, 只係睇唔過眼而已.

笑爆嘴@08勁曲金曲

今朝同同事食早餐時聊開了, 先知道原來十大勁歌金曲有咁多笑位,坐低即刻上youtube捕捉精華片段.
呢d笑爆嘴既片段,真係睇十次都覺得咁好笑. 卡卡卡~~~

第一位梗係全城熱話關心妍攞錯獎,學荒失失奇兵2的長頸鹿話齋,直接要掘個窿等死算. (記得留意埋志偉個忍笑樣....)



崔健邦都算執生, 即刻同佢兜. 反觀志偉就忍唔住笑...
放心啦~香港人最善忘~過一排又一條好漢!! 關小姐, 你訓醒未呀!?

另一個笑位, 本身都有機會角逐笑爆嘴大獎, 但係俾關小姐搶左...之唔係黃宗澤同陳奕迅合唱K歌之王.


緊張都夾曬腳個樣+狂走音. 真係"登"佢可憐. 好似俾人擺上枱咁. 老公婆都好明顯係無記既犧牲品.
又係放心啦王生, 大把妹妹仔鐘意你, in love with bosco, yeah~
(Quote from 某八掛雜誌 : 全角度走音 )

相比起王祖藍, 雖然都係有d窒住窒住, 但係d音都到倒喎. 我都幾欣賞佢.

為什麼三人行?

為什麼你總是要帶埋家姐一齊呢?
為什麼我地兩個出街食飯睇戲要同埋你家姐一齊呢?
為什麼我地要去露營又要帶埋你家姐呢?

問題係....點解你約埋你家姐之前都唔問我一聲呢?
你明知我唔熟(及唔想熟)你家姐, 平時在家裡帶假面具嘻嘻哈哈就算了, 點解我地兩個既活動都要帶埋佢呢?
而且, 當我拒絕要和你家姐一齊出街時, 為什麼你總是要掛著一副覺得我不近人情的面孔呢? 你何常唔諗下, 要犧牲我倆一齊既時間夾硬插你家姐入黎, suffer果個會係我呢?

所以, 我堅決反對同你家姐三人行. 如果你堅持, 你同你家姐拍拖去好了. 我唔會理你. 你都唔好理我.

決裂度: +20%
心死度: +20%

好麵線

今日睇戲之前, 去左戲院附近果間好麵線食小鍋米線.
小鍋米線本身已經有芽菜炸菜肉碎等基本配料, 我再加選了三款餸: 手撕雞、煙鴨胸同順德魚腐. 辣度就揀左中麻辣 (共$35) . 再加三蚊加支豆漿仔.
見倒我碗米線呈紅色, 證明好夠辣. 直頭係辣到嘴都紅埋咁濟. (坐對面果位半光頭男士仲誇張, 食到成頭汗...) d配料好都幾足料, 整體味道唔錯, 不過唔夠正宗四川麻辣, 而且如果轉紅薯粉會好d.始終麻辣係應該配薯粉既.

好麵線

地址: 油麻地眾坊街59號B舖

電話: 2332 7938

見習中女第2課 - 電影篇

見習中女第2課: 奉勸各位, 當你感到寂寞時, 千萬不要一個人去看戲, 只會愈看愈寂寞.

我是那種不能坐定的人, 總是想出街找節目. 不似得男友咁, 咁鐘意留o係屋企撻抖. 可憐的我常常被他遺棄, 久而久之, 他也成了我的lowest priority. In case真係約唔倒friend, 先搵下佢.

可是今天真的很想約朋友hang out一下, 但一個二個都要返工有約.....於是試著一個人去看戲. 去之前亦說服自己, 一個人看戲好正常, 鐘意睇就睇, 唔使就其他人.....但係結果係...一邊看一邊覺得很寂寞, 尤其係睇完自己一個行出戲院, 自己一個搭車返屋企時....

一個人看戲, 只適合不寂寞的人. 千萬不要把這個當做一個人時的消遣.

如果真係想睇戲的話, 去youku做宅女好過.

About Kay Tse

呢期真係好欣賞謝安琪, 除左呢一年都有聽佢每一隻碟之外, 近期仲特別欣賞佢既化妝同打扮技巧. 佢個妝真係化得好正, 著衫又著得好有style, 本來都唔係咁覺, 但係我睇完佢個拉闊show的making of, compare佢化妝前同化妝後, 就知道化妝呢家野可以有幾出神入化!!!

好鐘意佢叱吒頒獎禮個look.尤其係個妝. 好可惜我既膚色化唔倒呢個紅唇妝, 再者, 化左都唔知去邊.

重有勁歌金曲個妝, 藍色大眼仔好型, 鐘意呢個dolly look.

自製木頭蛋糕

不要誤會, 為應付自已team的New Year Eve Lunch Party, 我只不過是買了一條本公司出品的十蚊瑞士卷, "紋"上自己打製的忌廉, 上面再灑上朱古力粉同屋企剩低既藍莓, 就成了呢條木頭蛋糕喇~

至於d糖公仔, 就係已經在公司個雪櫃放了半年的sample, 入面仲有一隻絕版既"河馬老母", 你地發唔發現倒呢?

(放心, 我地無食到d糖公仔, 食左都唔知會唔會中毒身亡...)

御臨門溫泉自由行Day 2

張床好舒服好好訓, 第二天早上約九點起身落樓下食早餐, 早餐時間餐廳擠滿住客, 原來有咁多人住呢間酒店, 點解尋晚唔覺既?? 早餐質素一般, 比起布吉的早餐簡直無得比! 不過有即煎雞蛋食, 呢一樣係永遠唔會難食而又好受歡迎的, 配埋香腸多士, 加杯咖啡, 還算不錯呢!

(↓早餐仲有炒麵同菜乾豬骨粥tim~) 之後我地把握尚餘時間去溫泉區再浸多次, 今次去左尋晚未去既峇里園林區(尋晚淨係去左河中溫泉區), 可能d旅行團客已經走曬, 成個溫泉區無人咁濟, 一個好似泳池咁大既溫泉池只係得我同肥肥兩個人浸, 勁free爆! 仲有幾個峇里發呆亭, 坐o係度休息下真係好relax架! 浸下浸下, 驚覺已經十一點九, 得番十五分鐘時間執野......

check out之後, 我地book左架接送車一點三先送我地去九和. 梗係四圍行下影下相先啦! 我地去左別墅區果邊, 嘩~d別墅好靚呀, 每間都好似峇里d villa咁, 有d兩房別墅連私人花園同溫泉池, 花園仲有個發呆亭, 真係好想住呀!!!! 之後我地再去左個叫”泉之源”的地方, 見倒個泉眼, d水熱到噴曬煙咁, o係度影相好有日本feel~

(↓泉眼的煙)

一點三就上左架酒店接送車, 十多分鐘去到九和, 司機知道我地未食午餐, 佢帶左我地去間大排檔食小菜. 呢間野無菜譜架, 要入廚房見咩點咩, 咁叫法梗係要逐樣問價錢啦! 好彩都係好平姐~ 呢度都係食d家常農家菜咁, 叫左一碟烤鴨, 一個豆腐煲同一碟炒清菜, 味道都唔錯呀~

飽餐一頓, 我地就o係餐廳對出條馬路對面中途截車, 無錯, 係無車站既, 總之見倒有大巴寫住目的地係深圳就截咁就得架喇! 等左十五分鐘左右, 我地成功截左間深圳車, 開始回程喇! 呢個司機真係勁, 完全係視生命如浮雲, 一路係咁狂飛加急轉彎, 激過亡命小把十萬倍!!! 唯有合埋眼聽天由命啦..... 車程三個鐘左右, 六點多到達深圳布吉關, 一落車即刻跳上的士, 好快就返到落馬州喇~

(↓就o係呢條馬路度中途截車喇...)

樂壽新漁村酒家

除夕夜, 同肥肥在圓方睇完荒失失奇兵2, 被佢引誘左同廚神夫婦食晚飯. 廚神揀左去樂壽, 吃的主打係順德河鮮.

我比較少食河鮮, 因為老豆唔鐘意河鮮有泥味, 所以家裡通常食咸水魚多. 而出街多數都會食海鮮多, 今次算係少有出街食河鮮.

同得廚神食又點會食cheap野, o係佢面前都唔敢點菜, 全部由佢發板. 由於要等齊人, 先黎三個小食: 避風塘炸豆腐、釀尖椒同蜆芥綾魚球. 蜆芥綾魚球做得唔錯, 外層有d炸米圍住, 幾有咬口!

之後黎主菜, 煎焗鉗魚煲, d鉗魚勁香勁惹味~超讚的!! 再來有啫啫芥蘭煲, 同樣是惹味可口, 味道濃烈的!

(↓煎焗鉗魚煲)

大良炒鮮奶! 很少在香港找到炒鮮奶, 學廚神話齋, 呢個鮮奶係即使屋企有齊食材架生都學唔倒既炒法, 好功夫! (很想介紹給一個很喜歡炒鮮奶的朋友)

重頭餸係龍蠆兩味: 龍蠆炒西芹and清蒸龍蠆. 自認大鄉里未食過龍蠆架, 原來都幾多肉架喎. 食慣原條蒸的魚, 今次起肉煮兩味, 亦別有風味.

最後仲食多個雙皮奶做甜品, 奶濃夠滑, 但略嫌太甜, 少甜會好D.

好彩跟住廚神黎先試倒咁多好野, 如果自己叫餸肯定試唔倒呢D正野呢!(只懂叫糖醋排骨的肥肥和蝦仁炒蛋的我....慚愧慚愧)

-----------------------------------------

樂壽新漁村酒家
地址: 佐敦德成街1-5號地下

電話:2736 7728