hssc babies gathering

今天又到了孖精家聚會, 有這個地方多好, 她的家又乾淨整齊, 可以慢慢傾計. (我的家又遠又有狗又污漕, 我都不敢邀請她們, 尤其是要保持高度衛生的kaka&CBB啦). 先在十勝豚丼吃過飯, 再上孖精家. CBB今天都係一樣咁好精神啊, 周圍抓然後塞落口, 又不停噴口水, 我俾佢係咁抓塊面.....-_-"

勁似kaka老公 - 一副寸樣

同佢地傾計真係開心, 說東說西又一個下午. 一班女仔對美容話題就停唔倒口係咁雞啄唔斷了!晚上回家前先到一田逛一逛, 又忍唔住買了些靚野回家做晚餐......keke......次次去一田都忍唔住的...是日晚餐 :

(左) 18個月pama ham 配水牛芝士 : 剛好見倒一田的肉櫃有風乾火腿賣, 18個月$60/100g, 不是太貴買了50g嚐嚐, 不錯啊, 下次會試24個月的, 會再咸些. 賣肉的說這火腿配較啖味的水牛芝士就夾, 確實不錯呢!

(右) US Prime sirloin. 這小小一片要八十多元呢! 買了一片同肥肥一人一半好了. 西冷的脂肪分佈平均, 肉味較濃, 是我最喜歡牛的部分. 靚扒不用醃呢, 把鑊燒熱(係要勁熱), 每邊大火煎分半鐘(7成熟, 下次煎1分鐘便剛好是medium了), 不用落油, 上碟時加少許海鹽上面就夠味了, 好正啊~

肥肥再弄了三文治, 另外做了生菜沙律, 簡易西餐很快完成了~Bon Appetit!

Quality Lunch @ Whisk in Mira

前一晚11點幾在網遊時發現心儀已久的Whisk原來有3 course express lunch只是$218/位!! (上次去四季是雙倍價錢呢!) 這可是米芝蓮推介餐廳呢, 網上風評一向不俗, 連素顏天使都極推介呢!不過夜媽媽都搵唔倒人陪我去食, 即管whatsapp下姑婆會唔會得閒啦, 估唔到黃真係有興趣喎,仲一早打俾我confirm tim!即刻book位啦!keke....

1點鐘同黃準時到. 店內裝潢很trendy, 坐的位置面向落地玻璃看到出面綠意悠悠的庭園, 感覺不錯. 侍應入坐時問我們飲什麼, 我說水啦, 著她開了一瓶sparkling water (原來要$70, Capice是免費的, 不過諗深一層可能叫兩杯可樂仲貴). 稍為研究一下餐牌後便點菜了.(侍應在介紹餐牌是說得很"luck cut"....感覺一般)

侍應先送來面包. 是一件硬豬. 塗著牛油不錯吃. 還有bread basket可任選面包吃, 但上次經驗是不要被面包塞滿胃口, 所以沒有再點了.

不久後上菜了, 先來頭盤. 我們都點不同的互相share吃. 其中一份是三文魚凍湯(白色果碟). D湯落左好多好多cream, 超級creamy. 內有三文魚. 而橙黃色的一碟是以帶子刺身上加芒果果凍, 這碟比較清新開胃, 作為前菜十分合適.

之後便上主菜, 有澳洲牛. 我點了medium, 肉嫰很好吃. 伴碟的三小件是spinish, 香煎鵝肝及松露醬薯蓉, 都做得好出色. 另一碟是法式油封鴨, 之前我知道油封鴨的製法複雜, 不是你看上去一件炸鴨肶咁簡單啊!不過我覺得澳洲牛做得較出色.

之後便上甜品了. 點了雪巴及蘋果批. 都不錯吃. 不過雪巴的紅莓味(我覺得似山渣味)太酸, 不喜. 蘋果批伴雪糕則不錯吃.

吃過甜品後便有咖啡, 我點了一杯Latte. 黃則點了Mocha. 依? 好似少咁樣野既? 怎麼沒有petit four呢? 心想好怪啊, openrice說明明有的. 我同黃都沒有問, 一邊傾計一邊玩 Iphone, 說說笑笑坐到3點 ! 只剩下我地最後一枱客了! HS白金卡還有9折, 很划算啊! 埋單時我再問侍應是不是有petit four, 他才發現沒有給我們呢! 救命, 點可以漏了給客人架!!!!! 咁算係咩服務質素呀......-_-"汗...

被遺忘的petit four

總括而言這一餐$513/2人真是一個good deal! 趁放假是同朋友享受一下quality生活真不錯! 不過service比起四季就超很遠了. 但畢竟是四季的一半價錢呢....-_-"

行動派

黃昨天看到我把預約的婚紗店相片存在手機內, 形容我為"行動派", 說我是一個有計劃的人.
我喜歡她這個形容詞, 但我是受之有愧. 相比起其他人, 我很多時只是有心無力, 更多時是齋UP.
但我有不停找資料的習慣, 促使我成為一個滿有求知慾的人. 齋UP都有個譜.
不過由找資料, 到最終決定一刻, 時間的安排, 需要更加心思細密, 更加有決斷能力. 要減少幽柔寡斷, 要對自己的決定更有信心, 我能做得到嗎?

pls pray for me. thanks.

連環婚紗尋找日- 扑搥了!

話說上一篇我已經找到我喜愛的婚紗. 不過基於怕自己第一次穿婚紗太迷戀自己穿婚紗的模樣會沖昏頭腦. 所以婆仔心態還是試多幾間先! 但不想自己為婚紗這項目纏繞太多(即係愈睇得多愈花多眼亂), 又怕喜愛的款式被租去, 所以決定於六月內KO這項目!

最愛做足準備的我, 一星期前已經預約好三間在網上看好的婚紗店. 因為三間都在中環區, 一個下午便可全KO.再在各婚紗店的網上相薄下載了心水款式. 試衫時出示相片給店員就唔使靠自己記憶啦!

1. BV Bridal. 第1間到訪的婚紗店. 同小公主先到. 店子不大, 但光猛明淨, 感覺舒服. 這裡提供1小時免費試身, 沒限件數. 這樣很好, 我把想試的全給試了, 總共試了7-8件呢! 因第一次試婚紗時都知道自己適合那些cutting,所以試的都是較近磅的. 試了{Claudine for Alyce 1},{Claudine for Alyce 2},{Claudine for Alyce3}, 這三間比較鐘意. 而晚裝也試了很多件, 有紅色, 紫色, 大露背的, 都挑了一兩件心水. 這間的衫都從外國入口, 而且有些衫是香港獨家代理. 價錢是一般中上環價, 合理 ($6580=1WG+1EG). 不過小公主其後說如果沒比較覺得這間不錯, 但比較起來就覺得款式唔夠靚. 而我的感覺是喜歡第一件婚紗, 絕對是我愛的style,其實都可以考慮.


BV Bridal

 2. Blanc House. 這是第二間到訪的婚紗店. 黃同小陪我看. 這間店俾我感覺有點commercial, 可能係看過她們的廣告. 入到店內掛滿很多衫, 燈光雖然有射燈, 但比較昏暗, 有D衫的顏色都看得不清楚, 總覺得有點黃黃的顏色. 先在Ipad內看電子相簿揀裙, 可免費試三件. 店主Jess很nice,另有2位店員幫手. Jess很專業的, 每件衫都提供專業意見, 服務不錯.

這裡租婚紗沒有package要逐件計, 相簿內有仿vera wang款式, 原來這件要租都要$15000, 試都不用試啦!(其實佢係唔俾試, 唔試點會租佢呢?) 唯有試番d普通款式. 先試網站內的超簡單斜紋, 但穿起來覺得不太收腰, 而且件衫有點舊, 顏色亦太黃, 感覺一般. 之後試了一款魚尾款sweetheart領, 這件會好一點, 但都是不夠收腰, 感覺都係一般. 最後留番個quota試晚裝, 有一件all over立體花款式超級靚, 穿上身簡直欲罷不能! 超靚. 不過價錢亦頗貴, 一件WG要$5500,立體花晚裝亦要$3500, 有點out budget.....老實說這店的衫比較舊, 好似著左好多次咁, 但款式則很新很fashion, 但因為WG未能叮一聲, 所以都係諗諗先.....

3. Mariee.這次楊黃小都到了. 來到位於安蘭街的Mariee.這間店我最在網上看中了她的style,是最心水的店. 來到店內, 店子面積比前兩間大少許, 有很大的試身空間, 舒服的沙發, 同樣光猛明淨.幫我的店主是Jacqueline,她很年輕, 說話的口音有點鬼妹仔. 免費試2件. 先把我早看中的婚紗給她, 立即找了出來試了. 穿起來真係好靚, sweetheart的領口, 很顯身材. 加上小魚尾的高貴款式, 後面再加綁帶, 腰線出曬黎, 又再一次陷入迷戀自己的狀態, 我知道這件便是我的The One了.

既然試了一件心水婚紗, 留番quota試晚裝, 試了一件紫藍色的希臘女神feel晚裝, 不錯啊, 很高貴小拖尾款式. 小公主說這一間是三間最好的, 羊黃都說這一間我穿得很靚. 即場confirm仲有9折, 好啦好啦, 貪小便宜我又confirm了一件WG+1EG, 盛惠$7272.

既然confirm了, 便可任試, 試了些紅色奧斯卡feel的大gown,不錯很壓場的感覺, 但未夠叮一聲. 我諗之後等佢有新款要再來試過.

太好了, 今天便confirm了靚靚婚紗, 幻想著自己要穿這件衫嫁給肥肥了, 滿期待啊!

試完衫, 同姑婆找吃的, 今天全日都未食過野啊!(怕食完穿不下裙子, 所以不敢吃) 本想到博洛尼亞, 點知關店了, 九如坊的八千代都係一樣. 之後唯有去了萬宜的和民啦. 等左好耐位先入倒去, 點了4人前東亞信用卡餐($498), 嘩, 多野食到呀! 平時去和民都係貴夾唔飽, 今次真係太多太飽了, 簡直係挑戰四人肚皮的能耐!!! 唉, 今次真係玩撚猿, 個個都食到縮縮不行鳥.....好飽啊!!!

吃過這餐後,必須要加緊減肥先得! 一定要減多10磅!!加油啊!
{說真的,很喜歡穿上婚紗的感覺,那種對自己的迷戀, 那種覺得自己是最幸福的新娘, 多謝肥肥, 多謝你給我這機會}

周六自家煮-蒜蓉牛油烤雞

由於昨天及明天都要過海,今天打死都不會離開屯門. 這個周未沒有約人, 留在家中做快樂的自煮.一次網遊時找到松露玫瑰的食譜, 決定要跟她的做法試這個{40 瓣大蒜烤全雞}.
不知我的焗爐是不是不夠火, 焗完沒有她說的可把雞汁吸乾, 但效果都不俗. 以下是我做的版本.
材料: 冰鮮雞1隻, 4棵蒜頭(分開一粒粒不用去衣), 牛油100克,橙1個

調味料有: 海鹽, 香草, 黑胡椒

做法:

把雞洗淨, 切去頭及腳, 把50克牛油, 調味料塗勻雞全身.

然後把少量蒜頭放入雞腔內, 其餘放雞面或底. 把橙切開, 擠橙汁淋雞面. 再加200ml溫水. 放入預熱180度的焗爐內, 焗1.5小時.

每半小時取出來,把雞汁掃上面, 把橙又掃下雞面. 1小時後加入西蘭花一起焗,再把餘下的50克牛油塗上雞面. 當焗了1小時15分鐘時, 我把雞汁倒出來,把雞反轉, 希望雞肚的位置都焗成金黃色, 可是不夠. 下次要在1小時便反轉雞.

1.5小時後, 完成了.

味道不錯, 內質很滑. 只是皮不夠脆, 如果想皮脆下次要在最尾5分鐘轉大火焗. 其實焗雞都很簡單, 不過時間長了點. 勝在肉質夠嫰, 果然要慢工出細貨.

找到目標剪裁的婚紗款式 @ Lou Lou Bridal

昨天羊說上環附近有一間好amazing咁好味的japanese bakery cafe, 引到我心郁郁. 夾硬拉埋肥肥同我去食,順便去埋一間心儀左好耐的婚紗店試衫, 其實諗住遲下再減多陣肥先搞婚紗呢樣, 不過咁啱出開上環, 又咁啱間舖有時間, 咪順理成章law,呵呵呵呵~~

3時多出門, 肥肥死都唔肯渣車, 算~搭960一樣姐!到達上環真係烈日當空, 眼見google map度間餐廳同信德中心都幾近, 於是在這站下車開始苦行上山之路. 原來餐廳位於扶手電梯最高位置, 我地由上環拾級而上, 冒著32度酷熱天氣, 上到餐廳門口時真係得番半條人命!!! (下次一定要搭電梯, 或者渣車!!)

這裡十分出名的是toast, 標榜用日本麵粉, 小店只有數張枱,一個open kitchen, 店員都用日文溝通.我同肥肥點了一個炒蛋toast set, 一個deep-fried spicy chicken sandwich set, 套餐亦包了一杯咖啡. 我點了熱咖啡, 很香. 炒蛋toast先來, 炒蛋加了很多cream同牛油炒, 很滑. toast真的很amazing, 很軟熟, 有點甜(加了砂糖及奶吧!), 就咁齋食都覺得好好味, 加埋炒蛋簡直好味到爆燈!!

炒蛋toast set, 好味到爆燈!

而另外的炸雞三文治, 炸雞剛剛炸好, 仲有豐富的肉汁一點都不會乾! 配埋招牌多士梗係正啦! 不過我鐘意炒蛋多士多D, 味道簡單D, 更加好味! 臨走仲買埋兩片面包($19)返去俾肥mama, 今次又加分啦!

博洛尼亞 BO-LO’GNE Café & Bar

中環鴨巴甸街41號

到了6點的appointment time, 我們早了15分鐘去到Lou Lou Bridal的婚紗店. 店舖位於舊式大廈內. 店子不算很大, 但因為d衫掛得好整齊, 空間很夠, 只有我同肥肥兩個客人, 很有privacy, 感覺良好. 主持人Aggie好細心咁介紹她的衫, 我跟她說我第一次揀婚紗, 不知那些款適合我, 她很nice地給我介紹...

由於可以免費試3件, 我先試了一件在blog內看中的款{這一款:碎花喱士修腰紗裙}, 我喜歡它的details位, 可是不知係咪我太肥了, 都拉唔倒拉鍊. 就算用夾仔夾住, 個款的腰身都沒有很修的感覺. 我最初是看中了這款的小披肩, 可是穿上後又覺得不怎麼樣......

之後Aggie立即介紹了另一款給我, 因為這一款是歐洲size, 我會穿得下.{這一款: 百摺簡約婚紗}, 這件剛好穿得下, 穿起上來很修腰, 很有外國feel, 款式似外國fashsion款, 較為時尚. 很喜歡.

開始get倒d路, 我比較適合穿簡潔的款式. 所以第三件亦都係我之前好想試的鬼婆feel簡單款.{這一款: 新娘身上穿的婚紗}. 因為這件是綁帶的, 穿起來真的很修腰, 心形的胸口把臉孔看起來更修長; 再加上我{蜜糖色}的膚色,穿起來的感覺就像外國結婚blog的新娘一樣!! 很簡潔高貴, 連我自己都俾自己迷住了!

之後開始試晚裝. 這真有點困難. 這裡的晚裝都以cutting及款式作賣點, 不像一般的晚裝很閃爆你的. 這一點我很buy的, 因為我的wedding沒有射燈, 有的只有陽光. 所以穿閃閃衫就很不夾. 不過這樣就很難選, 因為未著上身都唔知自己啱咩色咩款. 於是我拿了很多件拼了又拼. 很傷腦筋. 最後先試這一件{這一件:酒紅色的晚裝}, 我喜歡它斜肩的立體花, 酒紅色也很match我.  不過穿起來沒有太驚艷的感覺, 反而肥肥說這色太晚宴feel, 不太match lunch wedding.....

之後再試了另一件粉紫魚尾款式{這一件: 水晶紗晚裝}. 起初看這件衫覺得很普通, 不是第一眼就喜愛. 不過穿起來感覺不錯, 魚尾款不會穿得個pat pat太大(這是一般魚尾款的concern), 反而多了高貴的感覺.

試過曬d衫, Aggie把價錢簡單介紹了一次, 再幫我抄低我看中的款式號. 一點一點都沒有hard sell, 反而叫我地可以反去諗下(其實我有諗過即刻扑埋搥費是煩), 不過肥肥說還是返去諗下先好. 所以我暫定6月底前confirm啦! 下次要叫埋羊黃一齊睇先!

至於肥肥, 我每件衫都有問佢的喜好架, 不過他一如以往都係無咩意見. 他都喜歡我穿簡潔的款式. 離開婚紗店後我再問他看到我穿婚紗有咩感覺, 佢話感覺好像他要即將娶這個人的感覺, 嘻嘻, 聽倒都覺得好sweet~很久沒有這種咁sweet的感覺. 很開心. 不過為了保持神秘感, 之後試穿的section都不會再叫佢了......

再來一次扑搥我的wedding bouquet - Agnes b fleuriste!!

其實近來我都有留意d花球的網頁, 不過都係資料搜集階段, 有一兩間看上的, 都有問過價, 但都未有實際行動, 皆因好似未需要咁早訂咁.

對於花球的選擇,最初沒有太多幻想. 對絲花或鮮花都沒有什麼preference. 雖然鮮花價錢較貴,但靚的絲花分分鐘等同鮮花同價. 在網上看過一些有關絲花同鮮花PK的文章, 大多數是說鮮花不耐放, 可能到晚上便開始殘了. 就因為咁,我開始傾向鮮花, 原因係:

1. 我的婚禮只做一個下午, 不用挨到晚上啊!所以不需要因為怕佢易殘而用絲花.
2. 半島包埋的場地佈置全部都係用鮮花啊, 咁無理由新娘的花球係絲花姐....-_-"

所以,同開孖精傾結婚野時, 我問佢有無d $1000樓下的鮮花推介, 佢即刻同我講原來Agnes b做緊7天的promotion,指定款式花球只係8折ja! 折左約$1000左右......咁仲唔即刻action叫埋羊同我一齊去check it out啦!

第二日等登去左太古廣場的agnes b,花店內放左4-5個實物鮮花球做demo, sales說還有其他regular款做9折, 她們把其他款式的花球相片放了在I pad內俾客人睇, 有好多款, 真係有D花多眼亂 (不過話時話, 佢D相片質素好差, 好似就咁用手機影咁, D色完全唔掂, 有D相仲矇查查tim!).  在I pad內的regular款式, 價錢約$1200-2000不等, 所以有點over budget, 而且因為D相真係影得好差既關係, 真係有D擔心.

所以呢,我轉向實物花球入手. 因為好多時睇相同實物係兩回事. 有實物可以拎上手, feel下邊隻色襯我膚色/style, 或者係大小手感. 唔試唔知, 原先一心想揀的紫色(我想找深紫,但她沒有實物,所以我找了淺紫拼色), 拼在我身上好似唔夠sharp, 有點灰的感覺. 而且有些花種的莖很重很大扎, 拎上手略嫌太重了! 而一款鮮粉紅的看起來很靚,但拎上手感覺很young很活潑, 反而我覺得我應該襯D高貴的款式.....另外, 記得要問婚期月份咩花唔啱season,好似3月咁,牡丹係唔靚架!

最後, 我揀左呢個款 :



佢拎上手的感覺好高貴, 又夠簡潔, 而且價錢仲要係最平果款, 只係$750ja!!不過我有點擔心如果早上著掛會唔會太近色唔夠顯眼呢? 不過Ryan話: "就算怕撞色, 大不了咪買多個花球law,反正佢咁平!" 哈, 又係喎! 不過佢呢個價錢係未計新郎襟花同頭花既, 要額外加$120. 而且, 我又揀左四大長老的襟花, 我選了又係有實物的蕙蘭. 雖則四大長老襟花未必需要係B仔, 但係我都費時當日又要另外再攞花, 所以算啦一次過揀埋. 埋單條數係$750(花球)+$120(新郎襟花連頭花)+$324(4個蕙蘭襟花)=$1194. 而兄弟姊妹的襟花/手花我就打算用絲花. (唔係我想慳皮, 而係玩遊戲時好易會整爛朵花, 所以用絲花會耐用很多! 姊妹經驗之談!!)

其實我之前真係從來都無諗過自己會買B仔的花, 因為一直覺得係天價咁貴, 而我又唔係一個祟尚牌子的人(我把虛榮心放了在場地了....), 講真, 花呢樣野係homogeneous, 即係任何人都可以copy的, 虛榮嘛.....就是那條寫有anges b的絲帶了.....嘻嘻.

店內不準拍照, 羊偷偷幫我拍了一張.
嘻, Agnes b fleuriste 很classic的fu~

做了{孝順媳婦}的Happy day

終於捱到這一天假期, 請了一天假, 開始一連四天的端午假(雖然今天仍要早起在家工作數小時...). 波波好似有預感知道今日我會帶佢出街, 一早就勁興奮咁轉來轉去跟出跟入, 約一時同肥肥去接埋佢阿媽一齊驅車到大嶼山.

午後陽光



把車泊了在富東的停車場(mon-fri 24小時日泊$60), 肥肥mama話想飲凍檸茶,所以我地先去茶餐廳食左個特餐(而我只吃了牛丸米), 如果係我自己就會食pizza hut的lunch set了, relax點又舒服點, 不過唔緊要啦, 就下肥mama. 同肥mama出街最緊要係留意邊度有廁所, 一個point去另一個point前一定要預留廁所位俾佢, 哈~開始get倒點樣湊佢喇~

之後同肥肥諗住搭3M入貝澳, 點知肥肥好"聰明"咁在排隊上車時係咁"揚"個狗袋話自己好"呢hea",俾個站長見倒佢帶狗即刻捉住佢唔俾佢上車. 無辦法啦, 去搭的士啦, 好在即刻有車, $70入到貝澳.

入到貝澳, 我地去左Ohlala度坐, 去過咁多次貝澳都係第一次去呢間餐廳ja! 點了一杯咖啡, 坐在近沙灘的位置, 吹吹海風, hea下到4點多.

慵懶時光

到太陽無咁曬, 就同肥mama & 波波落海灘走走.

最上鏡小狗

5點多再同肥肥開始落水摸蜆, 今次肥肥好叻摸倒好多蜆啊! 而且D蜆隻隻都手板咁大~我地約1個鐘摸左十幾隻大蜆呢! 明天可以做蜆肉大餐了!摸蜆時剛好日落, 夕陽映照著海面發出閃閃的光芒, 好靚好舒服啊~

 回到餐廳再hea下到7點幾, call 了的士去位於逸東邨旁的村屋海鮮菜館 - 東昇樓. 肥mama說之前同朋友去過幾好食, 我地點了鹽焗雞半隻, 上湯魚肚勝瓜, 原想點美極蝦, 但佢見我地係遊客就話無曬例牌, 要我地散叫D蝦($168-$188/斤), 好賤呀!! 所以我地無叫到蝦, 叫左桶蠔同鮑魚仔.

雞有雞味

鮑魚仔 - 幾大隻的, $22/隻

個雞都幾好味, 不過雞胸位置有點un, 但幾香雞味(哈,講埋d廢話, 雞有雞味, 自己feel下點解). 鮑魚仔都好鮮甜, 桶蠔用薑蔥炒, 味道濃郁, 不過因為減肥中, 全都都唔敢食太多, 唯有狂隊勝瓜啦......

食飽飽搭番佢地既接送車去富東邨, CC服服咁坐車返到屋企樓下, 過了充實又有海水味的一天.好在我地今日去了貝澳, 之後一連三天的公眾假期一定吸引不少游龍舟水的弄潮兒, 到時人迫人就沒意思了. 肥mama好開心我地帶佢周圍去, 我估我都加了分呢!