貼身膏藥

今個星期日做了肥肥的貼身膏藥, 全日都痴實佢. 他屎忽生瘡了(很大粒, 有一網球咁大size), 做過小手術, 我很細心地幫他清洗傷口換膠布, 只是輕輕掂一下肥肥都會聲嘶力竭地叫痛. 而他說他期待已久的FIFA 2012有些舖頭已偷步推出了, 我便和他一起出旺角找game. 肥肥說他屎忽的瘡很痛, 行步路都跛下跛下咁. 但他仍然要走遍信和找game, 可是很多舖頭都告訴他未出. 之後我地又再去好景, 頭一間舖頭都無賣, 肥肥顯得十分失望, 他立即不斷到討論區找資料, 而我則一個人在好景的game舖逛逛, 俾我搵倒有一間肯偷步出售, 我立即告訴肥肥, 他頓然精神一振, 完 全 忘 記 自 己 屎 忽 生 瘡 的 傷 勢 , 立即以九秒九飛撲去購買 (哈? 不痛了嗎?), 咁當然俾佢買倒啦, 仲有限量版波衫tim, 佢開心到post埋上面書度, 活像小朋友一樣.

之後我帶他到扒王之王食lunch, 位於旺角二樓的扒王, 是鬧市內少有的清靜餐廳, 姑勿論食物的質素, 坐在窗前的卡位看到出面的綠意公園, 好似暫時離開旺角咁. 食過午飯, 便同肥肥到荷理活取他訂造的西裝 (for phuket pre-wedding), 不過間死人野又未搞掂, 又送漏野, 真係白行一趟. 之後我們便搭67X 回屯門了.

回到屯門, 先到日本城買過個新垃圾筒, 之後我說想買電湯煲, 但搵左幾間都要四百幾蚊一個, 唔啱筆直. 之後我便去新墟買餸, 肥肥就去攞眼鏡, 各自回家. 都6點幾, 到街市執平野. 一個人買餸, 回到家肥肥已鎖埋門自己閉關打機, 仲開左三罐啤酒飲tim! 我就一個人又洗又煮, 煮了芫茜魚片湯, 肉碎茄子, 蒸倉魚, 臘鴨脾撈白飯. 煮好曬飯執好曬枱肥肥先斯斯然出來食飯. 食飯時他說他的朋友有可能會上來打機. 所以食飯後我便開始執屋, 肥肥就成隻死豬咁攤在梳化/床上玩iphone, 還說”你 咁 樣 走 來 走 去 左 住 我 打 機 ”, 我真係好嬲呀!!!!!!! 我咁累仲要一個人執屋打掃, 都係想佢d friend上到來唔會失禮人, 佢仲俾說話我聽.

好嬲佢!!!!!!!!!!! 訓覺都唔使佢UM呀!!!!!!!!! >.<

失控的晚裝 - part C

想不到這篇"失控的晚裝"寫到part C到仍然很失控. 話說我一心打算打RHP的紅色旗袍轉做媽咪衫, 我特意約了2小時的唯一試衫session叫埋媽打同肥媽一齊去試. 媽打去到了, RHP原來只有8件左右的媽咪衫, 全部都一係拖尾一係low cut, 媽打試了幾件都不喜歡, 無論我幾落嘴頭都無用.
肥ma來到仲大鑊, 佢上到黎先話要著褲, 無褲款就連試都唔使試 (真系吹鳩象, 叫佢試衫時又唔講自己一定要著褲! ).

咁樣簡直係打爛左我個如意算盤, 左度右度都係多左一間晚裝. 唉, 無計啦, 如果真係要在RHP租兩件晚裝, 都無可能兩件都係紅色. 所以把紅色旗袍換了另一件. 因為時間又不足, 而有幾件睇落OK的都已經無期了. 先試了一件肉粉色全通花, 好似好老咁(著起成個中女咁), sales說得沒錯, 花花衫係會顯得成熟些. 而sales則推介我著另一件紫色橫間, 著起來比較young, 看落OK, 但沒有釘一聲的感覺, 但sales則說我較合襯這件, 我覺得她的taste都OK, 所以雖然我心裡不太確定還是confirm了這一間.

confirm實D衫就可以影相了. 今次租衫行動俾自己搞禍了, 心裡真是有點不開心. 好希望自己可以快點重拾心情吧....(如大家看到此post, 可否俾D正面的評語呢....咁樣我都會開心D)

之後同肥及肥媽道別, 再同老豆媽打番去油麻地永隆度confirm裙掛, 永隆的姐姐看到我便說"高高瘦瘦"的身型, 真係氹得我好開心, 心情緒為回復了. 裙掛呢家野真係試得多都睇到眼花潦亂, 最後都是選了"小五福", 特意揀一件較新淨的(只穿了一兩次), 穿起來真的醒神些! 而且亦較修身, 看起來不會肥呢~$780, 很滿意~

confirm裙掛後, join埋細佬一齊去維景酒店食buffet慶祝媽打生日, 長腳蟹, 三文魚, 魚翅湯, 鐵板即燒羊架, 牛仔柳, 大蝦, 仲有即焗梳乎厘, 連加一每人$313, 算是不錯喇~

唯今之計, 唯有睇下在Mariee度唔要藍色希臘裙轉伴娘裙, 或者轉租到布吉pre-wedding, 再唔係咪真係著三件law.....(23/9 : 最終以加$1000 settle了租到布吉影相.....覺得自己真係好side錢....)

DIY起動 - 找辦去!

今日終於的起心肝去腳踏實地找DIY的材料. 鬼咩, 網上說賣紙的地方只開星期一至五, 星期六只開到三點, 仲要o係中環, 真係要特登出去架麻!昨天到Pen取了invitation的sample,事不宜遲, 今天就去中環找紙去!

網上找的一間叫"永信紙業"的紙行, 地點位於中環九記斜對面, 好易搵. 不過因為佢星期六只開到三點, 星期日又唔開, 所以多次經過都摸門釘! 裡面有好多好啱用來做請帖的紙, 全部都係一幅幅單買, 仲有紙辦任攞! 我起初只想找珍珠紙, 店內的伯伯很好人, 他給我一張紙碎給我寫低價錢, 點知張紙碎原來係好靚既日本飛絮紋紙, 好適合做我的invitation! 好開心取了些紙辦回去呢!

之後我問伯伯邊度可以印帖, 原來就有對面(即九記旁)就有一間"強興印務". 一於入去問下啦~店員Dennis係一個好nice的人啊, 他們的紙都係可代購永信的紙, 再加工印刷的! 單色都係$200, 燙金/銀是$250, 都幾啱我筆直! 真係好開心搵倒這兩間店呢!

行完紙行, 一場來到中環, 一個人去博洛尼亞食個多士早餐, 好satisfy!之後再搭地鐵去深水埗搵絲帶, 一向都知道深水埗有好多手作仔的材料店, 但實質我就從來無去過. 原來在汝洲街真係有好多間, 好多絲帶珠仔手作店, 星期六都迫滿人. 我入到一間絲帶店, d款式真係多到嚇死人!! 搞到我患上"選擇困難症"....

冰山一角

最後我取了些絲帶辦便離開了, 嘻嘻, 我的DIY Inviation有了雛型了, 真係開心. 諗住由深水埗搭巴士返屯門, 點知傻下傻下搭錯左方向去左旺角! 頂! 唉, 咁唯有行下花墟睇下有無收鑊啦~搵倒一間"百利花卉"問下襟花價錢, 剛好她們在整既用紅玫瑰做的襟花好靚啊! 她們用的襯花同絲帶都好靚! 而且價錢只是$30/個! 以鮮花來計十分划算呢! 而且她們亦很老實說現在不能報倒三月的價錢俾我, 因為情人節過後報的價才會最抵的, 叫我過了情人節才來找她.....哎呀我最怕咁趕了....

我又去了最出名的"繽紛花店"查詢了用鮮花佈置證婚走道的價格, 她們說小花束都要$180/束, 最少做$10/束, 即係要$1800!! 嘩, 用$1800來佈置10分鐘的證婚儀式簡直是燒錢一樣(雖然我租禮服已經是燒錢了), 但真係不得不卻步.....還是自已用tissue paper DIY好了......

P.S. 原想保持神秘, 但念在這blog根本沒人在看, 就偷偷po一張請帖的雛型color combination給大家看看吧~

難為了新抱初體驗 - 同肥肥一家去澳門

之前聽同事推介的二天珠海澳門團因為人數不足不成團, 反正都請了假, 便提議和肥肥一家去澳門一日游.適逢澳門國際煙花節, 順便睇煙花都係一個bonus!

因為屯門人, 所以搭屯門碼頭出發的西北航運去澳門係最佳之選! 早上去澳門只可兩班船, 7:30及10:30, 我地搭10:30. 最麻煩係西北航運無得網上訂位, 我同肥肥9:30去到仲要去提款機禁錢再去買飛, 好在俾我買倒, 如果買唔倒真係柒到爆!

肥ma&肥ba約10:00先到, 第一時間就係要幫肥ma搵廁所.呢個動作於整天行程內無數次出現. 每去到一個地方都要搵廁所搵廁所....

登船的地方都幾新淨, 架船都OK舒服, 好定下唔會好"浪". 一個鐘頭無多無少去到澳門. 對我地呢D屯門人真係慳番好多時間! 在船上問定肥ba,問佢想去飲茶定豬扒包, 話到明飲茶果度係食懷舊feel, 食物質素一般. 不過肥ba說還是要去飲茶. 好啦, 咁我地一落船就去飲茶啦. 搭的士到紅街市的龍華茶樓.

時間約十二點, 真正茶客不多, 但多數都是來影相的香港人. 這裡的確有點像很懷舊的舊式茶樓, 又有點像攝影展, 因為擺放了不少特式攝影作品. 我們點了蔥油雞半隻, 一籠馬拉糕, 一籠蒸鯪魚球. 食物都OK, 蔥油雞不錯. $12/人的茶位(很貴!), 我們點了鐵觀音. 茶味不錯的. 在這懷舊的環境下, 原想坐耐D, 影下相, 好好感受下. 但肥ba好似好急好趕咁, 食曬D野之後係咁嚷著要走, 又話D野唔好食, 好似坐多陣都俾蟻咬咁!! 急住俾錢, 就連肥ma入左廁所都等唔切, 要即刻埋單即刻落數.......搞到我地裙甩褲甩咁衝落樓, 都唔知咁急為咩!? 唉......

之後我帶隊步行到青州的灶記, 好彩無執到(隔離劉記因為收地起樓執左lu).人不多, 鐵皮屋茶檔仔格局, 不過有強勁風扇加上少少微風唔覺得熱. 肥肥一家對呢D"痞"登仔的茶檔都幾鐘意! 貪佢有本土特色吧! 我地叫左兩個豬扒包, 我飲了熱鴛鴦, 再要一碟豉油皇炒面大家分, 豉油皇炒面剛炒起很香, 肥ba都讚好食呢!

之後又到網上有不少推介的台山街市堅記食豬腳薑, 一個小小的街市, 地下一層一入去就是了, 只賣乾貨所以環境都OK衛生, 叫了兩隻豬腳及兩舊薑, 豬皮, 雞蛋, 我一向對豬腳薑都沒有特別prefrence,但今次食完真係驚喜喎, 好好味啊! 從前食豬腳薑都不會吃薑的, 原來薑先係最矜貴呢! 第一次就咁齋食薑啊, 原來好林好入味的, 正! 肥ba&肥ma都讚好食, 可能上一輩的人鐘意食呢D野呢~

食完之後我地就搭巴士去新馬路, 帶左佢地去佢地想去的大三巴, 其實佢地都去過好多次, 只不過是想行果條好多試食的斜路買手信. 果D試食真係任試唔嬲, 大大件的鳳凰卷都可以任試, 淨係試都試到飽曬啦! 雖然我都幾鐘意食紫菜肉鬆鳳凰卷, 不過都係忍住唔買. 肥ba就買左薑糖, 佢本來想買花生糖, 但我估佢嫌貴所以買薑糖. 呢D傳統糖我唔識欣賞, 我估都係上一輩先鐘意食.

行完大三巴, 我帶佢地去李康記食零石膏粉豆腐花. 雖然我知大三巴距離李康記條路好近, 但係因為間野在小巷之中, 要問幾個人先問倒佢既位置. 不過D澳門人都幾友善, 都好樂意教路. 行到李康記叫了三碗豆腐花, 肥ba&肥ma可能行得太累了, 都已經無咩表情.

食完之後肥ma例牌去廁所, 這次去得有點耐, 原來要等人出來, 肥ba不知道, 又唔知點解趕頭趕命, 要肥ma去完廁所出來即刻離開. 所以我們又裙甩褲甩咁離開了. 之後他們說想去賭場, 我不好賭, 諗住帶佢地去近近地十六浦涼下冷氣算了. 點知去到十六浦前面見倒Galaxy的無頂巴士, 肥肥很想去這個新賭場, 所以提議等下面班巴士. 這個時候肥ba又說要去廁所, 大佬呀, 頭先個個去廁所你又唔去? 又o係度催命符, 依家個個等車時才說要去!? 真係俾佢吹帳.

不過等左半粒鐘都無車, 問人話原來這裡沒有車去Galaxy!?(唔通頭先眼花!?)我地最後搭巴士去氹仔再行過去. 去到Galaxy, 好富貴的感覺, 有點像半島酒店的風格. 入到賭場, 肥ma又問邊度有得坐? 大佬呀, 周圍都係登啦, 仲問. 之後我地約好時間再集合就分開玩. 我一向只玩大細. 第一野落注就輸了, 十分無隱. 好在肥肥俾左$100我再玩, 但玩多3舖都輸埋, 肥肥由羸$1000變輸$200, 好在我截住佢ja,唔係輸得仲多.

因為大家(肥ba說自己也輸了千多元!!??) 都輸了, 想快點離開這個鬼地方. 我地搭番免費巴士到八百伴, 打算轉的士到晚餐的餐廳. 點知等左好耐都無的士, 仲被個死人大陸人截左我地架的士!!(明明在的士站排隊的!!) 幸好立即可以上倒第二架的士, 可是上到的士後肥ba又係咁依依UMUM咁話個的士司機唔啱, 其實使咩同佢勞氣呀, 好鬼煩!!!! 去到訂了坐的美心亨利餐廳, 間小店都裝修得很新淨很雅緻, 一D都唔似幾十年老店. 今晚全場full了, 沒有訂位就一定無得食呢!

坐下才知道要每人最低消費$200, 肥肥訂位又沒有跟我說.其實如果係我同肥肥兩個來吃, $200/人都沒什麼, 我怕肥ba&肥ma會嫌貴(因為他們會不捨得食西餐的). 之後肥ba問我肥肥有沒有飲酒, 我說肥肥沒有停過飲酒, 昨天和前天都飲了. 肥ba聽後很不高興, 開始在鬧情緒, 全餐飯拿埋口面橋埋雙手食好少野又唔出聲, 肥肥把責任推落我倒, 我問心無愧, 我只是講事實. 但如果我早知佢老豆會咁麻煩, 可能我會唔出聲.

Anyway,這間小店的菜式做得不錯. 在最低消費$200之下, 我們點了:

1)白酒煮蜆 - 做得不錯, 蜆肉新鮮, 很清新, 不過以份量來說有點貴.

2)香辣大蝦兩隻 - 二百多元只有兩隻蝦, 平時我一定不捨得食. 不過真係做得幾好食, 大蝦夠曬彈牙, 上面的香辣肉醬夠惹味, 仲有蝦的鮮味, 用來配白飯一流!

3)非州雞 - D汁都OK, 不過唔夠蝦的汁咁好味

4)葡式燒乳豬 - 好過黑沙環果間好多!!!! 皮脆肉嫰!!! 必點!

5)馬芥休炒飯 - 不錯.

其實服務都算不錯, 上菜時間很適宜, 又會不時幫你換骨碟等, 唯一唔好就係食完好快就幫你執碟, 仲要連墊枱紙都執埋, 俾我感覺係想你快D食完快D咁, 唔知係咪我誤會呢?

明明話要食到9點先出去睇煙花, 肥ba一食完就話要出去等我地, 又唔係坐得唔舒服, 又係咁樣搞埋d小學生鬧情緒手段, 真係好煩. 我地無理佢, 一路坐到九點鐘行出對面睇煙花. 個位置真係good fit到無人有, 不枉佢要收最低消費. 唔使人迫人咁都可以欣賞倒咁靚既煙花, 真係正!

仲俾我影倒哈哈笑!

睇完煙花, 曲中人散, 搭船離開澳門回上環. turbojet一如以往咁舒服, 不過上環回家就轉接了, 搭了961再轉輕鐵, 返屋企成個人散曬. 終於完成了和肥父母去旅行的歷史任務. 同佢地兩個出街真係好麻煩, 肥ma還說想買套票睇水舞間住一晚, 唉, 我真係無咩興趣同佢地去. 仲辛苦過湊細路, 真係請我都要諗下先, 何況仲叫我AA!? 真係唔怪得我點解唔想成日見倒佢地, 因為真係好辛苦. [唉]

屯門小店式扒房 - Lam Tei Grill

肥肥說他一個高高在上的舅父都過來藍地吃這間扒房, 作為一個Tuenmunian及半個藍地人居然未食過簡直說不過去!! 其實這店在開飯網都頗多好評呢, 立即訂位吃吃看!

這間小店位於藍地大街中間, 未開業前是一間村屋改建的茶餐廳, 依家佈置得頗有情調呢! 自從季季紅火紅起來藍地大街都旺起來了, 多了一兩間特色餐廳, 吸引一些外面的人渣車來吃飯.

訂了六點半的時段, 來到後人不多, 但後來愈來愈多坐滿了. Main course約百多元, 加$30有set dinner(沙律, 湯及飲品). 我和肥肥嗜肉隱起, 想吃牛扒. 這裡有不少牛扒選擇, 貴的有二百多元的和牛同prime steak, 不過因為未試過佢D質素唔敢叫貴扒, 點了一個安格斯西冷和安格斯肉眼試試看.($148)

套餐包沙律一小碗, 不錯. 餐湯選了龍蝦忌廉湯, 很好飲啊! 龍蝦味很濃很出, 讚一個! 配的小餐包是烘熱的小硬豬, Olive Oil及黑醋不怎麼樣，但單單是暖暖的餐包都加分了！我們還點了兩杯紅酒，才$33/杯，以這價錢真是沒話可說!

主菜來了, 足足12oz的西冷, 超大塊. 外層用炭火燒得香香的, 不錯不錯. 肉味因為外層燒香了加分了, 可是肉汁不多, 吃起來覺得頗乾. 但以百四蚊一份扒來說, 他的C/P值很高, 很值得吃. On side的薯蓉都做得不錯.所以總的來說也很滿意.

晚餐加$40有一份即焗朱古力心太軟配雲呢拿雪糕, 朱古力心太軟很濃很濃的朱古力, 配雪糕真是天衣無縫! 肥肥佷喜歡這個甜品, 說要俾一百分呢!

埋單$473,相當抵食, 會再去試其他菜色!